Къандавуравулдагъы орта школада буссагьатгъы вакъти 350 яш охуй. Муаллимлени санаву 49 бар. Башлапгъы класланы яшлары – оьзге бинада. Класлар етишмейген саялы, охувну эки сменде юрютме тюше.
– Озокъда бек онгайсыз, – дей школаны директору Гюлнара Арсланбекова, – тек узакъ къалмай янгы школагъа гёчежегибиз сююндюре. Онда эркин болажакъ. Пикрусун англата туруп, директор дагъы да булай деп сёзюн узата:
– Янгы школада 500 яшгъа охума ер болажакъ. Спортзалы, футбол ойнама майданы, ашюй, китапхана, оьзге тюрлю къуллукълар кютеген уьйлери булангъы уллу школа.
– Яшлагъа юрюме йыракъ тюгюлмю? – деп сорайман.
– Йыракъ болса да, амал болажакъ. Сонг да, юртлу яшлар бираз юрюген булан иш бузулмас, пайдалы болур, – деп иржая директор.
Бизин лакъыргъа тарихден дарс береген муаллим Магьач Сотавов да къошулду. Яшлар булан ишлейгени ону 40 йыллардан да кёп бола. Юртну тарихини гьакъында да ол хыйлы заман лакъыр этди.
Буссагьат школа ерлешген бина – такъта уьй. Алда школагъа от тюшюп, чарасыз болуп, гьалиги ерине чыкъгъан. Юртлу яшлагъа билим берив тармакъда алдагъы вакъти кёп йыллар ишлеген муаллимлени арасында Вагьидат Умаханованы, Адилхан Абдурагьимовну, Шамил Муталимовну, Женнет Къазиеваны, Къураш Адиловну атларын эсгерме тюше.
Бугюнлерде де сынавлу муаллимлер къумукъ тил ва адабиятдан дарс береген Нюржанат Адилова, башлапгъы класланы муаллимлери Найида Биймурзаева, Камиля Беремова, тарих дарсланы юрютеген Магьач Сотавов, завуч Абдулали Абдуллаев, математик Иса Мугуев, физкультура дарсланы юрютеген Муратхан Абдурагьимов яш наслугъа сынав уьйрете.
Артдагъы йылларда педагогика коллективге къошулгъан гьаракатчы муаллимлени арасында Гёзел Арсланбекова, Назир Арсланалиев, Вазипат Адилова, Сайида Асакъова, Райиса Гьайдарова, Нюрсият Салимурзаева билим берив ишге тындырыкълы янашыв болдурагъан яш наслу деп гьисап этиле.
