Къалды-къулдуланы пайдаландырывну гьакъында

Къалды-къулдуланы пайдаландырывну гьакъында



Дагъыстанны табии байлыкъларыны ва экология министри Набиюлла Къарачаев аянлашдыргъан кюйде, гьалиги заманда бизин республикабызны шагьарларында ва районларында башалман кюйде амалгъа гелген чёплюклени бириси де толу кюйде тазалыкъны къорувну низамына жавап бермей. Бугюнлерде Дагъыстанны Гьукуматыны янында гюнлюк низамгъа салынгъан шолай агьамиятлы масъалагъа байлавлу болуп оьтгерилген гьакълашыв жыйында ДР-ни Башчысы Владимир Васильев де ортакъчылыкъ этген ва ёлугъувну юрютген.

 


Жыйынны ортакъчыларыны пикруларына гёре ол оьз гьасилин чыгъарагъанда тазалыкъны низамын болдурувгъа ва къоруп сакълавгъа байлавлу соравлар тувулунгъан. Яшавлукъ ва шолай да производство къалды-къулдуланы адамлар яшайгъан ерлерден оьз заманында тайдырмагъа ким ва не зат четим этегенин мекенли кюйде ахтармагъа тюше. Шону булан бирче адамлар оланы ташлайгъан ерлерде оланы жураларына гёре айырып ишлетмеге неге бажарылмай деген меселдеги ва шолай оьзге соравлар жавапсыз ва чарасыз къалмагъа ярамай­гъаны гьакъда ойлашмагъа тарыкъ бола.


Гертиден де, Н. Къарачаев де эсгерген кюйде, гьалиги заманда бизин уьлкебизде йимик республикабызда да къалды-къулдуланы пайдаландырывгъа байлавлу реформа къыйын яшавгъа чыгъарыла. Лап да яманы, къалды-къулдуланы ерлерден алып тайдырагъан регион оператор къоллавчулардан этген къуллугъу саялы тийишли гьагъын алып болмай къыйнала.


Белгили болгъан кююнде, Кас­пийск шагьарда гьакъ жыйывну масъаласы 50 процентге яшавгъа чыгъарыла. Къалгъан шагьарларда да шону ёрукълашдырывгъа байлавлу бир къадар чаралар гёрюле. Амма тавтюп ва тав бойдагъы районларда къалды-къулдуланы пайдаландырывда белгиленген борчлар осал яшавгъа чыгъарыла. Демек, тазалыкъны болдурувну низамы акъсай.


Дагъыстанны тахшагьары Магьачкъалада къалды-къулдуланы айырып къабул этеген 2 пункт иш гёрмеге башлагъаны гьакъда да жыйында айрыча эсгерилген. Гьакъыкъатда буса бизин респуб­ликабызда шолай пунктлар гьар 10 минг адам яшайгъан ерде бирер ачылмагъа герек бола.