Дагьир Хасавов, белгили юрист, россиялы адвокат, «Дагир Хасавов и партнёры» деген адвокат бюрону (Москва) ёлбашчысы, тарихи илмуланы кандидаты. Арбитр CIArb институтуну уьюрю (Лондон)
Гьар охувчугъа аявлу, сююмлю бизин анадаш «Ёлдаш» газетни къуллукъчуларын, охувчуларын ачыкъ юрекден къутлайман! 100 йыллыкъ юбилейигиз булан республикада ва ондан тышда гьар агьвалатлагъа сесленип, охувчуларыгъызны сююндюре туруп, асру бою юрюйгенигиз булан оьктеммен.
Янгыз Къумукътюзде тюгюл, савлай Темиркъазыкъ Кавказда ва ондан тышда да агьамиятлы агьвалатланы, тархланы халкъыбызгъа билдирип юрюйгенигиз пачалыкъ даражада бек тарыкълы.
«Ёлдаш» булан мен оьтген асруну 80-нинчи йылларындан берли танышман ва охуйман. Оьзюмню ана тилимни унутмас учун, Ашхабатда, ватанымдан йыракъда яшайгъандан берли, газетге язылып ва охуп юрюгенмен.
«Ёлдаш» газетни яхшылыгъы булан мен оьзюм Мычыгъыш республикада яшасам да, борагъанлы къумукъ экенимни, оьктем къумукъ халкъымны бир вакили экенимни билгенмен.
Мен бизин халкъыбызгъа оьзюню яшавуну мекенли сырдашы «Ёлдаш» газет булан оьмюрюн узатмакъны ва сююмлю газетибизге халкъындан айрылмай яшамакъны ёрайман!
