Халкъара фестивальны алдынлылары

21 ноября 2014 в 12:50 813
Прочту позже
Халкъара фестивальны алдынлылары

Фестивальны алдынлыларын савгъатлавгъа багъышлангъан шатлы жыйынны Дагъыстанда яшёрюмлени ишлерине къарайгъан министрни заместители А. Безрукова ачды ва оьзюню сёйлевюнде яшланы ва олар булан ишлейген муаллимлени якълавну уллу агьамияты барны эсгерди.

Фестиваль яшланы жамият къурумларыны арасында конкурс гьисапда юрюле бола. Бу йыл шо конкурсну рес­публика бёлюгю март айны 1-ден 20-на ерли юрюлдю. Шо вакътини ичинде бизин райондагъы школаларда иш гёреген яшланы жамият къурумлары кёп санавда чаралар оьтгердилер, тийишли папкаланы жыйдылар. Райондан бу конкурсгъа деп лап да яхшы 20 папканы айыргъан эдик. Шоланы 7-си республика оьлчевюне де гёрсетилди. Конкурсгъа берилген ишлерден биз «Дюньябызны яшыл тюсге бояйыкъ!», «Юрекге ювукъ ерлер», «Умут сёнмей», «Ер юзюнде рагьмулукъ уьст гелсин!», «Оюнланы дюньясы», «Мени агьлюмню тарихи», «Къоччакълыкъ!», «Музыканы айланасында» деген ва башгъаларын лап да арив гёрген эдик.

Натижада, конкурсну гьасиллерин чыгъаргъан сонг, «Дазусуз яшлыкъ» деген халкъара фестивальны дипломантлары болгъан ва алдынлы ерлени алгъан: Буглендеги Ш. Шихсайитовну атын юрютеген орта школадан З. Апутаева  ва Н. Жаватова («Варислер» деген яшланы жамият къуруму) – 1-нчи ер; Оьр Къазанышдагъы 2 номерли орта школаны «Акъ къаргъа» деген студиясы (ёлбашчысы Г. Садрутдинова); «Ахтарывчулар» деген яшланы жамият къуруму (А. Жагъараева ва М. Къурагьмаева); Оьр Къазанышдагъы 1 номерли орта школаны «Умут этегенлер» деген яшланы жамият къуруму (С. Мурзабекова) – 2-нчи ер; Чиркейдеги 2 номерли орта школаны жамият къуруму (Х. Абдулгьалимов) – 3-нчю ер.

Халкъара конкурс-фестивальда актив кюйде ортакъчылыкъ этгени учун Буйнакск районну билим берив управлениесини янында иш гёреген «Индиго» деген яшланы жамият къурумуна буса Дагъыстан Республиканы яшёрюмлени ишлерине къарайгъан министерлигини атындан баракалла кагъыз ва кубок берилген.

 

 

 

Ума МАГЬАММАТОВА,

«Индиго» деген яшланы жамият къурумуну ёлбашчысы.