Дюньяда нече тюрлю касбу да бар, тек шоланы арасында муаллимни касбусу бек къыйындыр деп ойлашаман. Неге тюгюл де, муаллимлер охуп-язып билмейген яшланы охума ва язма уьйрете, билим бере, гьар яшны тюз ойгъа салма къарай, демек, оланы яшавгъа гьазирлей. Муаллимлер ишинде нече тюрлю къыйынлыкълагъа, сююнчлеге ёлугъа. Шолардан оьтмек учун юрекге сабурлукъ, чыдамлыкъ, усталыкъ тарыкъ. Олар яшланы экинчи атасы ва анасы десе де ярай.
___________________________________________________________
Мен буссагьатгъы вакътиде оьзюм охугъан 2 номерли Паравул орта школада ишлеймен. Мунда мен школагъа биринчи гелген яшлагъа биринчи муаллим болдум ва оьзюмню биринчи муаллимимни ва оьзге тюрлю муаллимлени де иши нечик къыйынлы экенни англадым.
Илмутдин Насрутдиновну атындагъы Паравулдагъы школада муаллимлеге яхшы ишлемек учун кёп имканлыкълар тувулунгъан: къураллар булан таъмин этилген кабинетлер, компьютер ва проектору булангъы класлар, методика материаллар ва башлапгъы класлагъа айрыча, янгы билим берив къайдалагъа гёре къурулгъан имканлыкълар бар. Шо буса школаны директору Арсанали Абакарович Валиевни талабы булан этилинген. Арсанали Абакарович оьзю – бек тарбиялы, эдепли, муаллим ишде уллу сынаву булангъы касбучу ва савлай юртну ичинде де уьлгюлю ва низамлыкъгъа аты чыкъгъан адам, нечесе йыллар школаны тарбиялав якъдан завучу болуп да ишлеген.
Школада башлапгъы класланы завучу, буссагьатда да дарс берип турагъан Жаминат Алавутдиновна Юсупова билим беривден къайры, охувчуланы патриот ругьда тарбиялавгъа бек агьамият бере. Ол: «Гьар муаллим оьзю инг башлап оьр къылыкълы, эдепли ва билимли болмагъа герек», – деп кёп эсгере бола.
Школаны башлапгъы класларыны муаллимлерини кёбюсю – загьматны ветеранлары ва бай сынаву булангъы муаллимлер. Шо саялы яш муаллимлерине педагогика касбуда сынав алышдырма, уьйренме, уьлгю алма да адамлар бар.
Башлапгъы школада ана тилни айлыгъын оьтгеривге бек агьамият бериле. Сапият Давутовна Ражабова «Ана тил» деген ачыкъ чара оьтгерди. Жаминат Алавутдиновна Юсупова охувчулары булан «Лайла ва къапуста» деген сценарийни сагьнада салып гёрсетдилер. Насия Арсаналиевна Магьамматова, Мадина Магьамматалиевна Алиева, Сапият Давутовна Ражабова, Аминат Абдулмуслимовна Ибрагьимова «Мени азиз элим» деген темагъа арив ачыкъ класлыкъ сагьатлар оьтгердилер.
Муаллимлер Жаминат Алавутдиновна Юсупова, Рукъуят Бургьанитдиновна Мугьутдинова, Руманият Салимсолтановна Ибрагьимова, Барият Магьамматалиевна Мамасиева, Мадина Магьамматалиевна Алиева, Сапият Давутовна Ражабова 23-нчю февральда «Гьыгъыз, уланлар!» деген темагъа багъышлангъан ачыкъ чаралар оьтгерди.
Аминат Абдулмуслимовна, Сапият Сиражутдиновна, Айшат Абдулгьаниевна, Рукъуят Бургьанитдиновна, Барият Магьамматалиевна, Надия Магьамматовна, Мадина Магьамматалиевна, Насия Магьамматовна ва оьзгелери 8-нчи март байрамны 1-нчи ва 4-нчю класлары булан бек арив оьтгерди.
4 «б» класны охувчу къызы Анаш Алавутдинова, савлай школа оьлчевюнде оьтгерилген «Мени анам» деген темагъа сочинение языв конкурсда биринчиликни алып, артда районда оьтгерилген конкурсда да ортакъчылыкъ этди. Яш муаллимлер Жаминат Ибрагьимова ва Сапият Чамсаева, Руманият Ибрагьимова ва Аминат Ибрагьимова янгы къайдалар булан дарсларын юрютмек учун оьзлени кабинетлерине проекторлар ва макънатис доскалар алдылар.
Май айны 9-нда савлай школаны муаллимлери, охувчулары, башында школаны директору Арсанали Валиев де булан парадда ортакъчылыкъ этди. Шо да яшланы патриот ругьда тарбиялавда, тарихни аямакъны гьакъында уллу дарс болду. Школаны директору
ва юртну тамазалары, дав йылланы яшлары охувчулагъа уьстюнлюкню нечик къыйынлы гелгенини гьакъында эсде къалардай хабарлар айтдылар.
Охув йылны ахыры етишди, тек муаллимлерибиз гьали де арымай-талмай оьзлени ишин узата. Къайсын бирин эсгерейим, мундагъы муаллимлени ишин санап айтып къойма да къыйындыр.
Сёзюмню артында булай коллективни бир татывлу агьлю йимик гелишдирип, ёлбашчылыкъ этип бажарагъан директору Арсанали Абакаровични ва башлапгъы класланы завучу Жаминат Алавутдиновнаны, савлай коллективни охув йылны ахыры булан къутлайман ва яхшы савлукъ ёрайман.
Жаминат Ибрагьимова.
