Камал Абуковну юбилей ахшамы

Биринчилей ДР-ни маданият министри Зарема Бутаевагъа сёз берилди.

–Бугюн бу уллу залгъа сыймайгъан кюйде халкъ жыйылгъаны негьакъ тюгюл. Оьзюню юбилейин бек рагьмулу ва пагьмулу халкъ язывчубуз, профессор, филология илмуланы доктору, Сулейман Стальскийни атындагъы республика савгъатны лауреаты, критик, публицист белгилей. Ону пагьмуларын айтып турма заман да герек. Юбилей буса ону гьасил чыгъара­гъан, гележекге янгы планлар къурагъан заманы. Ону яратывчулукъ загьматына республиканы ёлбашчыларыны янындан оьр багьа берилген. Ол Президентибизни бу йылны 29-нчу ноябрдеги Указына гёре республиканы Гьюрметлев грамотасы булан савгъатлана. Къутлайман, савлукъ ва узакъ оьмюр ёрайман.

Сагьнада «Мен гюнагьлыман, Марьям» деген спектаклдеги «Насип» деген йыргъа макъам язгъан композитор Аскерхан Аскерханов ва ону радиодан биринчи йырлагъан сююмлю йыравубуз Бурлият Ибрагьимова чыгъа. Къаравчулагъа тезден таныш ва кёп сюеген йыр чалына… Харс урувлар…

Дагъыстанны Язывчуларыны союзуну председатели Магьаммат Агьматовгъа сёз бериле.

–Камал Ибрагьимович узакъ йыллар Расул Гьамзатовну заместители болуп ишледи. Акъ гёлек, галстук да булан таза, арив гийинеген, исбайы, бажарывлу, билимли, англавлу, кимге де кёмек этме гьазир турагъан Камал жагьил заманымда магъа яхшы янындан гючлю таъсир этди. Ондан уьлгю алма, огъар ошама, ону йимик болма барыбыз да гьасирет эдик. Ол оьзюню яратывчулукъ иши булан яш нас­луну патриот ругьда тарбиялавгъа, бизин ата-бабаларыбызны сыйлы адатларыны ругьунда тарбиялавгъа кёп уллу къошум этген язывчу. Ону публицистика материалларыны атларын эсгерип къойсакъ да кёп затны англата. Дагъыстан адабият учун критик гьисапда да ол этген гьаракатны багьасы ёкъ. Ол оьзюню анкетин толтургъан кюйню сизге аян этемен. Миллети – гёнгю чыкъгъан къумукъ, агьлю гьалы – авлетлерин тарбиялап болмагъан ата, санияты – болуп битмеген прозаик, бек рагьмулу критик, халкъ къабул этмеген драматург, Дагъыстанны ат къазанмагъан къуллукъчусу, болуп битмеген алим… Язывчуланы союзуну анкетасы буса башгъа. Шону да сизге малим этейим. Миллети–бек тизив дагъыстанлы, россиялы, дюнья оьлчевдеги къумукъ, агьлю гьалы – Атикатдан арзалар гелмеген, санияты – прозаик, халкъ язывчу, публицист, критик, драматург, савгъатлары – охувчуланы сюювю ва баракалласы, савлукъ ва узакъ оьмюр ёрай туруп къутлайман!

Дагъыстанны халкъ шаири Магьаммат Гьамитовгъа сёз бериле.

– Бир Магьамматдан сонг бирдагъы Магьамматгъа сёз айтма тынч тюгюл. Гьюрметли Камал Ибрагьимович, мен биринчилей отчествонгну айтып сёйлеймен, неге тюгюл сен де биринчилей 75 йыллыгъынгны белгилейсен. «Дагестанская правда» газетде шо тархгъа байлавлу макъа­ла яздым. Шо «деркъап» деген сёз булан бите. Гьали де мен кёп маъна береген шо сёзню айтып, битдирип къояр эдим, бажарылмай… Камал Ибрагьимович дагъыс­тан адабиятгъа метеор йимик, сейсмограф йимик гирип гелди. Бизин къалмагъаллы девюрде не йимик масъалалар чечилме герек, нечик чечме герек, инг башлап негер тергев берме герек ва шолай оьзге къыйын суаллагъа оьзюню яратывчулугъу булан жавап берме, ёл гёрсетме чалышды. Яшав масъалалагъа, адамны ич яшавуна тергевню артдырды, охувчуланы сюювюн къазанды. Оланы сюювюн буса, пагьму болмаса, къазанып болмай. Бир адам шулай тюрлю-тюрлю жанрларда ишлеп болар деп гёз алгъа гелтирме къыйын. Биринчи Магьаммат оланы айтып гетди. Гертилей де, уллу пагьму. Бары да дагъыстанлылар оьктем болагъан пагьму. Барыны да атындан кёп савбол, баракалла деп айтма сюемен, деркъап!

