Генгешни ишинде «Минмелиоводхоз» ФГБУ-ну ёлбашчысы Залкип Къурбанов ва ону орунбасары Бигиш Чаниев ортакъчылыкъ этдилер.
–Хасавюрт районда 48428 гектар ерде чачыв майданлар бар, – деди жыйынны ача туруп, район администрацияны башчысыны 1-нчи орунбасары Мурат Хизриев. – Шолардан 41337 гектары – сугъарылагъан ерлер. Сув булан толу кюйде таъмин этме болмайгъангъа, татавулланы гьалы бузукъ экенге гёре шо ерлени яртысы да сугъарылмай. Районну авлакъларын сув булан таъмин этивге районда 4 сугъарыв управление къарай. Хозяйстволаны арасындагъы татавулланы узунлугъу 424 чакъырым бар. Татавулланы бир-бир ерлери тазаланмагъаны 25 йыллар бола, шону учун да хозяйстволар толу сув алып болмайлар.
Жыйында ачыкъ болгъаны йимик, бу йылдан тутуп, сугъарыв сувну гьар кубуна хозяйстволар ва сабанчы хозяйстволар 18 кепек тёлеме герек. Шолай буса, чалтикни 1 гектарына – 4500, гюзлюкге – 990, гьабижайгъа – 918, гюлайлангъа – 702, люцернагъа – 1134, бавлагъа – 702 ва яшылчалагъа 480 манат бола. Шолай багьалар чачыв майданланы дагъы да кемитмеклик бар. Жыйынны ортакъчылары оьзлени разисизлигин билдирди ва гьал къолайлашгъанча 3–5 йылгъа артгъа тебермекни тийишли гёрдю.
З. Къурбанов эсгерилген масъала 4 йыл алда гётерилгени ва шолай этмесе, сувну авлакълагъа етишдирив масъала дагъы да къыйын болажакъны айтды. Башгъа районлар 28 миллион манатгъа дыгъарлар этип де битгени гьакъда да эсгерди.
Б. Чапиев буса гьукуматны янындан сугъарыв ва татавулланы тарыкълы даражада сакъламакъ учун толу харж берилмейгени ва тарыкъ санавдан янгыз 40 процент берилгенни айтды. Шо буса олагъа башгъа ёллар излете.
Сёйлейгенлер сувгъа гьакъ тёлемекни масъаласы кёп эрте салынгъанны айтдылар.
–Ашлыкъ болдурагъанны бойнуна бирдагъы юк салына тура, – деди «Дагагро» деген фирманы ёлбашчысы Солтансайит Исмайылов. – Мен, акъчам бар буса, бугюн кюйлевючлер алып, биринчилей авлакъланы азыкъландыражакъ эдим. Оьтген йылда гюзлюклени 1 гектардан 1000 манат хайыр алгъанбыз, шону да сувгъа берсек, бизге не къала?
Ондан сонг сёйлеген «Боташюрт» МУП-ну ёлбашчысы Байтази Арсланханов, Дзержинское, Байрамавул, Къарланюрт, Садовое, Кёкрек юртланы башчылары да шолай багьалар сабанчыланы авлакъдан ари къачдыражакъны ва уьркютежекни айтдылар ва сугъарыв сувну беривню масъаласын заманлыкъгъа токътатмакъны тиледи. Эгер де гьал шолай къалса, сабанчылар оьзлер болдурагъан малгъа шо акъчаны да къошажакъ. Натижада буса багьалар дагъы да артажакъ.
Жыйында эки де якъ шо масъалагъа дагъы да къаражакъны ва оьз ойларын оьрдеги гьакимлеге де билдирежекни гьакъында айтдылар.
Гебек КЪОНАКЪБИЕВ,
оьз мухбирибиз.
СУРАТДА: «Минмелиоводхоз» ФГБУ-ну ёлбашчысы Залкип Къурбанов ва ону орунбасары Бигиш Чаниев.
