Августну биринчи гюнлеринден тутуп «Къаягент район» муниципал къурулувуну ёлбашчылары да школаланы янгы охув йылгъа гьазирлигин тергей. Шо мурат булан оьтген сонгугюн биз де Янгыкъаягентдеги орта школада болдукъ.
Школаны абзарыны акъ чабылгъан таш баруларыны уьстюндеги челтирлерини сырлангъанлыгъы, баруланы боюндагъы отлар чалынгъанлыгъы бизин тергевюбюзню тартды, мунда янгы охув йылгъа тындырыкълы гьазирлик юрюлегенин гертиледи. Шулай яхшы гьислер булан школаны посагъасындан аякъ алгъандокъ, директоруну борчларын кютеген Камалутдин Камалов ва ону хозяйство ишлеге жаваплы кёмекчиси Артур Магьамматов бизин къаршылады.
– 1980-нчи йылда къурулгъан бу школа районда инг уллу орта охув ожакълардан санала, – деп сёзюн башлады Камалутдин Магьамматович. – Школада 785 яш охуй. Билим берив ишлеге 88 муаллим къуршалгъан. Дагъы да 20 адам кёмекчи ишлер булан машгъуллар. Ярашдырыв ишлер августну биринде башлангъан. Шону себеби де школа – районда экзаменлер (ЕГЭ) къабул этилеген уьч центрны бириси экени эди. Экинчиси – шогъар байлавлу болуп бир-бир муаллимлерибиз отпускалагъа бираз гечигип гетгенлик. Геч башласакъ да, ишлер къурумлу юрюле, сан яны да яхшы.
Ярашдырыв ишлер булан аслу гьалда Артур Магьамматов машгъул. Артур жагьил адам болса да, айланышына, гьар затны билип сёйлейгенине, этегенине гёре Камал Магьамматович огъар толу инана, ишине де рази.
– Бу йыл шо ишлени оьтгермеге бюджетден 40 минг манат акъча гёрсетилди. Шогъар, биз ойлашып, дагъы да 34 минг манат акъча маялар къошдукъ ва тарыкъ-герек къурулуш материалланы болдурдукъ, – дей Артур Муслимханович. – Уьч къабатлы бинаны ичинде 45 клас-кабинетлер бар, олардан къайры, школаны абзарында коридор булан школаны бинасына къошулуп, айрыча спортзал, жыйынлар оьтгерилеген зал, ашхана, котельный ва оьзге уьйлер де ерлешген. Бугюн буланы барысында да ишлер тамамлангъан деп айтмагъа ярай.
Сонг биз аслу бинаны оьр къабатларына чыгъып юрюдюк. Лап оьрдеги къабатгъа гётерилгенде, муаллимлени бир группасы коридорну тамларыны полдан бир ярым метр гётерилген боюн сырлай туруп къаршы болдулар. Олардагъы шатлыкъ, бетлериндеги сююнч, кюлкю мунда да ишлер чалт ва сан яны булан оьтгерилегенини белгилерини бириси болуп чыкъды.
– Пурхалагъа, тамлагъа акъ чабылгъан, батареялар, плинтуслар сырлангъан, – дей физика кабинетни ёлбашчысы Бати Багьаматова. – Гёресиз, аслу ишлер тамамлангъан. Директорубузгъа разилигибизни билдиребиз. Яшлар да бизин йимик сююнежек деп эсибизге геле. Гьали школаны коридорларындагъы увакъ ишлени битдирип, полланы, канзилени жувуп, оьрден тюп къабатлагъа тюшебиз.
Этилген ишлени гёрген сонг Янгыкъаягентдеги орта школа янгы охув йылгъа 90 процентге гьазир деп ташдырып айтмагъа болабыз. Яхшы гьалны алгъан суратларыбыз да гертилей. Озокъда, ишлени булай салыныву янгыз директорну яда ону кёмекчисини гьаракатчылыгъы булан болуп къалмагъан. Етишген уьстюнлюкде, ёлбашчыларыны айтгъан-айтгъанын этип, кёп йылланы узагъында топлагъан бай сынавун, усталыгъын къоллап ишлеген муаллимлер Бати Магьамматованы, Галина Сурхаеваны, Райзанат Ражабованы, Патимат Абдуразакъованы, Зарипат Къадиеваны, Земфира Абдуллаеваны, Сурият Капиеваны, башлапгъы класланы завучу Зулфия Османованы ва оьзгелерини аслам пайы бар. Бу ишлеге къуршалгъанланы гьарисине айрыча кёп савболугъуз деп айтмагъа сюесен.
Районда дагъы да 19 школа бар. Оланы барысында да ишлер къурумлу юрюй. Школалар янгы охув йылгъа 90 проценти гьазир. Бизин булан телефондан сёйлевюнде «Къаягент район» муниципал къурулувуну башчысыны кёмекчиси Ольга Къурбановна Ибрагьимова да шону гертиледи.
Оьтген охув йыл Янгыкъаягент орта школаны 36 яш битдирген. Оланы еттевю алтын медаллагъа ес болгъан. Яшлагъа билим беривде етишилген оьр натижаланы башы, кюрчюсю муалимлени яхшы ишлегенинден къайры, сав йылны узагъында арив ишлемек учун тизив шартлар яралгъанлыкъдан да гьасилдир деп эсибизге геле. Ойланы тюзлюгюне де шекленмейбиз.
