Савбол, школа!

Хасавюрт район

 

Савлай уьлкебизде йимик, Хасавюрт районну школаларында да ахырынчы зенг къагъылды. Шо зенг район­дагъы 53 школада 9-нчу ва 11-нчи класланы битеген 2633 яшгъа ахырынчы къагъыла. Экзаменлерден сонг олагъа янгы яшав башлана.

 

Яшлагъа охума тюшмек учун генг ёллар ачыла. Олагъа гьали оьзлени юреги ушатагъан охув ожакълагъа тюшме ва арадан заман гетип, касбучулар болуп чыкъма имканлыкълар болдурула.

Хасавюрт районну билим берив управлениесини начальниги Къырымсолтан Къабардиев яшлагъа исси сёзлер айтды.

– Бугюн сизин байрам ва къуванчлы гюнюгюз, яшавда шулай гюнлеригиз кёп болсун, – дей Къ. Къабардиев. –Экзаменлер берип битгенде де, охуп битип касбучу болуп ишге тюшгенде де, агьлю къуруп яшайгъанда да. Мен сизин шат гюнюгюз булан гьакъ юрекден къутлай туруп, экзаменлени яхшы къыйматлагъа бермекни ёрайман. Неге тюгюл де, сиз охуп битип, герти касбучулар да болуп, бугюн ишлейгенлени орнун тутма герексиз.

Бугюн мен сизге билим берген муаллимлеге де баракалла билдирме сюемен. Олар гиччи яшны биринчи класгъа ала, 11 йылдан билимли этип чыгъара. Муаллимлер янгыз билим берип къоймай, уьлкени болажагъыны кюрчюсюн сала. Мен сизин дагъы да къутлайман ва яшавугъузда яхшы адамлагъа къаршы болуп, яхшы янларын танглап уьстюнлюклеге етип яшамакъны ёрайман…

Сонг яхшы охугъан яшлагъа ва оланы ата-аналарына Гьюрметлев грамоталар ва баракалла кагъызлар тапшурулду. Гьар школада да шо гюн яшланы эсинде даимликге къалар йимик мукъаятлы программалар гьазир этилген эди.

Къонакъбий


КЪОНАКЪБИЕВ
.

 ·        Бабаюрт район

 

Яшавунда эсде къалажакъ ахырынчы зенг гене къайтып янгы яшавгъа, уллу яшавгъа алынгъан биринчи абатны гёз алгъа гелтире. Шогъар байлавлу байрам чаралар Бабаюрт районну бары да школаларында къурумлу оьтдю. Байрам чаралагъа тюнегюнгю охувчу яшланы шагьра ёлгъа узатмагъа яшланы ата-аналары, муаллимлери, къардаш-досу жыйылгъан эдилер.

 

Районну уллу юртларыны бириси Адил Янгыюртда да шо гюн байрам гьис этиле эди. Юрт школаны посагъа­сындан чыкъгъан, онда мугь­кам билимлеге ес болуп, яшавну энишин де, оьрюн де сынамагъа болагъанланы санаву аслам. Оьзюню узакъ тарихинде эсгерилген школадан алимлер де чыкъгъан, врачлар да, агрономлар да, лётчиклер де. Бу йыл буса о 65-нчи керен охувчуларыны алдында яшавну дериялы къапуларын ачды, школада 65-нчи керен ахырынчы зенг къагъылды.

Шо гюн яшавну шагьра ёлуна 84 охувчу биринчи абатын алдылар.

Байрамны ача туруп, школаны директоруну охув-тарбиялав ишлерине къарайгъан орунбасары Аминат Къочкъарова охувчуланы ва оланы ата-аналарын гьакъ юрекден къутлады.

– Бу гюн бизин школа учун айрокъда уллу байрам, – деди А.Къочкъарова. – Биз узатагъан­ охувчулар учун школабызда 65-нчи керен ахырынчы зенг къагъылажакъ. 65 йылны боюнда, класдан-класгъа узата туруп, бизин школабызда алгъан мугькам билимлери булан уллу Ватаныбызгъа танылгъан охувчуларыбыз булан биз гьаман да оьктем болабыз. Бугюн биз оьзлени узатагъан­ алты яшёрюмню гележек яшаву гьаман да бугюн йимик шатлыкъда гетмекни, олар бир де оьз школасын, оьз юртун унутмай, Ватанына амин болуп яшамакъны ёрайман.

Оьзюню сёйлевюнде школаны директору Ризван Оьлмесов билимде ва тарбиялавда етишген уьстюнлюклери учун охувчуланы гьюрметлев грамоталар булан савгъатлады, оьзюнден алда сёйлегенлени къутлавларына къошулуп, охувчуланы гьарисини яшаву гьаман да ярыкъ, гёнгю де ачыкъ болмакъны ёрады.

Байрамда охувчуланы биринчи муаллими Р.Элдарова, клас ёлбашчысы Павзия Арсланова сёйледилер. Олар оьзлени сёйлевлеринде охувчуларына шагьра ёлунда уьстюнлюклер ёрадылар ва гьаман да олар учун аявлу школасыны эшиклери ачыкъ болажакъны билдирдилер. Охувчулар да 11 йылны боюнда оьзлер учун ата да болгъан, ана да болгъан, къыйынына табылгъан муаллимлерине баракалла билдирдилер.

з.

