Француз маданиятны фестивалы – Дагъыстанда

Магьачкъалада Р.Гьамзатовну атындагъы милли китапханада «Франкофония» деген гьар йыллыкъ фестиваль 12-нчи апрелде оьтгерилди. Тыш пачалыкъланы адабиятларыны бёлюгюню башчысы Ш.Мамаева айтгъан кюйде, китапханада француз тилни сюегенлени клубу ишлейгенли, 14 йыл бола. Гелеген йыл клубну 15 йыллыгъын белгилежеклер.


Дагъыстан пачалыкъ университетде француз тилни кафедрасыны заведующийи Ибрагьим Абакаров бизин республикада француз тилни гьалыны гьакъында хабарлады. «Француз тилде сёйлейген пачалыкъланы «Франкофония» деген халкъара жамиятыны гьасиллерине гёре, дюньяда француз тилде сёйлейгенлени санаву арта бара. Дагъыс­танда буса француз тил булангъы гьал йылдан-йыл бузукълаша, ону уьйренегенлени санаву аз бола. Дагъыстанлылар ингилис тилни уьйренме къаст эте.


Тек бугюн мунда гелгенлерден зал толгъаны сююндюре. Фестиваль гьар йыл янгы-янгы адамланы къуршай. Школалардагъы охувчулар да француз тилни уьйренме муштарлы бола. ДГУ-гъа лекциялар охума педагог Жан-Пьер Ленотр гелегени де француз тилни уьйренме сюегенлени санавун артдыра. Бу гезик биз тыш пачалыкъланы факультетинде дарс береген Р.Абасованы кёмеги булан Ставрополь университетде француз тилден дарс береген Тома Джуэн булан таныш болажакъбыз»,–деди ол.


Тома Джуэн оьзюню француз тилинде сёйледи. «ООН-гъа къуршалгъан 185 пачалыкъдан 56 пачалыкъ − «Франкофонияны» ортакъчылары. Франция гьар йыл миллионлар булан туристлени къаршылай. Француз тилни билсегиз, Испанияны, Португалияны, Италияны, Румынияны халкълары сёйлейген тиллени де англажакъсыз»,–деди ол.


Тыш пачалыкъланы факультетин битдирген Р.Канаев айтгъан кюйде, Францияны элчилиги француз тилге байлавлу гьар тюрлю конкурслар оьтгере. Оьзю де 2015-нчи йыл шолай конкурсда утуп, дёрт жума Ниццеде туруп гелген. Бу йыл гюзде буса дарс беривчюлени халкъара программасына гёре бир йылгъа Франциягъа баражакъ.


Концерт программаны Да­гъыстан пачалыкъ филармонияны солисткасы Наида Камалутдинова ачды. Ол Франсис Пуленканы «Сюювню ёллары» деген йырын йырлады. Магьачкъаладагъы 22 номерли гимназияны, Каспийскидеги 7 номерли гимназияны охувчулары шиърулар охуду, йырлар йырлады ва француз бийивлени бийидилер.


Фестивальда актив кюйде ортакъчылыкъ этгенлеге грамоталар тапшурулду.


Бизин мухбирибиз.

Авторизация
*
*
Регистрация
*
*
*
Согласны с условиями сайта?
Генерация пароля