ЖАМИЯТ ВА НИЗАМ
КИМ НЕЧАКЪЫ КЪАЗАНГЪАН?
Белгили кюйде, гьар йылны апрель айыны ахыры болгъанча бары да пачалыкъ къуллукъчулар ва депутатлар оьзлени ва агьлюлерини гелимлери гьакъында гьисап бере. Оьзлени къолу булан толтурулагъан документ булан сонг Интернетден таба къайсы ватандаш да таныш болма бола. Шогъар байлавлу Дагъыстанны Башчысыны сайтында ерлешдирилген маълуматланы биз де гёзден гечирип къарадыкъ.
Гетген йыл республиканы Башчысыны ва Гьукуматыны администрациясыны башчысы Алексей Гьасанов лап да кёп къазангъан. Ол декларациясында 20,2 миллион манатны гёрсетген. Шо буса 2020-нчы йыл булан тенглешдиргенде, 10 керен артыкъ. Ону ихтиярында бир квартир (32,2 квадрат метр) ва катер бар. Агьлюсюню йыллыкъ гелими 500 минг манатлагъа етише. Ондан къайры, «Тойота» маркалы машинни ва онгача яшавлукъ уьйню (223,2 кв.м.) есиси деп гьисаплана.
Экинчи ерде Гьукуматны алдагъы башчысы Абдулпатагь Амирханов къазангъан – 12,1 миллион манат. Ондан сонг вице-премьер Рамазан Жафаров геле (12,09 миллион манат). Шо да 2020-нчы йылдан эки керен артыкъ. Ону ва агьлюсюню еслигинде эки квартир (90 ва 111 кв.м.) ва «Мазда» маркалы машин бар.
А. Гьасановну биринчи заместители Магьач Омаров гетген йыл этген иши саялы 5,1 миллион манат алгъан. Премьер Абдулмуслим Абдулмуслимов 12,14 миллион манат къазангъан. Уьстевюне, ол оьзюню еслигиндеги квартир (84,5 кв.м.), дача (204 кв.м.) ва эки «Волга» маркалы машинлер булан пайдалана.
Республиканы Башчысы С. Меликовну декларациясына гёре, ол 2021-нчи йылда 2 миллион 968 минг манат къазангъан. Шо ондан алдагъы йыл булан тенглешдирип къарагъанда, 2 миллион манатгъа аз. Ондан къайры, онгача уью (167,5 кв.м.), квартири (195,7 кв.м.), топуракъ участкасы (90 кв.м.) ва «Лексус» маркалы машини бар. Охувчуланы бирлери билмей буса да ярай, тек Сергей Алимович оьзюне регионну башчысы гьисапда тийишли уллу бинаны яшлар уью учун берген.
Дагъыстандан Пачалыкъ Думагъа сайлангъан депутатланы ва сенаторланы арасында Мурат Гьажиев барысындан да артыкъ къазангъан деп гьисаплама ярай – 33,1 миллион манат. Арты булан Сулейман Керимов геле (17,1 миллион манат). Уьчюнчю ерде Сайитпаша Умаханов (8 миллион манат). Лап да аз Хизри Абакаровнуки (2,3 миллион манат).
Оьзгелени гелимлерини гьакъындагъы маълуматланы Дагъыстанны Башчысыны ва Гьукуматыны сайтындан билмеге боласыз.
АТА-АНАЛАНЫ АРЗАЛАРЫНДАН СОНГ. . .
Россияны Ахтарыв комитетини Дагъыстан ахтарыв управлениеси «Магьачкъалапродукт» деген муниципал къурумну бёлюгюню начальниги Жамилат Жаватхановагъа къаршы уголовный иш ачгъан. Ону булан бирче бир нече школаланы жаваплы къуллукъчулары да тутулгъан.
Ахтарывчулар токъташдырагъан кюйде, Ж. Жаватханова жинаятчы гюп къуруп, артдагъы уьч йылны ичинде шагьарны бюджетинден 2,8 миллион манат урлагъан.
Белгили кюйде, эсгерилген къурум школаланы ашамлыкъ маллар булан таъмин эте. Шо маллардан башлапгъы класланы охувчулары учун исси аш гьазирлене. Ж. Жаватханова билим берив идаралагъа токъташдырылгъан оьлчевден артыкъ маллар бакъдыра болгъан. Сонг школаланы къуллукъчуларыны кёмеги булан шо артыкъ малланы учуз багьасына базарлагъа, тюкенлеге сатып тургъан. Жыйылгъан чакъы акъчаны оьз пайдасына харжлагъан. Жинаятчылыкъ иши ачылып къалмасын учун, гьар айда ялгъан документлер онгара болгъан.
«Магьачкъалапродуктдагъы» тергевлер охувчу яшланы ата-аналарындан гелген арзалардан сонг башлангъан. РФ-ни Уголовный кодексине гёре, суд Ж. Жаватханованы 10 йылгъа ерли эркинликден магьрюм этмеге бола.
· Судну залындан
ТУСНАКЪДА ТУРМА ТЮШЕЖЕК
Буйнакск судда шагьарны центральный азарханасыны алдагъы баш бухгалтери Р.Салаватованы ва кассири А.Мамаеваны уголовный ишлерине къаралгъан.
Судгъа бакъдырылгъан материаллагъа гёре, олар 2016-нчы йылда бир-бири булан алданокъ сёйлешип, азархананы къуллукъчуларына алапа гьисапда берилеген акъчадан 1,8 миллион манатны урлагъан. Суд Р.Салаватованы 2,6 йылгъа, А.Мамаеваны 2 йылгъа эркинликден магьрюм этмек деп къарар чыгъаргъан. Ондан къайры, олагъа урлангъан чакъы акъчаны пачалыкъгъа къайтарма тюшген.
