Сюйген етер муратгъа

Маданият Ёлдаш
11 января 2021 в 10:50 384

Гьар ким де гёз алгъа муратлар тутуп, оьзюм сюеген кюйде ишлерим къурашмай деп кантыллап турмайлы, гёнгюлден тюшмей, алгъа абат алмагъа талпынса, шоланы яшавгъа чыгъармагъа бола. Дейгеним, гьаракат этсе, кёп арив ёл да алып, ёлугъагъан четимликлени де енгмеге бажарыла. Шо гьакъда айта туруп, бизин яш наслуну вакиллерини арасында къаныгъывлу кюйде къасткъылып, кёпден берли гьасирет болгъан касбусуна да ес болуп, мекенли уллу оьрлюклеге етишип битмесе де, яшав ёлунда алагъан башлапгъы абатларындан янгыз оьзлер тюгюл, дос-къардашын да сююндюреген къумукъ уланланы ва къызланы гьаракаты, оланы айланасында айланагъанланы юреклерине яллыкъ бере.


Бугюнлерде Москвадагъы М. Горькийни атындагъы Чебер – академия театрында (МХАТ) актёр гьисапда чалышагъан Наби Мусаевич шолай жагьил уланланы бириси. Ол Буйнакскиде 1994-нчю йылда тувгъан ва оьзюню тенглилери булан бирче шагьардагъы 9 номерли  школаны лап яхшы къыйматлар булан битдирген. Набини атын эсгерегенде, халкъ арада, эл арада айтылып гелеген пагьмугъа гючден ес болмагъа да, не де шону яшырып сакъламагъа да бажарылмайгъаны гьакъында айтмагъа тюше. Агьлюсюнде тюзевлю тарбия алгъан, эдепли, адилли, ата-бабаларыбыздан къалгъан асил мердешлеге амин кююнде, къумукъ ва орус адабиятны уьлгюлю игитлеринден ругьланып оьсген Наби яшдан берли яшынып турагъан сырын малим этип, оьзю актёрну касбусун танглагъаны гьакъында айтгъанда, ата-анасы якъламаса да, къаршылыкъ этип де, огъар тогъас салып да токътамай.    


А-П. Салаватовну атындагъы Къумукъ пачалыкъ музыкалы-драма театрыны директору, Россияны инчесаниятыны ат къазангъан къуллукъчусу Мавлет Тулпаровну сиптечилиги булан къумукъ уланланы ва къызланы Б. Щукинни атындагъы Театр институтгъа охумагъа йибергенлиги де, озокъда, юрегине тутгъан мурадына етишмеге огъар ёл ача. Шолайлыкъда, Москвада савлай уьлкеге белгили актёрлар билим алып чыкъгъан оьр охув ожакъда  охуйгъан йылларында да ол гечесин-гюнюн бир этип дегенлей гьаракатын болдура. Гьар къайсы оьр охув ожакъда берилеген дарслардан къайры да, пагьмусун, сагьна бажарывлугъун артдырмакъ учун да белсенип чалыша. Ачыкълашдырып айтгъанда, гьар тюрлю бийивлерде, шёшкени къолда ойнатыв усталыгъын да ол шайлы камиллешдире.


Ону шолай гьаракаты бир де бошуна гетмей. 2019-нчу йылда Наби Москвада Б. Щукинни атындагъы Театр институтну къызыл дипломгъа тамамлай. Шо йыл ол Москвадагъы М. Горькийни атындагъы Чебер – академия театргъа ишге къабул да этиле. Буссагьатгъы вакътиде белгили ва савлай уьлкеге танывлу актёрлар булан бирче айтылгъан сагьнада салынагъан спектакллеге къуршалгъандан къайры да, гьалиге ерли бир нече чебер фильмлерде ортакъчылыкъ этген.


Нечик алай да, заман оьтюп, ол халкъыны атын дангъа чыгъаражакъ къумукъланы сыдырасына къошулажагъына шеклик этмеймен. Шо саялы газетни бетлеринден таба шу гиччирек макъалада Набини охувчулагъа танытмагъа тийишли гёребиз. Ону бары да дос-къардашыны атындан Янгы йыл булан къутлап, огъар арты бир де уьзюлмейген кюйде кёп-кёп яхшылыкълар, яхшы савлукъ ёрай туруп, яшавунгну оьзюнг сюеген кюйде къурмагъа сагъа насип болсун деп айтмагъа сюебиз. Яратывчулукъ гьислеринг, яратгъан келпетлеринг юрекге яллыкъ берип, сагьнаны ярыкълары сагъа гьар заманда да сююнч гелтирсин!

 

Зулейха Агъавова,

Буйнакск шагьарны 9-нчу школасыны къумукъ тилден ва адабиятдан муаллими.

Суратда: Наби Россияны халкъ артисти

Василий ЛАНОВОЙ булан.