Россияны асгер макътавлугъуну ва Ватанны якълавчусуну гюню саналагъан 23-нчю февральда Каспийск шагьарда Бурлият Акашимовна Ибрагьимованы атындагъы инсаплы фонду терен таъсири ва маънасы булангъы байрам чара оьтгерди. Байрамда ортакъчылыкъ этмек учун Дагъыстан Республиканы бары да къумукъ районларындан къайры да, республикадан тышда, Темиркъазыкъ Осетия-Аланияда яшайгъан къумукъланы «Намус» деген милли-культура къурумуну вакиллери де чакъырылгъан. Шатлы жыйынны журналист ва телеберилишлени автору Иса Агьматов ачды ва бажарывлу кюйде юрютдю.
Россияны халкъ артисткасы Бурлият Акашимовнаны фонду оьзюню савунда, 10 йыллар алъякъда ачылгъан ва кёп тюрлю пайдалы ишлер этген. Аслу гьалда фонд оьсюп гелеген яш пагьмуланы излеп, табып, арагъа чыгъармакъны гьайында чалыша.
Ол гечингенден сонг фондну ишин ону авлетини къызы Патимат Шугьайыбова юрюте. Ол да – улланасыны инсаплы ёлунда.
Оьтген йылда фонд къумукъ юртлардагъы яшлар бавларында къумукъ тилде шиъру охуйгъан гиччипавланы арасында конкурс оьтгерди. Эки айлар алъякъда эсгерилген инсаплы фондну къасты булан Къумукъ театрда «Пагьмуланы шавласы» деген байрам концерт болду. Шонда уьлкени оьлчевюнде гёрмекли оьрлюклеге етишген къумукъ яшёрюмлени чакъырып, олагъа гьюрмет этилди ва уллу концерт гёрсетилди. Концертде жыйылгъан чакъы харж Донбас бойда хас дав гьаракатларда ортакъчылыкъ этеген бизин солдатлагъа инг тарыкълы алатланы алмакъ учун йиберилди.
Байрамгъа гелгенлени бир ягъадан эсгерип, оланы гьакъ юрекден къутламакъ учун Россияны халкъ артисти Айгум Элдарович Айгумовгъа сёз берилди. Айгум Элдарович оьзюню ярыкъ ва таъсирли тавушу булан Дагъыстанны халкъ шаири Магьаммат Атабаевни сёзлерине ва Хизри Батыргишиевни макъамына язылгъан «Къайда аталар» деген йырны тынглавчуланы сан-санына сингдирип, титирердей этип йырлагъан сонг, пагьмулу халкъ артисткабыз Бурлият Акашимовнаны оьзтёрече хасияты –къылыгъы, касбусуна жаны авруп, сююп янашагъанлыгъы, яш пагьмуланы арагъа чыгъарып, оьсдюрюп, танытма къаст этип чалышагъаны гьакъда хабарлады. Сююмлю артисткабызны яхшылыкъгъа ёралгъан хыялларын, ол яратгъан инсаплы фондну ишин ерде ятма къоймай чалышагъан фондну президенти Патимат Шугьайипованы, яшавгъа чыгъарагъан директору Сакинат Магьмутованы атларына савлай къумукъ халкъны атындан разилигин билдирди, кёп-кёп алгъышлы сёзлер айтып тербеди.
– Озокъда, булай жаваплы, инсаплы ишлени гёз алгъа тутуп яшавгъа чыгъармакъ учун, бир-эки адамны гючю де чатмас, харжы да етмес эди, – деп узатды ол сёйлевюн. – Эсгерилген ёлдашланы гьаракатчы чалышывуну яхшылыгъы булан, асувлу ёллар да, тийишли харжлар да табыла, агьамияты уллу ишлер де этиле. Булай тарыкълы, пайдалы гьаракатны узатмагъа Яратгъаныбыз сизге гюч де, савлукъ да, узакъ оьмюр де берсин.
Ондан сонг, арив онгарылгъан аш-сув булангъы столланы артында ерлешип татли лакъыр этеген районлардан гелген гьюрметли вакиллени ортагъа чакъырып, сёз берип, яшавда оланы гьариси етишген оьрлюклени айрыча эсгерип, Бурлият Ибрагьимованы фондуну атындан хас медаллар, грамоталар ва савгъатлар тапшуруп, шайлы гёнгюн алдылар.
Шолай савгъатгъа лайыкълы болгъанланы арасында Дагъыстан пачалыкъ педагогика университетни профессору Атай Устарханович Атаев, Рейхстаггъа байракъ къакъгъан Россияны Игити Абдулгьаким Исмайыловну уланы Солтансайит Исмайылов, Къоркъмаскъала районну башчысыны заместители Жамалутдин Юсупов, Темиркъазыкъ Осетияда къумукъланы «Намус» деген къурумуну гьаракатчысы Расул Алиев, парламентни депутаты Юсуп Исакъов, Дагъыстанны халкъ шаирлери Шейит-Ханум Алишева, Багьавутдин Гьажиев, «Тангчолпан» журналны жаваплы редактору Супиянат Мамаева, ГТРК-да къумукъ берилишлени юрютеген Нёхей Бамматова, Къарабудагъгент районда культура центрны директору Гюлжанат Темирова, композитор Аскерхан Аскерханов, Къумукъ театрны директору Скандарбек Тулпаров ва дагъы да кёп ёлдашлар бар.
Инг де аслусу, шатлы жыйынгъа Донбас бойда хас асгер гьаракатда ортакъчылыкъ этегенлер, шонда жанын къурбан этгенлени агьлюлери де чакъырылгъан эди. Айтагъаныкъ, Ватанны якълавчусуну гюнюн оьтгерегенде шоланы, гертиден де, Ватанны аманлыгъын сакълап гечингенлени эсгергени учун да фондгъа баракалла билдирме тюше. Къарабудагъгентли Жамал Ниъматуллаев ва Арсланбек Паталиев хас асгер гьаракатда ортакъчылыкъ этелер, олар отпускагъа гелгенден пайдаланып, жыйынгъа чакъырылгъан эдилер.
Атлары белгили ва янгы арагъа чыгъып турагъан яш йыравлар – Янгыкъумукъ юртдан гелген «Янгы толкъун» деген ансамблни ортакъчылары Эдилхан ва Батырхан Казимовлар айтагъан йырлар, оьзтёрече тавушлары булан йырлайгъан Саният Надирбекованы, Дагъыстанны ат къазангъан артисти Рустам Агьматхановну, Элмира Межитованы, Дагъыстанны халкъ артисткалары Рукъуят Гьамзатованы, Хадижат Ибрагьимованы, Гюлханым Гьажиеваны, дагъы да кёплерини сююв ва патриот ругьда айтылгъан йырлары байрамны ортакъчыларыны тазза дегенлей къурчун къандырды.
Йыравланы лап гиччиси, 6 йыллыкъ Шагьризат Магьмутова къолуна гюллени байламын тутгъандай, бир йимик толгъан акъ шарланы байламын да тутуп таъсирли этип айтгъан «Ер шарны тас этмегиз» ва «Акъ малайик» деген йырланы жыйылгъанлар ажайып арив харс уруп къабул этдилер.
Шо байрам гюн шатлы ёлугъувда ортакъчылыкъ этгенлени барысына да фондну атындан оьзтёрече савгъатлар тапшурулгъанны бирдагъы керен де эсгере туруп, огъар къол ялгъагъан, кёмек къолун узатгъан ёлдашланы атларына баракалла сёзлер айтылды.
.
