Халкъыны белгили уланы

– Герти алимни миллети болмай дегенлей, авар халкъны вакили Гьажимурат Доного Гьайдар Бамматны гьакъында документли китап чыгъаргъаны тергевню тартмай болмай. Ол эсгерген кюйде, оьзю ва ону агьлюсю Гьайдар Бамматны алдында борчлу. Гь.Баммат Гь.Доногону уллатасын ва олай нечелени немислени концлагеринден чыгъаргъан.

Китапны малим этивде айтылгъан кюйде, китапгъа гирген материаллар архивлерден ва адамлардан жыйылып алынгъан. Алда Гь.Баммат «Кавказ» деген журналны баш редактору болуп ишлейгенде чыкъгъан бир-бир материаллар да бу жыйымгъа гирген. Гь.Бамматны кагъызларын, материалларын охуй туруп, ону билим даражасына тамаша боласан.

Ол ватанына сагъынч­лыкъ аврувдан авруй болгъан. Ватанына гьасиретлик булан ол 75 йыллыкъ чагъында оьлюп де гетген.

«Ёлдаш» газетни баш редактору Камил Алиевге сёз берилгенде, ол Гь.Бамматны дюнья оьлчевдеги политика чалышывчугъа тенг этди. Ол айтгъан кюйде, Дагъыстанда оьз­лени заман эсгилендирме болмайгъан уьч игит бар: Имам Шамил, Гь.Баммат, Ж. Къоркъмасов.

Тамаша тюгюлмю, Гь Бамматны яратывчулугъун Дагъыстандан эсе, Тюркияда яхшы биле ва онда ону китаплары да кёп чыкъгъан. Россияда айтылагъан кюйде, Гь. Баммат фашистлер булан бирче иш гёрген. Немис социолог токъташдыргъан кюйде, Гь. Баммат фашистлер булан иш гёрмеген. Ону кавказлы легион булан да аралыгъы болмагъан.

Гьар инкъылапда жан къыйыла, къан тёгюле, инкъылапны къурбанларына эсделик салынмагъан регион янгыз Дагъыстан къалгъан. Шо кемчиликни бизин наслу тюзлеме герек. Гьажимурат Доного кёп уллу иш этген. Къумукъ халкъны, савлай Дагъыс­танны атындан огъар баракалла билдирме сюемен.

Чыгъып сёйлегенлерден Магьачкъала музейини директору Зарема Дадаева, алимлер Иса Абдуллаев, Магьаммат-Гьанипа Акаев, Гьарун-Рашит Гьюсейнов Гь.Бамматны гьакъында чыкъгъан китапгъа ва ону оьзюню яратывчулугъуна байлавлу пикруларын, ойларын айтдылар.

А. ГЬАМЗАЕВ.

Авторизация
*
*
Регистрация
*
*
*
Согласны с условиями сайта?
Генерация пароля