Ондан сонг юбиляр Бурлият Ибрагьимованы атындагъы рагьмулу фондну Гьюрметлев грамотасы булан савгъатлана­гъаны билдирилди. Грамотаны сююмлю артисткабыз Бурлият Ибрагьимова оьзю тапшурду ва ону къутлады.

Къумукъ театрны чебер ёлбашчысы Айгум Айгумовгъа сёз берилди.

– Камал бек рагьмулу, простой, адамгъа не кёмек этейим деп турагъан улан. Оьзю кёмек этип болмай буса да, этемен деп тура. Шо – уллу адамлыкъ. Инсанларда болма герек бек агьамиятлы хасият. Ону рагьмулугъун Къумукъ театр тезден билген. Пьесаларын гелтирип, оьзюгюз къарагъыз, болгъаны болур деп гетип къала. Оьзю гечелер юхламай язгъан ишлерини гьайын этмей, салыгъыз деп тилеп, чабып айланмай. Герти пагьмуда болагъан хасият. Ону рагьмулугъундан болгъан бир агьвалатны айтмасам болмай. Бир пьесасын салагъанда баш рольну Юсуп Муратбеков ойнай эди. Премьераны гюню. Дёртде гелме герек, ёкъ. Сеп салып къыдырабыз, эсирип ятгъан. Камалгъа сорайман. Тюш аш ашайгъанда 100 грам тёкген эдим яхшы ойнарсан деп айтып. Бу ишге къара. 4 айны уза­гъында уьйренген ону къоюп, 2 сагьатдан Карамдинни уьйретип салдыкъ. О заманда да ол ойнап болармы деп сорай. Шолай простой, рагьмулу улан бизин Камал, къутлайман.

Сагьнагъа Дагъыстанны халкъ артисткасы Зоя Чунаева чыкъды. Аргъан булан согъуп, йыр айтып залдагъыланы разилигин алды.

Магьачкъала шагьарны администрациясыны башчысыны заместители Фейзулла Къагьриманов шагьарны мэрини атындан юбилярны къутлады.

Хумторкъали районну Къоркъмас­къала юртундан «Сарихум» деген бийив ансамбль оьзлени къурч бийивю булан жыйылгъанланы къувандырды. Белгили йырав Руслан Загьиров гитара булан, агъач­къомуз булан йырлар йырлап, къаравчуланы харс урувларын къазанды.

Тарихни, тилни, адабиятны институтуну вакили Ибрагьим Магьамматов коллективини атындан юбилярны къутлады. Дагъыстанны халкъ язывчусу Магьамматрасул Расулов къалам ёлдашы Камал Абуковну яратывчулугъуну гьакъында, гьар тюрлю жанрларда дагъыс­тан адабиятгъа ол этген уллу къошумну гьакъында хабарлады ва юбилярны къутлады.

РФ-ни ат къазангъан, Дагъыс­танны халкъ артисти Байсолтан Осаев йырлап, къаравчуланы разилигин алды ва К.Абуковну къутлады. Сёз Да­гъыстанны халкъ шаири Агьмат Жачаевге берилди.

– Дагъыстанда тезден берли айтыла гелеген тапшурмалы айтыв бар. Янгы тувгъан яшны малайик мангалайындан оьпсе, алтын уста бола дей. Къулагъына ювукъда оьпсе, композитор, мангалайындан оьпсе, язывчу бола дей. Бизин Камалны малайик мангалайындан бир чи нечик де, бир нече керен оьпгенге ошай. Неге тюгюл, ол проза, савлай адабият не экенни яхшы биле. Адамланы юрегинде къалагъан, унутулмайгъан нечесе тюрлю асарлар язып да тура. Сонг да, ол ана тилин оьзю яратгъандай биле. Орус тилни де шолай яхшы биле. Къайсы адабият асарны да охугъан сонг, автору гёрюнмей буса, шо асар гьайдавчусу ёкъ атгъа ошай. Камалгъа шо къоркъунч ёкъ. Ол буссагьатда да ат уьстде. Поэзияда башлап алагъан абатларым эсимде. Камал ёл гёрсетгени, насигьат этгени, ругьландыргъаны магъа янгы-янгы китапланы язма имканлыкъ берди. Гьакъ юрекден къутлайман, савлукъ, узакъ оьмюр ёрайман.

