Юрт китапханаланы асувлугъу тас бола тура деп ойлашагъан адамлар да бар. Балики, алда йимик китапханалагъа бакъгъан сююв ёкъ буса да ярай. Тек китапханалар халкъны байлыгъы экенни унутма ярамай. Неге тюгюл, бизин тарихибизге агьамият берип къарасакъ, Абусупиянны китапханасындан башлап, бугюнгю республика милли китапханасына етишгинче, китапханалар халкъ учун этген пайдалы ишни англама къыйын тюгюл. Гьели юртдагъы китапхана да шолай пайдалы ишни кюте. Гьелини китапханасында янгыз китаплар сакъланып къалмай. Ону къуллукъчусу Лабат Ибрагьимовна айтагъан кюйде, китапханада гьар тюрлю ёлугъувлар да оьтгериле.
