Язбаш – авлакъ ишлени къыстав уллу вакътиси. Юзюм бавларда шпалерге ремонт этив булан бирге борла бутав ва байлав ишлер юрюле. Гюзлюклер де къорула– юрт хозяйство оьсюмлюклер зараллы жанлагъа къаршы агъулу дарманлар булан ишлетилине. Ишлени барышына чатакъ салынмайлы, бугюнлерде «Къаягент» пачалыкъ унитар предприятиени жыйынлар залында коллективни бары да тармакъларында загьмат тёгеген 200-ден де артыкъ ишчилени, касбучуланы атындан гелген 40 адам хозяйствону ёлбашчысы М.Алибековну, профсоюз комитетни председатели М.Сулеймановну гьисап берив сёйлевлерине тынглады.
М.Алибеков билдиргени йимик, хозяйство 2016-нчы загьмат йылда юрт хозяйствону бары да тармакъларында яхшы натижалагъа етишген. Шо ишде Сепият Жабрайылованы, Мугьутдин Арсланбековну юзюмчюлюк бригадаларыны ишчилери ва Магьаммат Магьамматовну гьайванчылыкъ фермасыны гьайванчылары айрыча уллу къошум этген. Предприятиени авлакъларында бугюнлерде де язбаш авлакъ ишлер токътавсуз юрюлюп тура, къышлав кампания да уьстюнлю бара.
Директорну докладыны ахыры булан конференцияны делегатлары М. Сулеймановну докладына да тынгладылар. Ол аслу гьалда загьмат тёгегенлени яшавлукъ шартларын яхшылашдырывда, ишлейген ерлеринде болдурулгъан онгайлыкъланы гьакъында айтды. Сонг гьисап беривлени жамы чыгъарылды. Жыйылгъанлар предприятиени администрациясыны ва профсоюз къурумну арасында байлангъан дыгъарны яшавгъа чыгъарылывуна тийишли къыймат бердилер.
Жыйынны ортакъчылары Д. Алавов, И. Шихалиев, С. Жабрайылова, М. Арсланбеков докладлагъа гёре чыгъып сёйледилер. Оьзлени сёйлевлеринде оланы гьариси сав йылны боюнда къыйын тёгюп оьсдюрген юзюмню багьалары йыллар булан гётерилмейгенлиги бек талчыкъдырагъаны гьакъда айтдылар.
Жыйында ортакъчылыкъ этген районну юрт хозяйство управлениесини башчысы, Б.Исмайылов юзюмчюлер, гьайванчылар гётерген масъалалагъа тергевлю тынглады ва соравларына толу жаваплар берди. Оьзюню къысгъа сёйлевюнде ол юзюмчюлени, гьайванчыланы, авлакъчыланы уьстюнлюклери гьакъда айта туруп, иш уьстде йиберилген кемчиликлени де айрыча эсгерди. Мисал учун, гьайванлагъа гьар йыл яхшы емлер гьазирлене. Амма савулагъан сютлени къадары артмай. 2016-нчы йылда гьар сыйырдан орта гьисапда 1487 литр сют савулгъан. Шо да республикадагъы орта натижалардан да аз.
Хозяйствону гюзлюклер чачылагъан майданларын 1000 гектаргъа етишдирмеге имканлыкъ бере. Тек шо имканлыкълардан хозяйствону ёлбашчылары, авлакъчылар толу кюйде пайдаланмай.
Юзюмчюлюкде орта гьисапда гьар гектардан 57 центнер татли емиш жыйылгъан. Мунда да имканлыкълар къолдан чыкъгъан. Хоншудагъы янгывикърилилер, дружбалылар гьар гектардан орта гьисапда 90-140 центнер юзюм къайтаргъан.
Сёйлевюню ахырында Б. Исмайылов хозяйствону ёлбашчыларына, ишчилеге уьстюнлюклер ёрады, баш касбучуланы, бригадирлени гьаракатына гьаракат къошуп ишлемеге чакъырды.
Ахырында 2017-2019-нчу йыллагъа гьазирленген янгы коллектив дыгъар арив гёрюлдю ва къабул этилди.
Магьамматрасул Ибрагьимов.
Къаягент район.
