Эренлерден артда къалмай къуллукъ эте

Бизин пачалыкъда къатынгишилер чалышмайгъан тармакъ да къалмагъандыр. Лётчик, космонавт, поезд гьайдавчу ва шолай башгъа касбуланы башын тутгъан къатынгишилер биревню де тамашагъа къалдырмай. Ич ишлер министерлигинде де кёп тиштайпалар оьз ерин тутмагъа бажаргъанлар.

 Дагъыстанлы къатынги­шилени республикадан тыш­­­да да оьзлени ишге бел­сенгенлиги, гьаракаты булан халкъ арада абур да, сый да къазангъанлары аз тюгюл. Шолай къатынгишилени ал сыдыраларына Зулмира Мусагьажиевна Атетерованы да атын къош­магъа толу ихтиярыбыз бар.

Зулмира Атетерова Бабаюрт районда Тамазатёбеде яшайгъан Абдуллаевлени белгили тухумундан чыкъгъан. Ону уллатасы Солтан Абдуллаев Уллу Ватан давну ортакъчысы эди. Дав майданда айрыча къоччакълыкъ ва игитлик гёрсетгени учун огъар Къы­зыл Юлдуз орден берилген. Давдан сонггъу йылларда да гьар тюрлю тармакъларда чалышып, юртлуларыны сюювюн ва разилигин къазангъан.

Зулмираны ата-анасы да – юртда болгъур деген адамлардан. Олар да къызын тарбиялап, тюз ёллагъа салмагъа къаст этгенлер. Атасы Мусагьажи ва анасы Нурайбат заманында юртда гьар тюрлю жаваплы къуллукъларда ишлеп, халкъны баракалласын алып гелгенлер. Булай агьлюден чыкъгъан ва тарбиялангъан Зулмира да уллатасындан, ата-анасындан уьлгю алып яшавун къургъан.

Бугюнлерде Зулмира Му­сагьажиевна йыракъ Ханты-Мансийск шагьарда ич ишлер тармакъны къу­румунда къуллугъун кюте. Дейгеним, ич ишлени майоруну чининде Ханты-Мансийскидеги Россияны МВД-сини муниципал ич ишлер бёлюгюнде маълумат бёлюкню начальнигини къуллукъларын кюте. Ол оьзюне тапшурулгъан борчларына мекенли кюйде янаша, низамны къатты кюйде сакълай, ишинде Уставгъа гёре гьаракат гёрсете, къуллугъуна берилгенликни аян эте.

Полицияда ишлемеге къатынгишилеге оюн-масхара тюгюл. Амма Зулмира мелте чагъындан башлап оьзюне тапшурулгъан ишин къаныгъывлу кюйде кютмеге уьйренген. Бойнуна алгъан борчлагъа тындырыкълы ва жаваплы кюйде янашагъаны, жамият низамны сакълавда гёрсетген гьаракаты учун кёп керенлер гьюрметлев гра­моталар ва баракалла ка­гъызлар булан савгъатлангъан.

2010-нчу йылда Ханты-Мансийск шагьарда 19-нчу бютюндюнья шагьмат олимпиадада жамият низамны сакълавну болдургъан учун огъар Гьюрметлев грамота берилген.

Оьтген гюнлерде Абдуллаевлени агьлюсюне йыракъ Ханты-Мансийск шагьардан кагъыз гелген. Кагъызда: «Гьюрметли Мусагьажи Солтанович ва Нурайбар Гьажибатыровна! Къызыгъыз Зулмира Мусагьажиевнаны оьр даражада тарбиялагъа­ныгъыз учун сизге гьакъ юрекден баракалла билдиребиз. Ишге гиришген заманындан баш­лап, Зулмира Мусагьажиевна оьзюню Ватанын герти якълавчу этип гёрсетди. Ону къуллугъунда жаваплылыгъын гьис этегени, касбу бажарывлугъу, гьаракаты, низамны болдуруву ва тапшурулгъан борчлагъа янашыву бизин сююндюрмей болмай.

Озокъда, Зулмира Мусагьажиевнаны уьстюнлюклеринде ва оьрлюклеринде сизин де къошумугъуз барны биз билебиз ва инанабыз», – деп язылгъан. Абдуллаевлени агьлюсюню оьз­лер оьсдюрген ва тарбия­лагъан авлетине оьр къыймат бергенлиги булан оьктем болмагъа ихтия­ры бар.

Бизин ата-бабаларыбыз эжел заманлардан берли уясында не гёрсе, учгъанда да шону этер деген сыналып гелген алтынгъа тенг аталар сёзлери бар. Гертиликни, тюзлюкню, адилликни якъламагъа Зулмираны мелте чагъындан башлап агьлюде уьйретген. Гиччилеге гьайлы янашмагъа, уллулагъа гьюрмет этивге, бойнуна алгъан борчну тындырыкълы ва тетиксиз кюйде кютмеге агьлюде кюрчю салынгъан. Яшланы тарбиялаву ата-анадан толу кюйде гьасил бола десек, ялгъан тюгюл.

Ону яхшы англайгъан Мусагьажи ва Нурайбат дёрт де авлетине гиччи чагъын­дан башлап бизин ата-бабаланы асил адатларын ва мердешлерин сингдирме къасткъылгъан. Къастлы етер муратгъа дегенлей, оланы авлетлери яшавда оьз ёлун табып, гьар тюрлю къуллукъланы башын тутуп, ата-анасын сююндюре.

Авлетлерини уллусу Зул­­мира Мусагьажиевна бир гюн де гьёкюнмей оьзю танг­лагъан касбусуна амин болуп ва берилип загьмат тёге, къыйын ва жаваплы къуллугъун йыракъ Ханты-Мансийск шагьарда эренлерден де артда къалмай гьалал кюйде кюте.

                                                                                                                                                                                                                                                                                        Бэлла Гьажигелдиева,

Россияны журналистлерини союзуну члени.

Суратда: Зулмира Атетерова.

Авторизация
*
*
Регистрация
*
*
*
Согласны с условиями сайта?
Генерация пароля