Камила Шамилова: «Пагьмулу ёлдашларымдан илгьам аламан»

 
  Къумукъ сагьнаны жагьиллери

А-П. Салаватовну атындагъы Къумукъ музыкалы-драма театрны коллективинде Камила Шамилова яш наслуну вакили гьисаплана.


Камила Шамилова 1990-нчы йылда Буйнакск районну Тёбен Жюнгютей юртунда тувгъан. Ол театрда ишлейгенли етти йылдан артыкъ бола. Дагъыстан пачалыкъ университетни маданият факультетини экинчи курсун битдиргенде, ону театргъа актёр гьисапда ишлеме чакъыралар. Биз Камила Шамилова булан ёлугъуп лакъыр этдик. Шо лакъырлашыв охувчуланы тергевюне де бериле.

 

– Сиз Къумукъ театргъа ишлемеге нечик гелдигиз? Яшдан берли сагьнада ойнамагъа къастыгъыз бармы эди?


– Мен артист боларман, театргъа ишлеме барарман деп ойлашмай эдим. Къумукъ театрны режиссёру Ислам Казиев мен охуйгъан факультетде бизге дарс бере эди. Бир керен экзаменибизни вакътисинде ол мени оьзюню янына чакъырды. Бир роль да берип, мени сынап къарады. Шо мени театргъа ишге тюшмеклигимни биринчи абаты болуп токътады.


Мен гиччи заманымдан берли йырлама, бийиме, шиърулар охумагъа кёп сюе эдим. Къардашларым, къурдашларым магъа артистка болмакъ учун тувгъансан дей эдилер. Оьзюмню буса актриса болмагъа гьюнерим ёкъ деп эсиме геле эди. Кёп ойлашып турмайлы, университетни маданият факультетине охума тюшдюм. Тюзю, документлеримни экономика факультетге де берген эдим. Буса да маданият факультетге тюшюп, хыялларым алышынды, актриса касбугъа охума башладым.

–Сиз театрда яратгъан келпетлени арасында лап да къыйын тийгени къайсы эди?


– Магъа белгили драматургубуз Атав Атаевни «Ташбике» деген драмасына гёре салынгъан спектаклинде баш роль тапшурулгъан эди. Шо роль магъа четим тийди, неге тюгюл де сценарийни сёзлери шиъру къайдада язылгъан эди. Келпет яратма бек  къыйын эди, ойнайгъанда кёп талчыкъма, гьатта бир-бирде йылама да тюшдю.

– Сагьнада ойнайгъанда не йимик четимликлер чыгъа, сёзлерин унутуп къалагъан гезиклеригиз боламы?


– Озокъда, текстни сёзлерин унутуп къалгъан гезиклерим болгъан. Бизин актёрларыбыз – биригип, татывлукъда ишлейген коллектив. Спектаклни вакътисинде биз сёзлени унутуп къалсакъ да, бир-биревге кёмекге табылабыз. Сынавлу, бажарывлу актёрларыбыз, унутгъаныбызны билсе, гьазиринде кёмек этме алгъасай, ёл таба. Ондан къайры да, уялагъан, тартынагъан гезик­лерим де кёп болгъан. Айрокъда ишлеме башла­гъан биринчи, экинчи йылымда.  Ишлей туруп, сынав да геле, уялчанлыкъ да тая, гюн сайын касбунга да мекенли тюшюнесен. Мисал учун,  орус тилде ойналгъан «Расплата» деген спектаклибизде гьаясыз къайдада ойнама тарыкъ эди. Мен наркоманка болуп ойнай эдим.  Спектаклге къарамагъа юртдан гелген жагьиллер де бар . Олар, мен ойнайгъан кюйге къарап, магъа, гертиден де, наркоманка деп тура болгъан. Яшавда юрегибиз пашманлыкъ, талчыкъ елеген буса да, спектаклдеги рольгъа кюйленмесе болмай. Тарыкъ болса, бийиме де, кюлеме де, пашман болма да, йылама да тюше. Яшавда сени къайгъынг бар буса, пашманлыкъда бусанг да, спектаклде ойнайгъанда, барын да унутма герексен.

– Камила, сиз кимлерден уьлгю алдыгъыз? Оьзлени яратывчулугъу булан сизге таъсир этген белгили актёрлар болдуму?


– Мен анадаш Къумукъ театрыбызда ишлейгенлени барындан да нечик буса да бир илгьам аламан. Басир Магьамматов, Байсолтан Осаев, Тотуханум Осаева, Зугьра Межитова – булар барысы да ойнайгъан кюй магъа айрокъда ювукъ. Гьарисини оюнуна къарап, уьлгю алма къарайман. Оьзюмню оьз келпетимни гёрсетме сюйсем де, бажарывлу актёрларыбыздан уьйренме къаст этемен. Неге тюгюл, оланы бизден, яш наслуну вакиллеринден сынаву артыкъ, бизден яхшы да биле. Озокъда, университет де кёп затгъа уьйрете, касбуну гьакъында билимлер бере. Къалгъан ишни Къумукъ театрны сагьнасы оьзюню ёлуна сала, ийлей, кюйлей… Ахырда келпет яратыла.

– Театр булан тыш пачалыкълагъа да баргъансыздыр…


– Лермонтовну фестивалында «Яхшы ойналгъан роль» учун магъа  диплом ва медаль берилген. Мен коллектив булан Тюркияны, Къазанны, Нальчикни театр­ларыны сагьналарында да ойнагъанман.

– Сизин хасиятыгъызгъа къыйышагъан, сиз ушатагъан келпет къайсыдыр? Нече спектаклде баш ролланы ойнагъансыз?


– Мен ушатмайгъан, сюймейген роль ёкъ деп айтма боламан. Бары да келпетлени сюемен, къайсы да магъа къыйыша деп эсиме геле. Спектаклде сагъа тапшурулгъан рольну  юрегингден ойнама, бары пагьмунгну салып ойнама герексен.  Сен яратагъан келпет, нечакъы сен сюймейген хасияты булангъы келпет буса да, шо ахырда сагъа бир тамаша ювукъ болуп къала. Ону уьстюнде ишлейгенде тёкген къыйынынга гёре боладыр деп эсиме геле. Мен етти спектаклде баш ролланы ойнагъанман. Экинчи, уьчюнчю даражадагъы келпетлерим де кёп.

– Баракалла, гележекде дагъы да яхшы келпетлени яратма сизге яратывчулукъ ругь ёрайман.


– Сен де савбол.

Авторизация
*
*
Регистрация
*
*
*
Согласны с условиями сайта?
Генерация пароля