Илиякълы ва саламат болмакъ – медицина къуллукъда ишлейгенлеге лап да тарыкъ зат. Ол гьар адамны хасиятына гёре, олагъа агьамият берип, тынглап, оьзюню йылы сёзлери булан оланы сабур эте ва аврувларын енгиллешдире.
Къарабудагъгент юртдагъы школаны битдирип, Каспийскидеги медучилищеге тюше ва оьр къыйматлар булан охуп битдире.
Ол 2005-нчи йылдан берли санаторийде ишлей. Насибатны иш ёлдашлары, санаторийни баш доктору Хадижат Гьамитовна санаторийге гелген адамлагъа гьалал къуллукъ этегени ва ишин яхшы бажарагъаны саялы, Насибатгъа разилигин билдире.
Медицина ишни не учун сайладынг? – деген соравгъа ол булай жавап берди:
– Халкъгъа пайдалы болмакъ, олагъа болагъан кёмегимни этмек, аврувун енгиллешдирмек, оланы баракалласын къазанмакъ – магъа уллу насип. Гьар адам уколдан сонг магъа: «Кёп савбол», – деп айтагъаны негер де тиймейми? Шо саялы болма ярай мени ишлеме гьасиретлигим де. Гьали де билимимни давам этмеге къастым бар.
Медсестра болуп ишлейгеним кёп бола. Бизин коллектив биригип, бирче ишлей, бир-биревге кёмек де эте. Бизин мурадыбыз ва къысматыбыз бир. Бизден талап этилеген зат – оьзюбюзню низамыбызны сакъламакъ, аврувлагъа гёнгюллю ва тергевлю болмакъ. Биз берген Гиппократны антына амин болмакъ. Мени мурадым – ёлдашларым булан къатнашып ишлеп, оланы да, аврувланы да абурун къазанмакъ.
Насибат Изатпашаевна тюз тарбиялангъан, низамлы ва культурасы булангъы адам экени гёрюнюп тура. Ол эки яшны анасы, уланы Садритдинге 11 йыл, къызы Ирисбатгъа 3 йыл бола.
Насибат, тезден сынавлу ва халкъгъа пайдасы тиеген, медицина тармакъны танглагъансан. Шо ёлунг аврувлагъа эм болсун, савгъат болсун. Бир касбу да ёкъдур шолай агьамиятлы. Шо ишде сен замангъа къарамай, оьзюнгню аямай аврувлагъа кёмек этегенинг саялы разилик билдиребиз. Насип сени гьар заманда да табажакъ.
Абдулла Алибеков (Магьачкъала),
Магьаммат Айдиев (Уллубийавул),
Арсланали ва Салигьат Ибракъовлар (Албёрюгент),
Набиюлла Бамматов (Магьачкъала).
