Сурат этивню пагьмулу устасы

Выставканы
ача туруп, Къумукъ театрны чебер ёлбашчысы Айгум Айгумов булай деди:

–Биз бугюн
Дагъыстанны ат къазангъан художниги, ДГПУ-ну дарс беривчюсю Арслангерей
Акавовну 70 йыллыкъ юбилейине багъышлангъан выставканы ачма жыйылгъанбыз.
Арслангерей кёп йылланы узагъында Къумукъ театрда чалыша. Биз салгъан
спектакллени бе­зендире, декорацияланы эте. Оьзюню художник санияты,
пагьмусу булан театр саниятында да гёрмекли ер тута. Университетде, живописни
кафедрасында дарслар юрюте. Бу выставканы биз ону юбилейине онгаргъанбыз. Ахшам
буса Арслангерей безендирген «Бай къатын» деген спектакль гёрсетилежек. Биз де
юбилярны къутлайбыз, анадаш театры учун этеген ишинде, яратывчулукъ ишинде
уьстюнлюклер ва савлукъ ёрайбыз. Сёз берме сюемен Дагъыс­танны художниклерини
союзуну председатели Къурманали Магьамматовгъа.

                      

–Дагъыстанны художниклерини союзуну атындан, бары да
художниклени атындан Арслангерей Акавовну юбилейи булан гьакъ юрекден
къутлайман, – деди ол. – Огъар ба­гъышлап арив сёзлер язгъан адресибиз де бар.
Арслангерей оьзю этген яратывчу ишлери булан бизин де, халкъны да сююндюре. Ол
этген суратлар тыш пачалыкъланы коллекцияларында да сакълана. Ол бажарывлу
касбучу гьисапда Къумукъ театрда да ишлей. Оьзюню билимин, пагьмусун яш
наслугъа уьйретме къаст эте. Гьакъ юрекден къутлайбыз. Правление сизге ял
алмакъ учун путёвка да савгъат эте. Уьстюнлюклер ёрайман.

Ондан сонг юбилярны Дагъыстанны ат къазангъан художниги
Хайрулла Къурбанов, режиссёр Ислам Казиев ва оьзге къаравчулар къутлады.

Оьз гезигинде Арслангерей Акавов выставкагъа гелгенлеге
гьакъ юрекден баракалла билдире туруп, оьзю этген суратланы яртысындан да кёбю
Петербургда болгъан выставкадан къайтмагъанны ва гележекде толу кюйде бу
выставкада ерлешдирилежекни айтды.

 

 

Я. БИЙДУЛЛАЕВ.

СУРАТЛАРДА: А. Акавов; ол этген сурат.


Авторизация
*
*
Регистрация
*
*
*
Согласны с условиями сайта?
Генерация пароля