Къурчакъ театр, яхшы ёл!

«Ёлдаш» газет де шо масъалагъа гьайлы янашды. Алав Алиевни колонкасы чыкъгъанда, бизин тыш авторларыбызны, оьз мухбирлерибизни артдагъы эки йылны ичинде шогъар байлавлу макъалалары чыгъып турду.

Кёп къыйынлыкълардан оьтюп, къурчакъ театрыбыз къурулуп, муна оьтген жума Дагъыстанны халкъ шаири Аткъайны «Яхшылыкъгъа –яхшылыкъ, яманлыкъгъа – къаршылыкъ» деген асарына гёре биринчи, къабул этив спектаклин гёрсетди. Шогъар къумукъ интеллигенцияны вакиллери, алимлер, журналистлер, композиторлар, Кахулай школаны бешинчи класыны охувчулары, муаллимлери ча­къырылгъан эди. Спектакль бек къужурлу юрюлдю деме ярай. Айрокъда охувчу яшлагъа бек таъсир этди. Къурчакъланы гьар чыгъышына, гьар сёзюне олар харс уруп, кюлеп, уллу леззет алды. Яшланы бу гьалын гёрюп, уллулар да къувана эди. Къурчакъланы келпетин гёрсете туруп, къумукъ театрны артисткалары Зугьра Межитова, Асият Гьажиева, Женнет Исрапилова, артистлер Ибрагьим Атаев, Солтан Идрисов жыйылгъанланы къурчун къандырып, арив ойнадылар.

Къурчакъ театрны къурув масъалаланы бойнуна алып айлангъан Дагъыстанны маданиятыны ат къазангъан къуллукъчусу, «Къумукъ ожакъ» деген жамиятны председатели, «Къурчакъ театр» деген проектни ёлбашчысы Салавутдин Мусалаев булан лакъыр этебиз.

–Биз бугюн этип турагъан гьаракат миллетибиз учун бек тарыкъ,–дей ол.–Россияда милли тиллени сакълавгъа ва оьсдюрювге Президентибиз В. Путин де, Дагъыстанны Башчысы Р. Абдулатипов да бек агьамият бере. Бизин яшларыбыз къумукъ ана тилинде айрокъда шагьарларда сёйлеп болмайгъан болуп баралар. Шону учун да къурчакъ театрны къурув бизин учун агьамиятлы масъала болуп токътай. Мурат Аджини юбилейин оьтгерегенде, Салав Алиев шу масъаланы гётерген эди. Заман гетип, интеллигенциябыз жыйылып , къурчакъ теа­трны къурув масъаланы магъа тапшурдулар. Театрны чебер ёлбашчысы Айгум Айгумов да якълады, арив гёрдю. Бу ишде бек гьаракат этип айланды къурчакъ театрны чебер ёлбашчысы болгъан Ислам Казиев, баш художник Наби Бамматов, режиссёр учун таржума этген Байсолтан Осаев, макъам язгъан Аскерхан Аскерханов, Багьавутдин Гьжиев ва цехде ишлейгенлер де. Баракалла болсун оьзлеге. Биз гьар спектаклни дисклеге язып, яшлар къарасын, ана тилин билсин учун, гьар агьлюде болсун учун яйма умутубуз бар. Бизге Ярославлден чакъырып гелген режиссёр Вадим Домбровкий кёп кёмек этди. Огъар да баракалла. Гележекде гьар юртгъа, шагьаргъа барып спектакллер гёрсетме умутубуз бар.

Режиссёр Ислам Казиев де оьзюню ойларын айтды:

–Къурчакъ театрны болмакълыгъы – яшлар учун, савлай миллетибиз учун уллу маънасы булангъы агьамиятлы агьвалат. Гьали яшлар телевизордан «Человек-паук» ва шогъар ошагъан оьзге тюрлю кинолагъа къарай. Бизге буса бизин халкъны яшавун, тарихин, маданиятын, тилибизни байлыгъын гёрсетеген спектакллер тарыкъ. Аткъайны тили, Анварны тили, оьзге шаирлерибиз, къумукъ ёммакълардагъы балдай чалынагъан тилибиз…– муна бизин яшлагъа тарыкъ байлыкъ! Яшланы, муаллимлени, бары да къумукъ халкъны бу уллу агьвалат булан къутлайман.

Къурчакъ театрда бу спектаклни салгъан режиссёр Вадим Домбровскийге де бир нече сорав бердик.

–Къумукъ театрны бек пагьмулу артистлери бар. Тек къурчакъны биринчилей къолуна алып ишлеме башлагъанда, олагъа къыйын болду. Биринчилей этеген иш къыйын тие. Яшны охума, язма уьйретегенде йимик, оланы да къурчакъ булан ишлеме уьйретме тюшдю. Аслусу, къумукъ жамиятда яшланы ана тилине уьйретме герек деген пикру бары – бек рагьмулу хыял. Шону яшавгъа чыгъарма да тарыкъ. Къурчакъ театр буса – шогъар элтеген бир ёл, асувлу къайда. Оьзлер байлавлукъну узатса, мен къумукъ къурчакъ театр булан ишлеме гьазирмен.

Къурчакъ театрны баш художниги Набиюлла Бамматов да оьзюню пикруларын айтды:

–Къурчакъ театр бизин яшлар учун бек тарыкъ экенни гьакъында кёп айтылды, язылды, мен де яздым. Нечик де иш юрюлдю, театр къурулду, тек гьакимиятны янындан бир кёмек де болмады. Аслусу, Салавутдин Мусалаев оьз янындан харж чыгъарып, кёп масъалалар кютюлдю. Янгы йылгъа ачма кёп къаст этдик, бажарылмады. Актёрланы аслу ишинден сонг чакъырып, гече геч болгъанча ишлей эдик. Бир актёр гелсе де ишлеймен деп, режиссёр Вадим Александрович бек къаст этип чалышды. Салавутдинни проектни ёлбашчысы этип алгъаныбызгъа да гьёкюнмейбиз, бек къаст этди. Гьали къурчакъ театрыбыз бар деп айтып оьктем болма болабыз.

Спектаклден сонг чыгъып сёйлегенлер Аскерхан Аскерханов, Салав Алиев, Скандарбек Тулпаров, Шейит-Ханум Алишева, Лилия Гьасанова, Алибек Гьажиев, Камил Алиев, Далгьат Алкъылычев, Расул Къадиев, Абдулгьаким Гьажиев, Гьасан Оразаев, Гьюсен Адилов, Хизри Батыргишиев къурчакъ театрны биринчи спектаклин къабул эте туруп, коллективни къутлай туруп, аз-кёп буса да йиберилген кемчиликлени гьакъында да айтдылар. Бизге буса: «Яхшы ёл, къумукъ къурчакъ театр, гележекде къумукъ яшланы къурдашы-сырдашы болуп яшама насип болсун!» – деп айтмакъ къала.

 

Яраш БИЙДУЛЛАЕВ.

СУРАТДА: къурчакъ театр – спектаклден сонг.

Авторизация
*
*
Регистрация
*
*
*
Согласны с условиями сайта?
Генерация пароля