Гьелини айрыча бир тамашалыгъы бар буса, о да – юртну ортасындагъы ерден чыгъагъан таза уллу булагъы. Арапланы, Чингисханны, Темирланны асгерлери чапгъын этип зараллар гелтиргенде де, халкъ турагъан еринден гёчюп гетмеген. Юрт янгыдан къурулуп, янгыдан яшама башлай болгъан. Ону себеби де ерден чыгъагъан уллу булакъ сув болма герек. О сув оьтесиз таза ва сувукъ.
Олай сув чыгъагъан ерни къоюп гетмеге бажарылмай. Бырынгъы заманларда чы айрокъда юртланы къурулуву сув таъминликден гьасил болгъан. Юртну халкъы гьали де шо ичеген сувну къоллап яшай.
Уллу межитни тюбюнден чыгъагъандай шо булакъ, уьйню ичине гирсенг, айрокъда яз вакъти, къаркъаранга сингеген ажайып берекетли гьислени сезмеге боласан. Сувну сюзюклюгю гюзгюдей бет гёрсете. Ерли халкъны бирлери юртну атын шо «гюзгю» деген сёз булан байлай. Сайки, бу ерде башлап бина тикгенлер Эрмениден гелгенлер болгъан. Оланы тилинде «гюзгю» деген сёзню айтылышы «гьели» деген сёзге къыйыша. Юртлу къабурларда эрмени сынташлар да кёп ёлугъа.
Бырынгъы заманларда Россиядан Бакюге элтеген ёл Эрпелиден, Темирхан-Шурадан, Жюнгютейден, Дёргелиден, Паравулдан, Гьелиден, Къарабудагъгентден, Уллу-Бойнакъдан оьте болгъан. О вакъти бу ёл булан барагъанлар, озокъда, булакъгъа тамаша эте болгъандыр. Белгили француз язывчу Александр Дюма да ёл уьстде Гьелиде токътап къонакълыкъда болгъан деп айтыла.
