Ёллар янгыртыла


      Гетген йыл хыйлы ерлерде ёлланы ярашдырып ­онгарывгъа, янгыларын къурувгъа гёре бир къадар гёрмекли ишлер этилди. Гьали йыл янгыргъанда алда ахырына чыкъмай къалгъан ишлени бютюн этмек учун да гьаракат давам этилип тура. Шону ташдырагъан бир мисал гьисапда Буйнакск районда Атланавулдан Къарамахиге етгинче аралыкъдагъы ёлда булкъаны меселинде жанлы загьмат гьаракат эс этилегенни эсгермеге ярай. Шондагъы ёл къурув ва ярашдырыв ишлени «Нарт» деген ачыкъ акционер жамиятыны коллективи бир де бошамагъан гьалда юрюте.



Энни дагъы оьзге янгы затлардан къайры, ёлланы оьрю-энишини топурагъы къазылып тайдырылып тюзлене, айланмалар болгъан чакъы тувра этилип салына, агъым сувланы арыкълары бетондан къуюлуп, чоргъалар йимик этилип онгарыла. Гьасили, алда бир де болмагъандай гьар-бир ишде мекенлик бар экени эс этиле.


Мен асаслангъан маълуматлагъа гёре, 2019-нчу йыл республиканы ёл фондундан гёрсетилген харжланы яхшылыгъындан Халимбекавулну ювугъунда дёгерек айланагъан ерден Буйнакск шагьарны дазусуна етгенче уллу ёлгъа асфальт салынгъан. Атланавулдан Жю­нгютейге ва Чанкурбеге ерли мезгилдеги ёл да адам къарап турардай арив этилген. Шоланы онгармагъа да акъча маялар республиканы хазнасындан берилген.


Буйнакск район оьзю берген харжлар булан буса Оьр Къазаныш, Атланавул, Капиркъумукъ, Ишарты, Тёбен Жюнгютей юртланы ичиндеги орамлагъа асфальт салынгъан.


«Мени Дагъыстаным – мени ёлларым» деген проектни оьлчевюнде гёрюлген умпагьатлы чараланы хайырындан Такъалайгъа барагъан ёл, Буглендеги эки орам, Халимбекавулда спорт школа-интернатгъа элтеген эркин ёл, асфальт салынып, тегиш этилип онгарылгъан.


Ёлланы, орамланы онгарывгъа байлавлу ишлер давам этиле. Муна, Гьаркасгъа барагъан узун ёлну тюпден-ерден дегенлей тегишлев ишлер башлангъан. Сонг да, Бугленге етишгенче уллу таш ёлдан Къазанышны «Чоргъалар» деген авулуна бакъгъан ёлну башгъа якъгъа чыгъарып этмек учун ишлер узатылып тура. О битгенде кёп эркин ва онгайлы шагьра ёл йимик болажакъ.

 

А. БУГЛЕНЛИ.

 

Авторизация
*
*
Регистрация
*
*
*
Согласны с условиями сайта?
Генерация пароля