 

·        Буйнакск район

 

Буйнакск районда бу йыл 1 минг 266 охувчу яш учун май айны 23-нде ахырынчы зенг къагъылды. Школаны 11-нчи ва 9-нчу класларын битдиреген охувчулар учун кёпден къаравуллангъан гюн эди. Буйнакск районда 266 охувчу 11-нчи класны, къалгъан 1000 охувчу 9-нчу класны тамамлады.

 

Районда ерлешген ва иш гёреген 36 билим берив ожакъны барысында да ахырынчы зенгни байрамына байлавлу шатлы чаралар оьтгерилди. Онда муаллимлер, охувчулар ва оланы ата-анасы ортакъчылыкъ этди. Гелген гьюрметли къонакъланы арасында буса Буйнакск район администрацияны вакиллери, район жыйыныны депутлары да ортакъчылыкъ этди.

Шо гюн Тебён Къазанышдагъы 3 ва 4 номерли школаларда оьтгерилген ахырынчы зенгни шатлы байрамында Буйнакск районну башчысы Камил Изиев ва билим беривню район управлениесини ёлбашчысы Айида Залимханова ортакъчылыкъ этди.

Камил Изиев, яшланы къутлай туруп, булай деди:

– Бугюн сиз яшавну ян­гы канзисине абат ала­гъаныгъыз­ саялы, шатлы гюн буса да, школа булан савболлашагъангъа юзлеригизде пашманлыкъны уч­гъунлары да гёрюне. Сиз бугюн янгы яшав башлайсыз ва билимлеригизни узатмакъ учун янгы канзиге абат аласыз. Алдыгъызда билимлеригизни гьасиллерин жамлашдырагъан экзаменлер де бар. Шо да сизин учун уьстюнлю кюйде оьтежегине инанаман. Бугюн сиз гележекдеги касбугъуз­ну сайлавда яхшы теренден ойлашма герексиз. Алдыгъызгъа уллу муратлар салмагъа ва оланы яшавгъа чыгъармагъа къоркъмагъыз. Мен сизге уллу уьстюнлюк­лер ва инамлыкъ ёрайман. Оьзюгюзню яхшы ишлеригиз булан школагъызны, гиччи ватаныгъызны ва бизин республикабызны абурун артдырмакъны къастын этигиз!

Охувчуланы Айида Залимханова да къутлады ва олагъа экзаменлерде уьс­тюнлюклер ёрады. Сонг ол Бютюнроссия ва республика оьлчевде оьтгерилген гьар тюрлю конкурсларда ортакъчылыкъ этип, уьстюнлюклер алгъан муаллимлеге ва охувчулагъа дипломлар ва грамоталар тапшурду.

Яшлар буса 11 йылны узагъында авлетлерине йимик янашгъан тарбиялавда ва билим беривде къаст этген кёп сюеген муаллимлерине ба­гъыш­лап баракалла сёзлер, шиърулар айтды ва йырлар йырлады. Оланы 1-нчи класны охувчулары да къутлады.

Патимат БЕКЕЕВА.

 

·        Хумторкъали район

 

Май айны 21-нде, республиканы бары да орта билим береген охув ожакъларында йимик, Хумторкъали районну школаларында да ахырынчы зенгни байрамы шатлы кюйде оьтгерилди. Шолай байрам шатлыкълар районну Тёбе посёлогунда Дагъыстанны ат къазангъан муаллими Салавутдин Исаевни аты къоюлгъан орта школада да болду.

 

Яшланы да, оланы ата-аналарыны да даимге эсинде къалагъан ахырынчы зенгни байрамына жыйылгъанланы юзлеринде шатлыкъ, къуванч­лыкъ булан бирге пашман кюстюнювлени де гьис этмеге бола эдинг. Бугюн он бир йыл билим алгъан, охугъан школасы, муаллимлери булан яшлагъа савболлашмагъа тынч тюгюл. Яшлар школасы булан савболлаша туруп, эсли яшавгъа биринчи инамлы абатын алажакъ.

Школаны абзарында согъулагъан шатлы макъамлар жыйылгъанланы гёнгюллерин бирден-бир де ача, шат эте. Бу йыл школаны битдиреген 11 де къыз ва улан къолларында чечек байламлар да булан сагьнагъа чыкъгъанда йимик, канзи башда тизилип токътайлар.

Тёбе орта школаны директору Барият Османова бары да муаллимлерини атындан 11-нчи класны битдирип чыгъагъан къызланы ва уланланы ва оланы ата-аналарын ахырынчы зенгни байрамы булан къутлай туруп, бирикген пачалыкъ экзаменлени уьстюнлю кюйде берип, оьр охув ожакълагъа тюшмекни гьакъ юрекден ёрады. Бу йыл 11 класны 11 яш, 9 класны буса 84 яш битдире.

Ахырынчы зенгни байрамына гелген къонакълардан Хумторкъали район администрацияны башчысыны заместители Марат Жанбалов, Тёбе посёлогну администрациясыны башчысы Магьамматкамил Макашарипов, районну билим берив управлениесини къуллукъчусу Дина Апавгьажиева яшланы ва оланы ата-аналарын ахырынчы зенгни байрамы булан къутлап, кёп исси сёзлер айтды.

 

Жават ЗАКАВОВ.

 

 

Авторизация
*
*
Регистрация
*
*
*
Согласны с условиями сайта?
Генерация пароля