Бугюнлерде Кюсюм Халилова Гьели юртдагъы маданият къаланы яратывчулукъ ёлбашчысы болуп ишлей. Маданият тармакъда загьмат тёкген 45 йылны узагъында ол кёп уьстюнлюклеге етишме, кёп пайдалы ишлер этме бажаргъан.
Гьар йыл Гьели юртну маданият къаласыны къуллукъчулары район ва республика оьлчевде оьтгерилеген фестивалларда, башгъа маданият чараларда савгъатлы ерлени алып юрюген. Кюсюм Халилованы ёлбашчылыгъы булан оьтгерилеген бары да маданият чаралар, ёлугъувлар милли адатларыбызны сакъламакъ, яшёрюмлени ругьландырмакъ, юртун, ватанын сюйдюрмек мурат булан оьтгериле.
Кюсюм Халилова оьзю булан ишлейген ёлдашларына да, башгъа насигьат кёмек тарыкъ болуп гелген адамлагъа да гьайлы янашып, оьзюнден болагъан кёмекни этмеге гьар заманда да гьазир.
Биринчилей бизин Къарабудагъгент райондан Кюсюм Бийболатовна Гьелиде «Навруз» байрамны оьтгерген эди. Байрамгъа юртну халкъы, савлай республикабыздан, райондан къонакълар гелген эди.
Шолай да, «Юртну гюню», «Гьели юрт школаны 80 йыллыгъы», «Давну яшлары», «Юрек юртну сагъына», «Биз Россия буланбыз», «Маданиятны йылы» ва башгъа кёп тюрлю байрамланы уллу усталыкъ булан оьтгерди.
Кюсюм Халилованы гьаракатчы чалышыву районну ва республикабызны янындан да тергевсюз къалмады. 1995-нчи йылда огъар «ДР-ни маданиятыны ат къазангъан къуллукъчусу» деген гьюрметли ат берилди. Бу савгъатны, гертилей де, ол оьзюню къайратлы загьматы булан къазангъанына бирев де шеклик этмежек.
Кюсюм Халилова яратгъан «Юн булкъа» ва «Гьабижай булкъа» деген сагьна гёрсетивлер фольклор фестивалларда гёрмекли ерни тутгъан ва гьар йыл республика оьлчевде оьтгерилеген фестивалларда ортакъчылыкъ эте.
Маданият тармакъда ишлей туруп, ишинден айрылмагъан кюйде Кюсюм Халилова насипли агьлю къургъан ва беш авлетни оьсдюрген. Оланы гьариси яшавда оьз ерин тапгъан ва агьлюлери булан насипли яшай.
Мени улланам Кюсюм Халиловагъа багъышлап Рашия Агъаева шиъру да язгъан.
***
Сен тийишли къатынсан
Тамашагъа къалардай.
Эки якъдагъы юртлар
Сенден уьлгю алардай .
Нече йыллар сагьнада
Тюрлю роллар ойнадынг,
Районда гьеч биревню
Алгъа чыкъма къоймадынг .
Гьакъ юрекден халкъынга
Гьалал ишлер этгенсен,
Гьар-бир юрекге тутгъан
Муратлагъа етгенсен .
Школа байрам этип,
Къувандырдынг яшланы.
Ял этдинг хыйлы-хыйлы
Ойдан толгъан башланы.
Навруз байрам оьтгердинг,
Юртну халкъын да жыйып.
Кеп этди гелген халкъынг,
Йыр йырлап, арив бийип.
Дав йылланы эсгердинг,
Пашман да болдукъ, шат да.
Бар зат сени эсингде –
Унутулмай бир зат да.
Гьелини тюп ягъында
Маданият къаласы,
Юрт культура ишлени
Дюрсен, Кюсюм, анасы.
Садикден башлап мени
Къучагъынга алгъансан.
Яшавда мен сюеген
Йыбанч ёлгъа салгъансан.
Аявлу Кюсюм бажив,
Саппа-савлай алтынсан.
Оьр атгъа ес болмагъа
Сен тийишли къатынсан!
Уркимат Халилова.
