Тарбиялав ишни усталары

Уллу къызардашы Умзагьрат башлапгъы класларда ишлей, гиччи къызардашы Патибийке оьр класларда дарс бере. Эки де къызардаш яшланы 1-нчи класдан 11-нчи класгъа ерли охуталар. Лап да яхшы ери – бир-бирине кёмеклешип ишлейлер. Озокъда, эки де къызардашны бирче гелишип ишлевюне анасы Патимат Умарова ёлбашчылыкъ этегенине шат болмай болмайсан.

Къызардашланы анасы Патимат Магьамматовна шо школада 40 йыллардан да кёп загьмат тёге. Ол гьали де эки къызыны дарсларында олтура, класдан тышдагъы ишлеринде ортакъчылыкъ эте. Демек, къызларына жанлы кюйде ёл гёрсете, оьзю де башлапгъы класларда ишлей.

Мен бу къызардашланы атасы Магьаммат-Сайит Умаров булан бирче оьсгенмен, бирче школада ишлегенмен, ону бажарывлугъуна, яшланы сюегенине, ишин оьр даражада юрютгенине шагьатман. Магьаммат-Сайит Оьр Къазанышны орта школасында 1965-1969-нчу йылларда гьазирлик класдан башлап, бешинчи класгъа ерли яшланы охутду. Шо класларда охугъан яшлар гьали тюрлю-тюрлю къуллукъларда ишлейлер. Олар бары да бажарывлу уланлар ва къызлар болуп оьзлени герти загьматын узаталар. Озокъда, шо уланлар-къызлар Магьаммат-Сайитни атын буссагьатда да разилик булан эсгерелер.

Етмишинчи йылдан башлап, Магьаммат-Сайит къурулуш институтну Чиркей посёлокдагъы филиалында охуду ва Чиркей ГЭС-де ишлемеге башлады. Ол эсгерилген институтну битдирип, кёп йыллар о замангъы «Межколхозстрой» къурумда ишледи. Лап да агьамиятлы ери – эки де къызардаш ишлейген Оьр Къазанышны 1 номерли школасыны бинасы да Магьаммат-Сайитни ортакъчылыгъы булан къурулгъан. Демек, бу школа къурулагъанда, ол мунда прорабны къуллугъун кютген.

Магьаммат-Сайит Умаров кёп йыллар Оьр Къазаныш юрт советни председатели болуп да чалышды. Гьалиги юрт администрацияны бинасыны экинчи къабатында юрт советни алдынгъы ёлбашчыларыны арасында Магьаммат-Сайитни сураты да оьктем кюйде оьзюню ерин тутгъан.

Эки де къызардаш да натижалы кюйде ишлейгенине кёп далиллер гелтирмеге болабыз. Олар билим берив тармакъда баракалла алып чалышалар.

Къызардашланы яхшы ишине, биринчилей, яшланы ата-аналары бек рази. Экинчилей, школаны дирекциясы, муаллим коллективи олар булан оьктем болалар, къызардашлагъа ишинде уьстюнлюклер ёрайлар.

Олар ишинде сынав топлай туруп, гьар дарсын арив юрютмеге къаст этелер, чакъда-чакъда ачыкъ дарслар оьтгерелер, дарсларында жанлы лакъыр юрюте. Билим берив ишде янгы арагъа чыкъгъан компьютер технологияланы къоллай, ишини методикасына агьамият бере. Гьасили, яшлар оланы дарсларында актив гьаракатчылыкъ гёрсете, билимлени дюньясына инамлы кюйде абат баса.

Эки де къызардаш яшлар булан класдан тышдагъы ишлени де кёп юрюте, яшлар булан оьтгерилеген тюрлю ёлугъувлагъа, клас сагьатлагъа, ата-ана булан болмагъа тюшеген ишлеге аслу тергевюн бакъдыра.Шо якъдан олар белгили байрамлагъа да тындырыкълы кюйде онгарылалар. Олар оьтгереген чараларда охувчулар Ватанын сюймеге, уллулагъа абур этмеге уьйренелер, чебер китаплагъа иштагьланалар.

Патибийке Умарова буссагьат охувчуланы ЕГЭ-ни сынавундан оьтмеге гьазирлеп тура. Ол школада да, уьюнде де охувчулар булан иш гёре.

А. МАМАЕВ,

Оьр Къазанышдагъы 1 номерли

орта школаны завучу.


Авторизация
*
*
Регистрация
*
*
*
Согласны с условиями сайта?
Генерация пароля