Магьачкъала шагьардагъы 11 номерли гимназияда шолай шартлар яратылгъан деп айтмагъа ярай. Къайсы дарсны береген муаллим де, алдын ерли гьазирлик гёрюп, дарсны барышын къужурлу тизмеге бола. Бу школада ана тил ва адабият дарсланы береген Маккаханым Абдурашитова – янгы-янгы методика ёлланы оьз сынавунда къоллайгъан муаллимлени бириси. Ол шагьар школада охувчуланы ана тилге ва адабиятгъа сюювюн артдырмакъ учун къолундан гелеген бары да имканлыкъланы къоллай деп айтмагъа ярай.

Маккаханым Салаховна оьзю де муаллим гьисапда оьр охув ожакълар ва илму институтлар оьтгереген гьар тюрлю чараларда ортакъчылыкъ этмей къоймай. Ону А. А. Тахо-Години атындагъы педагогика институтну ва муаллимлени билимлерин камиллешдиреген институтну илму къуллукъчулары булан тыгъыс ишчи аралыкълары бар.

Сонг да, Магьачкъаладагъы 11 номерли гимназия къумукъ тилден ва адабиятдан дарслар оьтгеривде сынав топлайгъан ва алышдыра­гъан илму ожакъ санала. Шо муратны гёз алгъа тутуп, мунда бары да дагъыстан тиллерден дарс береген муаллимлер савлай республикадан гелген иш ёлдашларыны алдына чыгъып ачыкъ дарслар оьтгере, иш сынавун арагъа чыгъара.

Мисал учун айтгъанда, бу охув йыл да шолай болду. Маккаханым Салаховнаны ачыкъ дарсына гелген муаллимлер сынав алышдырмагъа болдулар. Ол охувчулары булан дарсны барышында гьар тюрлю методика ёлланы, оюнланы, чечеген ёммакъланы къоллай, охувчулар булан бирче кроссвордланы чече. Ол бу охув йылны башында Магьачкъаладагъы бары да школаланы арасында юрюлген «Школада мультимедия дарсны юрюлеген къайдасы» деген ярышда алдынлы ерге чыкъмагъа болгъан.

Маккаханым Салаховнаны уьстюнлюклери шону булан тамамланып къалмай. Ол дарс береген охувчулар Аният Мамакъаева, Бурлият Абдурашитова, Магьаммат Абдуллаев, Райгьанат Сунгурова, Айна Шихшабекова, Бурлият Алиева, Зумрут Боташева, Маликат Боташева ва оьзгелер шагьарны ва республиканы оьлчевюнде ана тилден ва адабиятдан оьтгерилеген олимпиадаларда, ярышларда алдынлы ерлеге чыкъмагъа болгъан.

Бу охув йылны ичинде Маккаханым Салаховнаны касбу яшавунда дагъы да сююнчлю агьвалат болгъанны эсгермей къойсакъ, тюз болмас. Ол Микайыл Абуковну «Гюз» деген асарына гёре 3-нчю класда ачыкъ дарс оьтгерген.  Дарсны алдына салынагъан муратлагъа гёре дарсны тийишли даражада оьтгерген сонг, гьалиги талаплагъа къыйышывлу этип  онгаргъан. Айтагъаныкъ, савлай дарсны барышын видеогъа чыгъаргъан. Дарсны барышында ол гюзге ба­гъышлангъан шиъруланы, йырланы, айтывланы ва аталар сёзлени, гьалиги мультимедия техниканы уста кюйде къоллап билгенине Магьачкъала шагьарны билим берив управлениесини касбучуларыны янындан огъар оьр даражада багьа берилген. Юрюлген ярышны арты булан Къазан шагьарда «Мультимедия дарс – билим беривде янгы имканлыкълар» деген аты булангъы регионара ярышда Маккаханым Салаховна Абдурашитова юрютген дарс биринчи ерге чыкъмагъа болгъан.

Бу агьвалат – муаллимни яшавунда инг шат мюгьлетлени бириси. Себеби де, муаллимге регионара ярышда биринчилей ортакъчылыкъ этмек ва алдынлы ерге чыкъмакъ касбусунда алгъа багъып талпындырагъан ругьланывланы бириси болуп токътай. Интернетден таба огъар шо уьстюнлюкню шагьаты болагъан диплом да гелген. Биз де даим алгъа багъып деген сёзлени тюбюнде сютдей ана тилни охувчулагъа сингдирип бажарагъан Маккаханум Салаховнагъа дагъы да уьстюнлюклеге етмекни ёрайбыз.

 

 

 

 

Б. Оьлмесова.

СУРАТДА: Маккаханым Абдурашитова.