Макътавгъа лайыкълы муаллим




Шолай, оьзюню тюнегюнгю охувчулары булан оьктем болуп, олар оьзюне этеген абур-сыйдан тоймай яшайгъан, савлай оьмюрюн яшланы  герти ёлгъа салмакъ учун багъышлагъан муаллимлер булан янаша школада ишлемек, магъа да, мени йимик оьзге яш муаллимлеге де оьктемликдир деп ойлашаман. Шолай муаллимлер гьалиден 30 йыллар алдын мени алдымда билимлени дюньясын ачгъан, ону посагъасындан чыкъгъан сонг да, къысмат буюруп, жан тартып дегенлей, артдагъы 12 йылны боюнда магъа гьаман да уьлгю болуп тургъан тюнегюнгю муаллимлер булан бирче ата юртумдагъы школада «муаллим» деген сыйлы касбуну юрютегениме оьктем болмагъа гьагъым бар.

Яшда гёрген яшынмас дей къумукълар. Мен оьзюню гьакъында язмагъа сюеген Рамиз Салимханович Вагьитов бизге дарс береген вакътилер гьали де, арадан 18 йыллар гетген буса да, гёз алдыма гелип гете. Гьар айтагъан сёзюн он керен ойлашып, терен билими ва иш сынаву булан бизге береген дарслары унутулмай. Биз, ону охувчулары, ол бизин  ата-аналарыбызгъа да билим берген саялы да тюгюл,  ону оьз касбусун жаны-къаны булан сюегенлигине гьюрмет эте эдик. Ол шо гьюрметге ва сыйгъа лайыкълы да дюр. Ол школада  муаллим касбуну юрютегенли арадан 60 йыл гетген буса да, бугюн де оьзюню сююмлю касбусуна гьалал къуллукъ эте. Бизге, ону охувчуларына, бугюн ону яннавурунда да туруп, ол берген мугькам билимлени янгы наслугъа  бермек – уллу оьктемлик.

Рамиз Вагьитов 1937-нчи йылда Бакю шагьарда тувгъан. Яшлайына ол Дагъыстангъа, Адил Янгыюртгъа геле. Ол шо йылларда юртда ачылгъан орта школада охума башлай ва 1954-нчю йылда Адил Янгыюртдагъы орта школаны бешге битдире. Шо йылларда районда яхшы билимли адамлар аз болгъангъа ва школалагъа муаллимлер етишмейгенге гёре, школаны янгы битдирген Рамиз Вагьитовну районну Геметёбе юртундагъы орта школагъа муаллим болуп ишлемеге чакъыра.

– Мен гиччи заманымдан берли муаллим болмагъа гьасирет эдим, – дей Рамиз Вагьитов мени булангъы лакъырында. – Школада охуйгъан вакътимде бизге дарс береген муаллимлеге къарап, олагъа сукълана эдим, олар йимик къачан боларман деп ойлаша эдим. Шо саялы да мени школагъа муаллим болуп ишлемеге чакъыргъанда, кёп ойлашмай рази де болдум.

Балики, Рамиз Вагьитов шо ва­кътиде оьзюню къалгъан яшаву бары да школа булан байланажакъны гьакъында ойлашма да ойлашгъандыр. Тек ол оьзю де мюкюр болгъан кюйде, яшда танглагъан ёлу булан бир де янгылышмагъан ва бугюн де ол муаллим экенине оьктем бола.

Оьзюню загьмат ёлун хас билимлер алып башламаса да, Рамиз Вагьитов муаллим касбугъа тез тюшюне ва яш муаллим гьисапда иш ёлдашларыны ва охувчу яшларыны арасында ону абуру арта. Шолайлыкъда, районну къайсы школасында физика-математика дарслардан англавлу муаллим болмаса, шонда Рамиз Вагьитовну бакъдырагъан гьалгъа чыгъа. Ол аз заманны ичинде Геметёбедеги етти йыллыкъ школада, сонг буса Гьасанайдагъы етти йыллыкъ школада загьмат тёге.

Амма яшдан берли оьр билим алмагъа гьасиретлик ону юрегинден минутгъа да таймай ва биринчи имканлыкъ тюшгендокъ, ол оьзюню умутуна етишмеге къасткъыла. Шолай, 1957-нчи йылда Рамиз Вагьитов Дагъыстан пачалыкъ университетни оьзю кёп сюеген физика-математика бёлюгюне охумагъа тюше.

– Охумакъ – мени учун гьаман да леззет болгъан, – дей Рамиз Вагьитов. – Университетде охуйгъанда да мен охувдан къачмай эдим: тынглай, билмегенимни сорай, такрарлай эдим. Демек, оьзюмню умутларыма етишмеге болгъан чакъы къасткъылдым.

