ТАБИАТЫ ТАЗА УЛАН

Гертиден де, инсан – табиатны жан айырмас бир бёлюгю. Гьажимурат Абдуллаев отланы-оьсюм­люклени аяп, асырап биле, оланы яшырылгъан сырларын ача ва инсангъа къабунгъан аврув-сыркъавгъа эм этип пайдаландыра. Чечеклер булан сыр чече, тереклер булан бетге-бет, тенге-тенг сёйлей.

Гьажимурат таза къумукъ къылыкъ – хасиятдан ясалгъан. Оьзден болса да, оьктем тюгюл.Къылына тийсенг, къылычына харманыр…

Ол агъачкъомуз согъувну сигьручусу. Къаз къанатдан алай арив зыбызгъы-зурнай этип, таъсирли макъамлар согъуп юрюйгенлер де бола чы. Гьажимурат къайсы агъачдан да къомуз ишлеп, огъар жан салып биле. Ону оьз къолу булан этген бир тигим тирсекчеки агъачкъомузуну ангына тынгласанг, не гёрдюм – не гёрмедим деп эсинге гелир. Ол сокъгъан англар къургъакъ еллени сагъынч­лы шыбышларын эсге сала, атъёкъкъушну сигьрулу сеси болуп юрекни назик бавларын чалдырта, гьисин гьалеклендире, ойната.

Умутсуз авругъан адамгъа алдынгъылар къомузчу чакъырта болгъан. Макъам чалмакъ, йыр айтмакъ, шиъру яратмакъ –адамны табиатына арив барышагъан асил аламатлардан.

Кёп тармакълы пагьмусу булангъы Гьажимурат Абдуллаевни бишген-тюшген чебер шиъруларын къумукъ газетни охувчуларына кёп сююп таклиф этемен.

Казим КАЗИМОВ.

Гьажимурат АБДУЛЛАЕВ

БАРЛЫГЪЫМА БАЗЫГЪЫЗ

Абзарым эркин тюгюл,

Къарыш ярым уьюм де.

Къонакъны къаршылайман

Шо алдагъы кююмде.

Боламан ажайып хош,

Базып гирсенг уьюме.

Жанагьым бар боппо-бош

Тобукъ уруп бийиме.

Бийийик чанг чыгъарып,

Бийимеген гюн гёрмес.

Бийимейген улангъа

Бир гьонкъа деп къыз бермес.

Яллатып харс урайым,

Гелип аякъ языгъыз.

Бир аякъдан турайым,

Барлыгъыма базыгъыз!

СЮЮВНЮ ЮГЮ АВУР

Ахтара туруп, ялсыз

Юрегим болгъан, гьалсыз.

Гёнгюлде ер къоймасанг,

Болажакъ лап амалсыз.

Юрегимни алып гет,

Мурадыма етейим.

От-оьртенге салып гет,

Сенсиз ону нетейим?!.

Бавурум ярма, досум,

Оьзгеге барма, досум.

Мен гёзлеген насиплер

Бары да сагъа болсун.

Сюювню югю авур,

Насипге, юрек сабур.

Сюювю азгъан дюнья–

Бош абзар, тунукъ къабур.

ЕТТИ ЮЛДУЗ

Уьлкерде – етти юлдуз,

Етти пердели къомуз.

Макъамда – етти аваз,

Еттиси де магъа аз.

Солтанжая – етти тюс,

Солгъусунда етти гьыз.

Тенгири сююп берген,

Авлетлерим – етти къыз.

Гитарамда – етти къыл,

Чалмагъа чертип-чююп.

Къарап къалдым етти йыл,

Етти къызардаш сююп.

Ерлешип етти ерде,

Аргъанда – етти перде.

Етти къызардашым бар

Юрегимдеги тёрде.

ЯШЛЫКЪ ЯТГЪАН ГЮМЮШДЕЙ

Оьгейлер оьзге гёре,

Къарайгъан гёзге гёре.

Яшны гёнгю ачыла

Айтылгъан сёзге гёре.

Оьгейи-оьзю болмас

Яшланы арасында.

Бир йимик сюйме герек

Оланы барысын да.

Яшгъа арив сёз де – бал,

Йылы сёзден юрек ял.

Насигьат, ёрав булан

Яшны герти ёлгъа сал.

Яшлыкъ ятгъан гюмюшдей,

Башлап тувгъан баладай.

Гюмюшейген гамишдей,

Бийик шиша къаладай.



НАСИГЬАТ



Тувмас ишге сёз берме,

Талаш борчну тез берме.

Къыйынынгны гьагъын ал,

Таза гьаллы ягъын ал.

Хапмас итдей гьаплама,

Ишсиз ине саплама.

Чирип битген гёлекге

Негьакъ ямав къаплама.

Этер ишинг эрши этме,

Терсинг халкъгъа гёрсетме.

Гьалал яша, гьалал сюй,

Сутурлукъну башын тюй.

ДЮНЬЯГЪА УЬЛЕШЕМЕН

Аваздан макъам къуруп,

Сёзден сатыр эшемен.

Сатырланы уьюрюп,

Макъамгъа гелешемен.

Етти ангдан чарланып,

Чувлукъну тоза йырлар.

Бу йырны тавушуна

Чарчымлы дослар тынглар.

Аваздан макъам къуруп,

Сёзден сатыр эшемен.

Жыйып-терип къойсун деп,

Дюньягъа уьлешемен.

Авторизация
*
*
Регистрация
*
*
*
Согласны с условиями сайта?
Генерация пароля