Шавлух Ибадуллаев – Дагъыстанны халкъ артисти, «Лезгинка» ансамблинде бийиген, Дагъыстанны «Йырларыны ва бийивлерини ансамблини» баш балетмейстери болуп чалышгъан. Ол Темиркъазыкъ — Осетияны да ат къазангъан артисти.
Ибадуллаев 1940-нчы йылда тувгъан. Оьзюне 13 йыл болагъанда Москва пачалыкъ циркде аркъанны уьстюнде юрюйген группагъа къошулуп оьзюню гьюнерин гёрсетме башлагъан. СССР-ге аты айтылгъан артистлер Р.Абакаров, Я.Гьажикъурбанов, О. Попов булан бирче ишлеген.
1998-нчи йылда Шавлух яшланы «Гьели» деген хореография ансамблин къура. Кёп йыллар Къарабудагъгент районда Агъай Къаплановну атындагъы бийив, йырлав коллективинде солист ва чебер ёлбашчы болуп ишлей. Бу коллектив кёп тюрлю халкъара конкурсларда ортакъчылыкъ этген ва савгъатлар къазангъан. Шо коллективде Шавлух булан бирче ону уьягьлюсю Анав Ибадуллаева да хыйлы халкъны гьакъ юрекден гелеген харс урувларын къазангъан.
Бир нече йыл алда Шавлух Ибадуллаев Россия Федерацияны Гьукуматыны «Душа России» деген пачалыкъ савгъатына да ес болгъан.