Етишме де етише. Шогъар ол 1962-нчи йылда эсгерилген оьр охув ожакъны оьр къыйматлагъа битдиргени де шагьатлыкъ эте. Къолунда къызыл диплому булангъы касбучуну алдына республиканы къайсы школасыны да эшиклери эркинине ачыла. Гьатта оьзю охугъан университетде къалмагъа да таклифлер бола. Амма оьзюню районуна къуллукъ этмекни ювукъ гёре ва къысмат буюруп, терен билимли касбучу гьисапда загьмат ёлун Хамаматюртдагъы орта школада башлай.

Тек ол гьаман да оьзюню юрту учун гьалал къуллукъ этмеге умутлу болгъан. Ону учун юртлу яшлагъа билим бермек – къысмат берген лап да уллу савгъат. Ону шо умуту да яшавгъа чыгъа ва 1963-нчю йылдан башлап, ол Адил Янгыюртдагъы орта школада физика-математика дарсланы бермеге башлай ва бугюнге ерли эсгерилген школада загьмат тёге.

– Мен башлап юртдагъы школагъа гелгенде, – деп эсгере шо йылланы гьакъында Рамиз  Вагьитов, – юртда халкъны билимсизлигин тайдырмакъ учун толу кюйде ишлер юрюле эди. Инг де магъа тамаша тиеген зат, магъа мени атам чакъы юртлуларыма  дарс бермеге тюшегени эди. Оланы бирлери уялып, дарсымдан къачагъан гезиклер де бола эди. Сонг-сонг буса кёплери магъа оьзлени баракалласын да бердилер.

Яшланы тарбиялавда йиберген 60 йыл Рамиз Вагьитов учун бошуна гетмеген. Ол школада яшай, тюз этип айтсам, школа ону булан яшай. Гьар охув гюн ону учун – янгы байрам, янгы сююнч. Буса да, ол оьзю юрт школада йиберген оьмюрюне къарай туруп, ойлаша бола.

– Мен бугюн бир затгъа тамаша боламан, – дей Рамиз Вагьитов.  –  Алда яшлар билим алмагъа, билмейгенин, къайтарып сорап, билмеге, терен илмугъа гьасирет эди буса, бугюн оланы дарслагъа тартып-сюйреп дегенлей юрютмеге тюшеген болуп къалды. Сонг да, йыл сайын, яшланы тарбиялав да осаллаша бара. Шо къаравлар тюз тюгюл экенни, къачан, къайсы девюрде яшамагъа тюшсе де, инг алда кисенгни теренлиги тюгюл, башынгны теренлиги болажакъны англатмагъа къыйын бола бара.

Амма ол кюстюнмей. Ону булан институтда бир партада олтуруп, ону булан бирге билим алгъан институт ёлдашларыны илму ёлунда уьстюнлюклеге етишгенлери де ёкъ тюгюл. Ол оьз заманында олар булан тенгге-тенг илмуну ёлунда гётерилип, бугюн йымышакъ шанжалда да олтуруп, оьрден тюпге къарамагъа да болар эди. Имканлыкълар да болгъан. Рамиз Вагьитов оьзю де эсгереген йимик, илму ёлну ол къыйын, кёбюсю гезик­лер баракалласыз муаллим касбугъа алышдыргъан. Чинкдеси, ол гьалиден кёп йыллар алдын этген танглавгъа да гьёкюнчлю тюгюл.

Билим берив тармакъда етишген уьстюнлюклери саялы ол кёп керенлер гьюрметлев грамоталар булан савгъатлангъан. Рамиз Вагьитовгъа «Баш муаллим», «Муаллим-методист» деген белгилер берилген, ол «Загьматны ветераны», «В.И.Ленинни 100 йыллыгъы» деген юбилей медаллар булан савгъатлангъан.

Инг де насипли адам кёп адамны насипли этген адам дей. Билим беривню отличниги Рамиз Вагьитовну буса, шолай болгъанда, толу кюйде насип­лилени сыдыраларына къошмагъа ярай. Ону кёмеклиги булан яшавда оьз насибин тапгъанланы сиягьы узун ва олар оьзлени насипли къысматы саялы бир гёнгюлден оьзлени сююмлю муаллимине баракалла билдирелер.

 

 

 

Герейхан Гьажиев,

бизин мухбирибиз.

 

Суратда: Р. Вагьитов.

Авторизация
*
*
Регистрация
*
*
*
Согласны с условиями сайта?
Генерация пароля