Журналистлер булангъы ёлугъув

Журналистлер булангъы ёлугъув

       Гетген сонгугюн Дагъыстанны Башчысы Владимир Васильев, маълумат къуралланы вакиллери булан ёлугъуп, Россияны Президентини Федерал Жыйынгъа багъышлав сёзюню аслу гесеклерин арагъа салып ойлашды ва оланы соравларына баянлыкъ гьисапда жаваплар да берди.


Лакъырлашывну «Махачкалинские известия» деген газетни баш редактору Шуана Магьамматова «сорав-жавап» деген къалипде башлады. Ол Президентни аз таъмин агьлюлени якъламакъ учун чаралар гёрювню гьакъындагъы сиптесине республиканы Башчысы оьзю нечик янашагъанын билмеге сююп сорав берген эди.


«Гетген йыл бизин респуб­ликабызда 46 минг яш тувгъан, оланы да 13 минги – башлап тувгъан сабийлер. Огъар хыйлы акъча гёрсетиле чи. Шо буса мени элни Башчысы гьисапда къувандырмай болмай. Шо харжлар адамлагъа яратылажакъ. Оьз гезигинде биз, озокъда, шо гьаракатда ортакъчы болажакъбыз. Биз бу йылгъа бюджетни къурашдырагъанда шону социал тармагъына гетген йылдан кёп къолай харжланы гёз алгъа тутгъанбыз. Шо ягъындан биз адамланы алдында хыйлы борчлубуз. Налогланы да биринчилей бизин адамланы маишатлыгъын къолайлашдырывгъа бакъдырабыз...» – деди В.Васильев.


Сонг «Аргументы и факты» деген газетни Дагъыстандагъы бёлюгюню баш редактору В.Ме­ликовну федерал даражадагъы къарарланы къабул этилеген кююнде регионланы башчыларыны ролюн артдырывгъа гёре В.Путин малим этген сиптеге нечик янашагъанын сорады.


«Президент республикаланы башчыларыны пикрусун гьи­сапгъа алып чалышагъаны хыйлы бола. Пачалыкъ советни генгешлеринде жамиятланы, сия­сат партияланы, касбучуланы ортакъчылыгъы булан пикру алышдырыв юрюле, мекенли гьакълашывлар бола», – деп жа­вап­­ланды В.Васильев.


«Дагестан» маълумат агентлигини директору увакъ, орта ва даражасы уллу далапчылыкъгъа не йимик енгилликлер этилмеге болагъаны гьакъда сорады.


Шо соравгъа жавап бермекни республиканы Башчысы Дагъыс­тан Гьукуматыны Председатели А.Здуновгъа тапшурду.


– Биз шо ягъындан иш гёрмеге башлагъанбыз. Эгер идара налог тёлевчюлени сиягьында бар буса, адамлагъа ишлемеге ерлер ача буса, шолардан тутулагъан налогланы неге ярамай аз этмеге, эниш тюшюрмеге. 3 пай этгенде 2 пайын бюджетден таба беривге байлавлу сиптени гьакъында айтгъанда, ону бизге пайдасы тие. Законну биздеги проектинде шо онгайлыкъ янгыз ону-муну ишлетип чыгъарагъанлагъа бе­­риле.


Сатыв-алыв, яшавлукъ яр­лыкъланы кютюв булан машгъул тармакълар шогъар гьалиге гирмей. Проектни шосу яхшы. Биз депутатлар ва жамиятланы вакиллери булан гьакълашып, шону имканлыкъларын артдырма къарамагъа болабыз, – деп баянлыкъ берди А.Здунов.


Генгешни барышында гиччи яшланы ожакъларында гезикге язылгъан кёп яш бар экени ва шону ёрукълашдырывну ёллары нечик экени гьакъда да айтылды.


А.Здунов, шогъар сесленип, «Демография» деген программагъа гёре бу йыл Дагъыстанда 37 ясли ва 20 яшлар баву къурулажакъны, шогъар харжлар топлангъанны англатды.


Пачалыкъ Думагъа янгы гюч, имканлыкълар бермекни гьакъында Путинни сиптесине гёре В.Васильев булай баянлыкъ бере: «Парламентни ролюн гючлендирив – о дюр оьсювню ва токъташгъанлыкъны бир белгиси. Халкъ сайлагъан Президент оьзю шогъар байлавлу масъаланы гётере буса – о нечакъы да яхшы деп гьисаплайман», – деди В.Васильев.


М.Мишустин уьлкени премьер-министрини къуллугъуна са­лынгъаны гьакъда айта туруп, В.Васильев РФ-ни ва республиканы налог къурумлары гьакълашып чалышагъаныны хайырындан жыйылгъан налогланы оьлчевю гьазиринде 20 процентге артгъанын эсгерди.


Ёлугъувну барышында шулай тувра къатнашывланы янгыз республиканы Башчысы, Дагъыс­танны Халкъ Жыйыныны ва Гьу­куматыны председателлери булан чы нечик де, районланы, шагьарланы башчылары булан да оьтгерсе яман болмас эди деген ой да малим этилди.


Республиканы Башчысы шо­гъар: «Биз ерлердеги ёлбашчылар булан иш тутгъанбыз. Биринчи кварталны гьасиллерине гёре оланы гьарисини ишине берилген къыйматланы сиз гёрежексиз: бирлери макъталар, башгъалары сёгюлер, оланы бир тайпасына башгъа иш излемеге де тюшер», – деп баянлыкъ берди.


Яшавлукъ-туруш маънасы булангъы масъалалагъа гёре де ачыкъ лакъыр юрюлдю.


Генгешни тамамлай туруп, Владимир Васильев яшавлукъ агьа­мияты булангъы проектлени суратлап макъалалар, билдиривлер язагъа­ны саялы маълумат къуралланы къул­лукъчуларына баракалла бил­дирди.


 

Бизин маълумат.