Авлакъ ишлер къурумлу юрюле

Бабаюрт район Дагъыстанны ашлыкъ бежени гьисапланып гелген. Озокъда, шо вакътилерден берли де йылдан-йылгъа районну сабанчылары ашлыкъ оьсдюрювчюлери оьзлени гелимли тармагъын янгыртывда хыйлы иш этип турагъаны рази къалдыра. Яшавну къыйынлыкъларына да къарамай, авлакъчылар Бабаюрт районда гьали де бар. Артдагъы жума буса гюзлюклени къайтарыв да районда къурумлу башланды. Биринчи гьисаплагъа гёре, тюшюм яман тюгюл.

 __________________________________________________________



Районда авлакъ ишлер эрте язбашда башланагъаны мердешленип де къалгъан. Бу йыл да районда оьсдюрюлген ва сатывгъа чыгъарылгъан турпну оьлчевю 3 минг тоннадан да оьтдю. Сонг да, бу йыл районну сабанчылары аслам кюйде самурсакъ да оьсдюрдю. Умуми кюйде алгъанда, эрте бишеген емишлер районда 227 гектаргъа чачылгъан эди ва шондан къайтарылгъан тюшюмню оьлчевю 4 минг 234 тоннагъа тенг болду.


Артдагъы йыллар районлулар ашлыкъ оьсдюрювге тергев бермеге башлагъаны да юрекни сююндюре. Мисал учун, гетген йыл районда гюзлюклер 1 минг 924 гектар ерге чачылгъан эди. Тюшюм де яман болмады. Орта гьисапда гьар гектардан 25,8 центнер тюшюм алынды. Районну юрт хозяйство управлениесинде билдирген кюйде, бу йыл да гюзлюклени гьар гектарындан алына­гъан тюшюм гетген йыллардан кем болмажакъ деп къаравуллана. Гьалиге ашлыкъ къайтарывну барышы да яман тюгюл. Бугюнге 927 гектар ердеги ашлыкълар чалынып битген, иннырлагъа 2 минг 40 тон ашлыкъ къуюлгъан. Демек, гьар гектардан алынгъан ашлыкъланы орта гьисабы 22 центнерге етише.


Районда ашлыкълар заманында ва тас этивсюз къайтарылсын учун, сабанчылар комбайнланы гьайын да алданокъдан этгенлер. Комбайнлар токътавсуз ишлейген кюйде бары да шартлар да яратылгъан. Ягъарлыкъ-майлавлар булан четимликлер де чыкъмай.


Районда оьсдюрюлеген ашлыкъланы оьлчевю минг гектарлар булан саналагъан заманлар, озокъда, тарихде къалгъан. Буса да, артдагъы йыллар бир вакътиде дериялы авлакъланы уллу бичен тарлавлагъа айландыргъан районлулар да аста-аста ашлыкъ оьсдюрювге тергев бакъдырагъан болгъангъа сююнмей болмайсан. Буса да, он йылланы боюнда районну сабанчыларыны гелимини аслам ерин тутгъан бичен буссагьатда да уллу оьлчевлерде къалып тура. Оьзгесин айтмагъанда да, бугюнге ерли районда 50 минг тоннадан да артыкъ бичен топланып битгенни эсгерсем де таманлыкъ эте. Къатты емлени топлав районну бары да юртларында къурумлу юрюле. Явунлу гелген язбашны ва яллав яйны гьисапгъа алса, районну сабанчылары гетген йыл гёрсетген гьасиллерден артда къалмажагъана умут бар.


Гьар йыл йимик районну гюнбатыш боюнда бу йыл да харбуз тарлавланы оьлчевю аслам. Яйны емиши янгы тюшюм берип башлагъан. Амма касбучулар блдиреген кюйде, бахча емишлени тюшюмю бу йыл аслам болмагъа имаканлы. Шогъар да мен оьрде эсгерип гетген гьава шартлар себепли.


Районда къурумлу юрюлеген ашлыкъ къайтырывну гёзден гечирсе, сабанчылар оьзлеге гелимли тармакъларда чалышагъаны яхшы эслене. Амма ким къайсы тармакъда чалышса да, шо районну умуми юрт хозяйствосун янгы оьрлюклеге элтегени чи герти.


Герейхан Гьажиев,


бизин мухбирибиз.


Суратда: къатты емлер топлана.


Автор чыгъаргъан сурат.


Авторизация
*
*
Регистрация
*
*
*
Согласны с условиями сайта?
Генерация пароля