Автор: «Ёлдашны» маълумат ва политика
бёлюгюню мухбири Н. Байболатов.
Фейсбукдагъы пикру алышдырывлагъа гёре
Артдагъы вакътилерде Фейсбукда бир — бир ёлдашлар ачгъан группаларда бизин «Ёлдаш» газетни айланасында кёп тюрлю пикру алышдырывлар юрюле. Шолагъа жавап гьисапда биз, газетни къуллукъчулары тюпде берилеген ачыкъ кагъызны язмагъа тийишли гёрдюк.
Къумукъланы баш газети гьисапланагъан «Ёлдаш» газетни къуллукъчулары оьзлени касбу борчларына байланып, гьар гюнлюк гьаракатына охувчулар береген къыйматгъа тергевлю кюйде янаша. Неге тюгюл, газет янгыз охувчулар учун этиле, оланы талчыкъдырагъан масъалалар, яшавлукъ аваралары къумукъ юртларда тувулунгъан гьаллагъа байлавлу макъалалар газетни бетлеринде аслу ерни тута деп айтмагъа ярай. Шо гьакъда охувчулар оьзлер газетни редакциясына язып йибереген кагъызларында да билдире, бизин булан ёлукъгъанда да айталар.
Тек артдагъы вакътилерде Фейсбукда бир- бир ёлдашланы гьаракаты булан къурулгъан «Таварих», «Кумыкский протест» деген ва оьзге группаларда газетни гьакъында юрюлеген пикру алышдырывларда бир-бир ёлдашлар, сиз оьзюгюз де чыгъаргъан гьасиллер булан биз, газетни къуллукъчулары, толу кюйде рази болуп къалмагъа болмайбыз. Неге тюгюл де, инг алда пачалыкъ маълумат къурал гьисапда бизин газетни бетлеринде политикагъа, маданиятгъа, савлукъ сакълавгъа, спортгъа, жагьил адамланы алдында токътагъан масъалалагъа байлавлу макъалалар ер таба. Озокъда, бизин республиканы шагьарларында ва районларында гьар гюн болуп турагъан агьвалатлагъа аслу тергев де бериле. Неге тюгюл, гьар-бир маълумат къуралны алдында йимик, бизин газетни де охувчуларын янгылыкълар булан таныш этмек аслу борч гьисаплана.
Шону булан бирге бизин газет къумукъ миллетге байлавлу масъалалагъа немкъорай янашып къала деп айтмагъа бажарылмай. Тергевлю охувчу шону гьис де этедир.
Сонг да, бизин газетни почтадан алмагъа бажарылмай буса, республикадан тышда яшайгъан къумукълагъа да Интернетде ерлешдирилген сайтдан таба онда чыгъарылагъан макъалаланы барысы да булан толу кюйде таныш болмагъа имканлыкълар яратылгъан. Шондан да гюнде минглер булангъы къумукъ масъалалагъа жаны авруйгъан адамлар пайдалана ва сеслене.
Шолай буса да, оьрде эсгерилген группаларда сиз къумукъланы бугюнлердеги къыйынлы гьалы гьакъда язылмай деп айтагъаныгъызны гёз алгъа тутуп, шу ерде миллет топуракъ масъалалагъа байлавлу бизин газетни бетлеринде чыгъарылгъан макъалаланы бир нечесини янгыз атларын айтып къоймагъа сюемен. «Гележек наслугъа аманат этебиз» ( 11. 04. 14 й., автору –П. Гьайбуллаева; «Къайгъысы эсден таймай» (18. 04. 14 й., автору –Къ. Къараев); «Оьтемишни топуракълары – оьтемишлиленики» (02. 05. 14 й., автору – Къ. Къараев); «Къазиюртлуланы къысматы» (02. 05.14 й., автору – Амир Алиев); «Къаршылыкълар жамият арада чечиле» (04. 07. 14 й., автору – А. Гьамзаев); «Топуракъ базаргъа салынмас!» (10.10.14 й., автору – Къ. Къараев); «Таргъу район – хабармы яда гертими?» (24. 10.14 й., автору –А.Алиев); «Элден сорап «эленген» масъала» ( 07. 11. 14 й., автору – А. Алиев); «Къайпанмайгъан Къараман» (05. 12. 14 й., автору – А. Алиев); «Топуракъ ерли халкъны ихтиярында болма тарыкъ» (05. 12. 14 й., автору – Къ. Къараев) ва ш. б. Къумукъ тилден къайры да, орус тилде белгили алимлер ва жамият чалышывчулар К. Абуковну, З. Акавовну ва С. Алиевни ортакъчылыкъ этивю булан оьтгерилген «Понять судьбу нашу» деген лакъырлашыв, олай да «Восстановить справедливость» деген Абдулманап Гьамзаевни таргъулулар, кахулайлылар ва албёрюгентлилер гючден гёчюрюлгенли 70 йыл тамамланагъанына багъышлангъан макъаласы, олай кёп оьзге материаллар да берилди.
Шондан къайры да, Къ. Къараев Къараманны айланасында 6 макъала, олай да къысгъа маълуматлар да язгъан. Таргъулулар, кахулайлылар ва албёрюгентлилер гючден гёчюрюлгенли 70 йыллыгъына байлавлу Паху Гьайбуллаева язгъан макъалалар да охувчуланы тергевюн тартды. Гележекде де шо иш узатылажакъ.
Биз сизге шулай язагъанны тюз англарсыз деп эсибизге геле. Сонг да, оьзюгюзню пикруларыгъызны Фейсбукда тюгюл, газетни къуллукъчулары булан туврадан-тувра байлавлукъ тутуп етишдирсегиз пайдалы болур. Неге тюгюл, Фейсбукда кёбюсю гезиклерде оьзлени атларын яшырып язагъанлар булан пикру алышдырып турмакъдан айтардай пайда – хайыр чыкъмажагъы англашыла.
