Дарс беривчюлер пикру алышдыра

Проектни гьазир этивде РФ-ни билим беривге ва илмугъа къарайгъан министерлигинде къурулгъан хас комиссия школалардан тутуп болмагъа герекли алышынывлагъа айрыча тергев бакъдыра. Булай генг алынып гьазир этилген проектлер гьазиринде къабул этилип къалмагъа тюшмей. Неге тюгюл, етти керен оьлчеп, бир керен гесмеге тарыкъ бола. Сонг явгъан янгурну артындан ямучу алып чапмассан.

Шо саялы гетген йылдан берли бу проект уьлкени бары да оьр охув ожакъларында арагъа салынып ойлашыла, пикру алышдырывлар бола, гьасиллер чыгъарыла. Умуми алып айтгъанда, арагъа салып ойлашагъан жыйынларда оьр охув ожакъланы дарс беривчюлери, муаллимлер, билим берив ожакъланы ёлбашчылары, олай да билим берив тармакъда савлай дюнья­гъа танывлу экспертлер ортакъчылыкъ этген.

Дагъыстан пачалыкъ педагогика университетни дарс беривчюлерини арасында да шо масъалагъа байлавлу жыйын оьтгерилген. Шону барышында проектни теренден анализ этип айтылгъан гьар тюрлю пикрулар да арагъа чыкъгъан. Тек умуми алып айтгъанда, Концепциядагъы бир-бир маълуматлар гьали де ерине етишип ахтарылмагъаныны, уьстюнде кёп заман ишлеме тюшеген ерлери бары гьакъында айтылгъан. Мекенлешдирип айтгъанда, муаллимге оьзюню билимлерин артдырыв ёлланы гьакъында ачыкъ этип гёрсетилмеген. Лап да аслусу, федерал оьлчевдеги концепцияда билим беривню регионлардагъы ва ерли шартлагъа къыйышывлу оьзтёречилиги гьисапгъа алынмагъан.

Концепцияда студентге касбусуна мекенли тюшюнмек учун оьтгерилеген практикагъа гьакъ берилежекни гьакъында айтылгъан. Амма шо масъаланы чечмек учун харж къайдан алынажагъы ва къайсы къурумдан таба акъча маялар гёрсетилежеги ачыкъ этилмеген.

Муаллим касбугъа ес болмакъ учун ЕГЭ-ден алгъан оьр баллар таманлыкъ этмей. Бу масъаланы айланасында этилмеге тюшеген ишлер кёп. Школадан башлап, охувчулар булан касбуланы танглавну гьакъында лакъырлашыв юрюлмеге тюше. Ондан къайры да, муаллим касбугъа ес болмагъа сюеген адам орта хас яда оьр охув ожакъда алагъан билимлери терен болмагъа тюше. Сонг да, муаллимни жамият арада тийишли абуру да болмагъа герекдир.

Оьр охув ожакъларда магистратураны алдына салынагъан масъалалагъа янашыв ахырына ерли чечилип битмеген. Олай демек, билим береген ожакъгъа ёлбашчылыкъ этмек учун муаллим, биринчилей, сынав топламагъа, билим берив системадагъы янгы технологияланы иш уьстюнде къоллап бажармагъа герекдир.

ДГУ-ну дарс беривчюлери бу масъа­ланы арагъа салып ойлашывда оьзге тюрлю масъалаланы да гётерген. Шоланы арасында лап да аслулары деп айырмаса болмайгъанлары да бар. Оланы пикрусун арагъа чыгъарып айтгъанда, оьр охув ожакъда касбу билимлени танглавда юрюлеген дарслагъа янгыдан къарамагъа герек.

Оьр охув ожакъланы арасында гетген йылдан берли юрюлеген тергевлерде дарс беривчюлени илму-ахтарыв ва сынав-конст­руктор ишлерини даражасы ти­йишли кюйде ахтарылмагъан. Жамын чы­гъарып айтгъанда, оьр охув ожакъны дарс беривчюлерини арасында болгъан пикру алышдырывну натижалары чыгъарылгъан ва тийишли кагъыз да гьазир этилген. Шогъар ДГУ-ну биринчи проректору И. Дибиров, ректоратдагъы ойчу М. Чеерчиев, охутув-методика ишлеге къарайгъан проректор Н. Терехова, хас психология ва педагогика кафедраны профессору П. Омарова, профессорлар М. Гьайбуллаев, Гь. Магьамматов ва оьзге илму къуллукъчулар къол салгъанлар.

РФ-ни билим беривге ва илмугъа къарайгъан министерлигини сайтында ерлешдирилген концепцияны проектин арагъа салып ойлашывда оьзге оьр охув ожакъларда да шо меселдеги пикру алышдырывлар болгъан .

Барият Оьлмесова.

Авторизация
*
*
Регистрация
*
*
*
Согласны с условиями сайта?
Генерация пароля