Муаллиминден уьлгю алгъан

Маданият Ёлдаш
9 декабря 2019 в 13:44 320
 Муаллиминден уьлгю алгъан

Бизин къумукъ юртларда юреги яшлагъа берилген, яллыкъ билмей чалышагъан муаллимлер аз тюгюл. Бугюн мен оланы бириси, Геметёбе орта школасында гьисап дарсланы юрютеген Разият ­САЛИЕВАНЫ гьакъындагъы маълуматланы охувчулагъа етишдирмеге сюемен.

 


Разият Салиева муаллим гьисапда оьзюню биринчи дарсын йыракъ 1985-нчи йылда Мужакъай юртдагъы 8 йыллыкъ школада юрютген. Шо йылларда эсгерилген охув ожакъны ёлбашчысы Зайналбек Залибеков огъар насигьатчы гьисапда ёл гёрсетген, сынав уьйретген.


Ол Тамазатёбе юртда Къонакъовланы агьлюсюнде тувгъан. Ону атасы Авардин ерли совхозда агроном болуп ишлеген, анасы Кабахан школада муаллим гьисапда чалышып тургъан. Касбу тангламагъа гезик етишгенде, Разият бир мюгьлетге де ойлашып турмайлы, анасындан уьлгю алып, муаллимни касбусуна ес болмагъа юрекге хыял тутгъан. Тек огъар оьзюне школада математика дарсланы юрютген Ногьман Гьажиевични таъсири де тиймей къалмагъан. Ол школаны тамамлап чыкъгъанда, Дагъыстан пачалыкъ университетни математика дарсланы муаллимлерин гьазирлейген факультетине охумагъа тюшгени шону исбатлай. Оьр охув ожакъны битип къайтгъанда бу жагьил муаллим къызны Мужакъайдагъы 8 йыллыкъ школагъа бакъдыралар. Шолайлыкъда, 1985-нчи йылдан тутуп, ону яшаву бюс-бютюнлей дегенлей школа булан, торайып гелеген яш наслу булан байлана. 1988 – 1989-нчу йылларда ол ата юрту Тамазатёбе юртдагъы школада да гьисап дарсланы юрютмеге чола таба. 1989-нчу йылда ол геметёбели Агьмат Салиев булан татывлу ожакъ къургъанлы буса, артдагъы 30 йылланы боюнда Геметёбе юрт школада оьр класларда дарслар юрюте. Разият Авардиновна дарсланы къужурлу, жанлы оьтгерип, оьзюню алдында билим алагъан яшланы иштагьландыра, оланы гьисап дарслагъа муштарлыгъын артдыра. Билим берив тармакъны къуллукъчуларыны алдына бугюнлерде салынагъан талапланы да ол дарсларында генг кюйде къоллай, гьар даим де оьзюню касбу даражасын камиллешдире турмагъа да унутмай. Дейгеним, ол муаллимлени арасында бизин уьлкени оьлчевюнде юрюлеген къаравларда, ярышларда ортакъчылыкъ этип алдынлы ерлеге ес болгъан. Ачыкълашдырып айтгъанда, «Инфоурок» деген бютюнроссия къаравунда ортакъчылыкъ этип, ол оьзюню касбу билимлерин гёрсетмеге, узакъ йылланы боюнда топлангъан сынавун малим этмеге бажаргъан. Ону охувчулары район ва республика оьлчевюндеги олимпиадаларда ортакъчылыкъ этип, кёп гезиклер алдынлы ерлеге лайыкълы болгъан.


Шо гьакъда айта туруп, пагьмулу, билимли, айрыча гьаракатчылыгъы булан иш ёлдашларыны арасында герти абур къазангъан оьр категориялы муаллим Разият Салиева яшланы янгыз математикагъа тюгюл, оланы оьзбашына натижа чыгъармагъа да уьйретегени гьакъда да эсгерип къоймагъа тюше. Ол кёп санавдагъы гьюрметлев грамоталар ва баракалла кагъызлар булан да савгъатлангъан. Амма бары да савгъатлардан ол яшланы сюювю, олар етишген уьстюнлюклени артыкъ гёре. Клас ёлбашчысы гьисапда да 6 «б» класны охувчуларына ол герти кюйде къурдаш да, сырдаш да, насигьатчы да болуп бажаргъан. Разият Авардиновна муаллимни касбусун танг­лагъан охувчулары Айида Азаматова, Чингиз Нюрмагьамматов, Разият Гьажилавова, Сайида Акайимова, Къыстаман Болатова ва шолай кёп оьзгелери булан да оьктем бола.


Бугюнлерде Разиятны яннавурунда кёп сююп къошулгъан агьлюсю Агьмат ёкъ. Ол яшавдан чакъсыз гетген. Амма къысматны къапаслары Разиятны бюдюретмеген. Ол оьзюню дёрт де авлетине тарыкълы ерде ата да, ана да болуп, билим де ва тарбия да берген. Бугюнлерде ону уланлары Хизри ва Темирлан, оьр билимлеге де ес болуп, Тюмен бойларда ишлей. Къызы Раиля школаны алтын медальгъа битдирип, Ханты-Мансийск шагьардагъы медицина академияда охувун давам эте. Лап гиччи уланы Шамил буса школада 8-нчи класда лап яхшы къыйматлар алып охуй.


Оьзюню гьар гюнлюк гьаракатын яшлагъа терен билим ва ким де сукъланардай тарбия бермеге белсенген Разият Салиевагъа гележекде де ишинде дагъы да яхшы оьрлюклер ёрамакъ оравлудур деп гьисап этемен.


 

Бэлла ГЬАЖИГЕЛДИЕВА,

Россияны журналистлерини

союзуну члени.

СУРАТДА: Р. САЛИЕВА.