Дюнья ва пачалыкъ оьлчевюндеги маълумат къураллар йимик гьалиги заманда бизин республикада  ерли маълумат къуралланы вакиллери айлана якъдагъы талапланы гьисапгъа алып, оьзлени алдына салынгъан жаваплы борчланы кютювде гьаракатын генглешдире десек, гьакъыкъатгъа къыйышмай къалмас. Бугюнлерде, дагъы да ачыкълашдырып айтсакъ, 2018-нчи йылны февраль айыны 2-нчи гюнюнде, Магьачкъалада Расул Гьамзатовну атындагъы милли китапхананы конференц залында Дагъыстан Республиканы печат ва маълумат министерлигини коллегиясыны генглешген жыйыны оьтгерилди.

Белгили болгъан кююнде, шонда эсгерилген министерликни чалышывуну оьтген йылгъа байлавлу натижалары аян этилинди ва  бу йылгъа борчлар белгиленди. Коллегияны жы­йынын министр Рашит Акавов ачды ва юрютдю.

– Республикабызны маълумат къуралларыны оьсдюрювню ва  аманлыгъын болдурувуну программаларына байлавлу регион газетлени, телевидениени ва радиону вакиллери бир къадар натижаланы къолда этди демеге ярай, – деп башлады оьзюню докладын Рашит Забитович. –  Озокъда, печат къуралланы бугюнгю къысматы бизин теренден ойлашдыра. Неге десегиз, газетлени, журналланы тиражлары алдагъы йыллардан эсе тёбенлешегени тергевню тартмай болмай. Бу гьалиги девюрде айлана якъда тувулунагъан талаплардан хантав къалмайлы, дюнья, халкъара сынавну уьйренмеге  бизге де так­лиф этиле. Айтмагъа сюегеним, маълумат берив учун юрюлеген гьаракатда къоллавчулар учун янгылыкъланы оьз заманында етишдирив – аслу борч. Тюзю, шону учун олагъа гьалиги заманда Интернетни артын къувуп чалышмагъа четим. Муна шо саялы да, гьар печат къурал оьз ишинде маълумат беривню гьалиги алдынлы къайдаларын  пайдаландырмакъ учун электронный имканлыкъланы къолламакъ муратда оьз сайтларын ачып иш гёрмесе бажарылмай. Яшырмагъа тарыкъ болмай, шо ишни республикабызны бары да печат къураллары тийишли даражада пайдаланмайгъаны рази­сизликлени тувдура.

Арагъа салынгъан масъалаланы гьакъында айта туруп, ол оьзюню док­ладында тиражланы кемимеклигин янгыз харж булан байлап къоймагъа тюшмейгени гьакъда эсгермей болмады. Демек, охувчуланы, къоллавчуланы тергевюн тартмакъ муратда берилеген маълуматны гечикдирмей, гьакъыкъатгъа кюрчюлендирип, сан яныны даражасын къыйыкъсытмай гьазирлемеге тюшегенин ташдырды.

Республикабызны маълумат къуралларыны алдында пачалыкъ борчлар-тапшурув салынагъаны негьакъ тюгюл. Шолай тапшурувлар гьалиги талапланы гьисапгъа алып къурулгъан лап да агьамиятлы проектлени яшавгъа чыгъармакъ муратда алгъа салынагъаны гьакъ. «Халкъ – терроргъа къаршы!», «Оьсювню гесимлери», «АПК-ны асувлугъу учун», «Савлукъ сакълав», «Билим берив» шоланы арасында лап да аслулары гьисапда маълумат къуралланы чалышывунда айрыча ерни тутма тюшегени гьакъда да айрыча айтылды.

 Газетлени-журналланы, китапланы дегенлей, оьз заманында охувчулагъа етишдирмек учун  министерликни кюрчюсюнде «Дагпечать» къурулгъаны да арадан онча кёп заман гетмеген .Шо къурумну чалышывуну гьасиллери де жыйынны ортакъчыларыны тергевюн тартмай болмады. «Дагъыстан Республиканы ичинде печат этилинеген газетлени ва журналланы яйывну бугюнгю гьалы ва гележеги» деген масъалагъа байлавлу «Дагпечать» деген пачалыкъ автоном идараны башчысыны къуллукъларын заманлыкъгъа кютеген А. Керимов гьисап берди. Ол  малим этген кююнде, гьалиге ерли Дагъыстанны шагьарларында ва районларында «Дагпечатны» киосклары кёп тюгюл. Дагъысын айтмагъанда, тахшагьарда 200-ню орнуна, 30 тюгюл салынмагъан. Районларда буса дагъы да аз, уьч юртда тюгюл эсе  дагъы ёкъ. Муна шо саялы да, гележекде ломайлап газет-журналланы  сатывгъа чыгъарагъанлар булан ярышгъа чыкъмаса бажарылмай.

Жыйында чыгъып сёйлеген Дагъыс­тан китап чыгъарыв издательствосуну башчысы М. Омарова «Дагъыстанда китапланы чыгъарывда ана тиллени ва адабиятны къорувну масъаласы» ва «Дагъыстан» маълумат агентлигини директору М. Магьамматов «Гьалиги заманда пачалыкъ информация къуралланы оьсдюрювню масъалалары ва ёллары» деген темалагъа гёре оьз пикруларын арагъа чыгъарды.

Аслу докладлардан сонг берилген  соравлагъа жаваплар къайтарылды ва оьзге ортакъчыларыны пикруларына да тынгланды.

Ахырында докладлагъа ва сёйлевлеге кюрчюленип, хас къарар къабул этилинди. Шонда буса бу йылгъа алда токъта­гъан лап да агьамиятлы масъалалар айрыча хат булан эсгерилди.