Сагьнагъа Камал Абуковну иниси Алевдинни авлетини яшлары Амин ва Алевдин чыгъып, гитаралар булан макъамлар сокъду. Расул Гьамзатовну атындагъы халкъара фондну вакили Гьабибат Азизова юбилярны къутлай туруп, ­огъар Р. Гьамзатовну атындагъы медальны тапшурду. Республиканы философларыны жамиятыны, студентлени атындан профессор Мустапа Билалов К.Абуковну критика тармакъда чалышгъанын, философия булан къатнашгъанын, публицистика тармакъда этген къошумун эсгерди ва ону къутлады.

«Ёлдаш» газетни баш редактору Камил Алиевге сёз берилди.

– Геч яхшы болсун, къурдашлар. Бу айрыча шавлалы ахшам десем, янгылыш болмасман. Неге тюгюл, шавлалы, танг адамны юбилейине жыйылгъанбыз. Язывчу болмакъ о бир касбу тюгюл. Язывчу болмакъ – о бир къысмат. Оьзюню халкъындан айрылмайгъан къысмат. Язывчу болмакъ халкъыны, миллетини жандашы, сырдашы болмакъдыр. Камал Ибрагьимович оьзюню яшаву булан да, яратывчулугъу булан да шону гёрсетип тура. Биз барыбыз да, мен оьзюм де Камалны китапларын охуп тарбиялана гелгенбиз. Таза булакъ сувгъа сувсагъан адамлар йимик биз Камалны китапларын излеп, гьаран табып охуй эдик. Ону прозасы шонча да таъсирли. Мени шулай эсиме геле. Эгер Тенгирибиз бир халкъгъа кёмек этме, бай этме, къурч яшатма сюе буса, о халкъгъа топуракъ бере, Ватан бере, ёлбашчылар, Чопан шавхал йимик ханлар-бийлер бере, Йырчы Къазакъ йимик йыравлар, гелеген йыл 100 йыллыгъы болажакъ Барият Муратова йимик актрисалар бере, биз бугюн юбилейин белгилейген Камал Ибрагьимович йимик язывчу бере. Шатлы гюнюгюз къутлу болсун. Расул Гьамзатовну атындагъы медальны алгъаныгъыз булан да къутлайман. КНКО гетген йыл оьзюню къарары булан Йырчы Къазакъны атындагъы медальны чыгъарды. Россияны ва Дагъыстанны адабиятына этген оьз къошумугъуз, халкъыбызны милли маданиятын оьсдюрювде ва Йырчы Къазакъны яратывчулугъун яйывда этген гьаракатыгъыз учун ону медалы булан савгъатлама къумукъ илму маданият жамияты бу йылны 29-нчу ноябринде къарар чы­гъаргъан. Сизге шо медальны тапшураман ва къутлайман.

Ондан сонг халкъ язывчубузну ра­йонланы, шагьарланы администрацияларыны башчылары, оьр охув ожакъланы вакиллери: медицина академиядан профессор Жамалутдин Агьматов, педагогика университетден профессор Забит Акавов, Ха­савюрт районну профсоюзларыны башчысы, шаир, язывчу, композитор Къалсын Акъгёзов, Хасавюрт шагьар администрацияны башчысы Арслан Арсланов, Къарабудагъгент районну башчысы Къапур Исаев, Къызылюрт район администрацияны башчысы Багьавутдин Гьажаматов, Бабаюрт районну вакили, печатны ва маълумат къуралланы министерлигини вакили, Хамаматюртну вакили къутладылар, юбиляргъа йылы сёзлер багъышлай туруп ону булан оьктем болагъанын айтдылар. Къарабудагъгентде Агъай Къаплановну атындагъы эргишилерини хору бырынгъы къумукъ йырланы йырлап, къаравчуланы харс урувларын къазанды. Камал Абуковгъа сёз берилди.

– Мени атыма айтылгъан сёзлени де эшитген сонг, сизин таза, ачыкъ, шат юзлеригизни де гёрген сонг, магъа сёйлеме къыйын. Мен оьзюм болагъанны язгъанман. Язгъанларымны охуп мени таныгъаныгъыз, абур-сый этгенигиз, бугюн мунда жыйылгъаныгъыз учун сизге барыгъызгъа да ва савлай миллетиме гьакъ юрекден баракалла деп айтма сюемен. Кёп савболугъуз.

Авторизация
*
*
Регистрация
*
*
*
Согласны с условиями сайта?
Генерация пароля