Гьар юртда да билим беривню ожагъы инг агьамиятлы, гележек наслуну тарбиялап юрюйген идарадыр. Таргъуда Жалалутдин Атаевни атындагъы 19 номерли орта школада яшлагъа билим, тарбия берип гёрегенли, безейгенли 123 йыл бола.

 

Башлап 1897-нчи йылдан 1917-нчи йылгъа ерли Таргъуда медреседе яшланы охута болгъан. 1917-нчи йылдан берли буса башлапгъы класлар учун школа ачылгъан. 1950-нчи йылдан 1961-нчи йылгъа ерли – 7 йыллыкъ школа ва 1961-нчи йылдан 1971-нчи йылгъа ерли 8 йыллыкъ школада таргъулулар билим алгъан. 1971-нчи йылда Таргъудагъы школа орта билим берив охув ожагъына айландырылгъан. Шо йыл школаны бугюнгю бинасы да къурулгъан.

Шонча йылланы узагъында школаны филология илмуланы доктору А-Къ. Абдуллатипов, В.Темиров, Ж. Жа­­малов ва башгъалары къошумун болдургъан.Олар гьар тюрлю йылларда Таргъу школаны директоруну къуллугъунда чалышгъан. Бугюнлерде бу­са школаны директору болуп Камалутдин Межитов ишлей.

Таргъу школада кёп йылланы узагъында чалышагъан муаллимлер булан янаша артда гелген, тек касбусуна яхшы тюшюнюп ишлейген яш муаллимлер де бар. Таргъу школада ишлейген муаллимлени санаву буса 90-дан артыкъ. Оланы арасында 26-ву оьр ва 44-вю – биринчи даражалы муаллимлер. Оланы арасында Дагъыс­тан Республиканы ат къазангъан муаллимлери де бар. Шолай да, Россия Федерацияны билим беривюню ат къазангъан къуллукъчулары деген гьюрметли атны школаны директору К. Межитов, муаллимлер У.Гьюсейнова, А.Даниялова, З. Темирова, С.Салахова алгъан. Р.Мирмакъсумова, Р. Къурбанова, К.Межитов, З.Насруллаева ва О.Къурбанов – Дагъыстан Республиканы билим беривюню отличниклери. Таргъудагъы 19 номерли школада кёпден берли тергев берип гелеген Дагъыс­тан халкъланы, айрыча алгъанда, къумукъланы тарихине, адатларына, маданиятына асасланып тарбиялав иш юрюте.

Таргъу школада ана тилни, Да­гъыс­танны тарихин, маданиятын, ин­чесаниятын уьйренивге де айрыча тергев бериле. Къумукъланы гёрмекли вакиллер булан, оланы арасында белгили шаирлер, маданият къуллукъчулар, спортчулар булан ёлугъув­лар оьтгериле. Дагъыстан пачалыкъ университетни профессору, таргъулу Аб­дулкъадир Абдуллатипов, Дагъыс­танны халкъ шаири, «Къарчыгъа» журналны редактору Шейит-Ханум Алишева, Дагъыстанны халкъ шаирлери Агьмат Жачаев, Багьавутдин Гьажиев ва башгъалары булан ана тиллени ва башгъа байрамланы белгилейгенде оьтгерилеген ёлугъувлар мердешге айлангъан. Белгили таргъулу шаирлер Жаминат Керимованы, Шейит-Ханум Алишеваны аты къоюлгъан ана тил кабинетлер бар.

Ана тил ва адабият дарсларда къумукъланы адабиятына, маданиятына айрыча тергев бериле.

Таргъу школаны муаллимлери ва охувчулары бирлешип оьтгереген Навруз байрам буса йылдан-йылгъа къужурлу, маъналы бола.Муна бу йыл да Таргъудагъы школагъа йыравлар, маданият ва инчесаният къуллукъчулар, жамият чалышывчулар жыйылгъан эди. Школаны коллективи къонакъланы ашы да, къашы да булан дегенлей къаршылады.

Охувчу яшлар ва муаллимлер Навруз байрамгъа багъышлап шиърулар охуду, йырлар йырлады, гиччирек сагьна гёрюнюшлер гёрсетди. Школаны директору Камалутдин Межитов байрамгъа жыйылгъан къонакъланы да, муаллимлени ва охувчуланы да къутлай туруп, оьзлер гьар йыл оьтгереген байрамда ортакъчылыкъ этегенине баракалла билдирди.

Таргъуну охувчу яшлары гьар тюрлю шагьар ва республика оьлчевде оьтгерилеген ярышларда биринчи ва савгъатлы ерлени къазана. Оланы ана тилни уьстюнде арымай, талмай ишлейген муаллимлер Гилянханым Мужайитова, Дина Дагьирова, Зугьра Муцалханова, Илмурият Зайналова гьазирлей.

Артдагъы 2 йыл школаны директору Камалутдин Межитовну къасты булан ДР-ни Башчысыны «100 школа» ва «150 школа» деген республика проектлеринде ортакъчылыкъ этип, школада мекенли кюйде ярашдырыв-янгыртыв ишлер юрюлген. Бугюнлеге ерли от тюшювню алдын алыв ишлер, шоланы ичинде школаны бинасы, къалкъысы от ялын къабунмайгъан гьалгъа гелтирилген, от тюшювню билдиреген янгы алатлар ва видеокамералар салынгъан.

Шолай да, 19 номерли школа «Гележекни школасы» деген Бютюнроссия конкурсда ортакъчылыкъ этип, Россияны 100 инг яхшы школаларыны арасына гирген. Камалутдин Межитов буса «2019-нчу йылны директору» деген белги булан ва «Натижалы ёлбашчы» деген шагьатнама булан савгъатлангъан.

Янгы Таргъуда 2018-нчи йылда янгы охув йылны башында 60 номерли школа ачылды. Ону директору этилинип кёп йылланы узагъында Таргъудагъы 19 номерли школада директорну заместители болуп ишлеген Иса Агьматов белгиленди. Бугюнлерде 60 номерли школада ювукъда яшайгъан Магьачкъаланы яшлары да билим ала. Эсгерилген школаны ичи, кабинетлери мекенли ясандырылгъан, янгы талаплагъа гёре къурулгъан билим берив ожакъ санала. Онда 500 яшгъа ери булангъы актовый зал, уллу ашюй, спортзал бар. Физика, химия, биология кабинетлер гьалиги талаплагъа гёре герекли алатлар булан ясандырылгъан. Шолай да, интерактив доскалар гьар кабинетге салынгъан. Башлапгъы класланы дарслары айры бинада оьтгериле. Шонда да бары да онгайлыкълар болдурулгъан.

Ишлейгени кёп болмай буса да, 60 номерли школаны коллективи республика оьлчевде оьтгерилеген гьар тюрлю гьаракатларда жагьлы кюйде ортакъчылыкъ эте. Школада семинарлар, фестиваллар оьтгере. Оьтген йылда буса школагъа Уллу Ватан давну ортакъчысы, Польша Республиканы Игити таргъулу Илмутдин Шугьайыбовну аты берилди ва огъар школаны абзарында эсделик салынды.