Къандавуравулгъа гелип, тезги танышыбыз Гьасан Салимурзаевни гёрмей гетмеге бажарылмай эди. Ол юрт яшавну бек сюеген адам. Кёп йылланы узагъында юртдагъы почта бёлюгюню начальниги болуп ишлеп турду. Гьали пенсияда, ону булан юрт яшавну гьакъында лакъыр этебиз.
Гьасан саламат хасиятлы, айтагъанын бек ойлашып авзундан чыгъарагъан адам. Оьзю сёз башлап лакъыр этеген адам да тюгюл. Шо буса инсанны хасиятларындан инг де яхшысы буса да ярай. Неге тюгюл, олай адам булан гьаллашма да тынч ва онгайлы да бола. Мен Гьасангъа туврадан: «Юртда яшап къалгъанынга гьёкюнч ёкъдур?» – деп сорайман. Ол да, илиякълы иржайып, туврадан: «Ёкъ», – деди. Себебин ахтаргъанда, Гьасан юрт яшавну берекетли ерлерин эсгере башлады. Биринчиси, машин къалмагъал, къавгъа азлыкъ. Экинчиси – таза гьаваны таъсирлиги.
Бу юртда гьава айрыча таза буса да ярай, деп ойлашдым мен. Къырыйындагъы агъачлыкъ таъсир этмей де болмай. Гьайван-мал сакълама да, бав салма, ашлыкъ оьсдюрме де онгайлы, эркин ер. О гьакъда оьзю Гьасан булай хабарлай:
– Гьайван-мал сакълайгъанлар алда кёп эди. Гьар ожакъда да сакълана эди. Гьали аз. Мен оьзюм де сакъламайман. Къуллугъу кёп экенге буса да ярай, кёбюсю халкъ шагьарларда йимик арив, таза яшама сюе. Шолай яшамакъ учун гьар кимни де ожакъларында онгайлыкълар этме де гьалиги заманда къыйын тюгюл.
Юртларда жагьил яшлагъа иш ёкъ саялы, яшама ялкъывлу буса да ярай. Темиркъазыкъ бойгъа, Москвагъа, оьзге ерлеге гетегенлери кёп. Олагъа айып этме ярамай. Йигирма биринчи асруну яшлары, компьютерлени, гючлю технологияланы девюрюнде юртда туруп, агьлюсюне сыйыр да савдуруп яшама, озокъда, сюймес. Уллулар учун бу девюр къолай. Жагьил заманында ишлеп де уьйренген, къавгъасыз парахат яшавну да толу дагьнисин сезеген заманы да гелген.
Гьасан уьягьлюсю Умурапият булан оьсдюрген авлетлени 3-вю – улан яшлар. Мавлет, Юсуп Салимурзаевлер де юрт яшавну танглагъан. Олар да Къандавуравулда яшай. Экевю де – ич ишлени район бёлюгюню къуллукъчулары. Мавлет чи пенсиягъа да чыкъгъан. Уллу уланы Мурат къурувчу касбуну танглагъан. Къызы Нюрсият да юртда яшай. Гьасанны агьлюсюндегилер – юрт яшавну яхшылыкъларына да тюшюнген, татывун да англагъан, дагьнисин де сезген таза юртлу адамлар.