Бирдагъы бир район суд (Лаваша район) Уллуая юртда турагъан З.Каратованы да 2,6 йылгъа эркинликден магьрюм этген. Судда аян болгъаны йимик, ол оьзюню чагъын 23 йылгъа артыкъ этип, ялгъан документлер онгаргъан. Шо документлер булан пенсия да алып тургъан. Гьали огъар алгъан чакъы акъчаны къайтарагъандан къайры, эки йыл ва алты айны ичинде туснакъда турма тюшежек.
КЪАТТЫ КЮЙДЕ ТАКЪСЫРЛАНАЖАКЪ
Пачалыкъ Думаны депутатлары ювукъ арада уллу чагъындагъы адамлагъа байлавлу законгъа бир тюрлю къошумлар этмеге гёз алгъа тутгъан.
Пенсионерлени алдатгъанланы, олагъа къаршы макюрчюлюк этгенлени депутатлар дагъыдан да бек къатты кюйде такъсырламакъны тийишли гёрелер. Шо алышынывлагъа байлавлу гьазирленген англатыв кагъызда артдагъы вакътилерде уллу чагъындагъы адамлагъа къаршы этилеген жинаятчылыкълар, айрокъда макюрчюлюк, кёп артгъан. Мисал учун, гетген йыл макюрчюлени торуна тюшгенлени кёбюсю (67 процент) – чагъы 60 йылдан оьтген адамлар.
02 БИЛДИРЕ
Май айны 3-нде Буйнакскидеги онгача уьйлени бирисинде 41 йыллыкъ къатынгиши ва ону эки яшы газдан агъулангъан. Олар азарханагъа етишдирилген. Врачлар айтагъан кюйде, гьали оланы яшавуна къоркъунчлукъ ёкъ.
***
Май айны 2-синде Францияда суд Американы Бирлешген Штатларыны талабына гёре, сенатор Сулейман Керимовну 325 миллион долларгъа токътайгъан «Амадея» деген гемесин пачалыкъны ихтиярына чыгъарып алгъан.
***
Май айны 2-синде Къызларда 10 йыллыкъ уланъяш байрам къыдырагъанда абзарланы бирисинде уьй есини 9 йыл болагъан торуну булан эришген. Гелген къонакъ яшны гюч булан енгип болмагъанда, уьюнден атасыны тюбегин чыгъарып огъар атышгъан. Уланъяш яраланып азарханагъа тюшген. Полицейскийлер тергевлени башлагъан.
***
Май айны 2-синде Магьачкъалада Каммаевни атындагъы орамда ерлешген онгача уьйлени бирисинден белгисиз жинаятчы 238 минг манат токътайгъан алтын юзюклени, гьалкъаланы урлагъан. Полицейскийлер уручуну тутгъан. 41 йыллыкъ ерли адам алда да уру саялы туснакъда туруп чыкъгъан.
***
Апрель айны 30-нда Магьачкъалада Йырчы Къазакъны атындагъы орамда ерлешген базаргъа от тюшген. Натижада сатыв этеген 4 тюкен толу кюйде яллагъан. Бирдагъы 16 тюкендеги мал бузулгъан.
***
Апрель айны 30-нда аманлыкъны къоруйгъан къурумлар Южно-Сухокумскиде турагъан 54 йыллыкъ ерли адамгъа къаршы уголовный иш ачгъан. Ол ювукъдагъы орманда 24 талтерекни гесген деп айыплана. Пачалыкъгъа болгъан зарал – 200 минг манатдан да артыкъ.
***
Апрель айны 30-нда, эртен вакъти, «Кочубей- Нефтекумск» ёлну 49-нчу чакъырымында «Мерседесни» 41 йыллыкъ гьайдавчусу машинин бек чалт гьайдап, ёлда сакълап болмай, ойтангъа тюшюп авлангъан. Хатабалагьны натижасында гьайдавчудан къайры, ону агьлюсю ва гьакъылбалыкъ болмагъан 3 яшы яраланып азарханагъа тюшген.
***
Апрель айны 29-нда Каспийскидеги наркоманланы багъагъан центрда, эртен вакъти, 32 йыллыкъ жагьил адам палаталаны бирисинде юхлап турагъан адамны башына темир гесек булан уруп, авур яралагъан. Яралангъан адам реанимация бёлюкге тюшген ва врачлар гьали ону оьлюмден къутгъарма къарай.
***
Апрель айны 29-нда Каспийскиде полицейскийлер жагьил адамны токътатып, сумкасын тергегенде, ичинде 460 грам наркотик табылгъан.
***
Апрель айны 28-нде, ахшам вакъти, «Кавказ» федерал ёлну 865-нчи чакъырымында бек чалт гелеген «Лада Ларгусну» гьайдавчусу, низамны бузуп, «ВАЗ-2109» маркалы машинге бетге-бет урунгъан. Хатабалагьда «Жигулини» гьайдавчусу шо ерде оьлген.
***
Апрель айны 27-синде ич ишлени Къаягент район бёлюгюне Первомайское юртда турагъан адамдан арза гелген. Арзасында ол белгисиз адамлар оьзюню къабакъ алдында токътагъан машинин урлагъан деп билдирген. Полицейскийлер уручуланы тутгъан. Уьч жагьил адам, гиччисине 15 йыл бола, машинни урлап, Избербашдагъы эсги темирни къабул этеген пунктгъа 13 минг манатгъа берген.
***
Апрель айны 27-синде Буйнакск шагьарда, гьалиге аты токъташдырылмагъан макюрчю, ялгъан булан ерли жагьил къатынгишини банкдагъы счётундан 680 минг манатны урлагъан.
А. АЛИЕВ
