Ашлыкъ къайтарыв тамамлана


«Каспий» деген пачалыкъ унитар предприятие − Къаягент районда тюгюл, гьатта респуб­лика агропромышленный комплекс­ни ичинде лап уллу юрт хозяйство предприятиелени бириси. Мунда юзюм, ашлыкълар, оьзге тармакъларда да иш юрюле. Гьайванчылыкъ тармакъгъа да тийишли тергев бериле. Къайсы тармакъны алсакъ да, ишлени юрюшю юрекни къувандыра. Булай гьал − къайратлы загьматны белгиси. Уьстюнлюклер пачалыкъ предприятиени директору, Дагъыстанны Халкъ Жыйыныны депутаты Къурбан Гьабибовну актив чалышыву булан да байлавлу.


 


Первомайское − Муги, Мулебки юртлардан 1957-нчи йылда Къаягент ра­йонгъа гёчюп гелгенлерден къурулгъан ва гьали оьзюнде 10 минг адам яшайгъан уллу юрт.



Мундагъы пачалыкъ унитар предприятие 2000-нчи йылда ерли «Каспий» деген совхозну кюрчюсюнде къурулгъан. Савлай уьлкеге белгили юзюмчю, Социалист Загьматны Игити Солтан Багьамаев де Первомайскоеде яшагъан, загьмат тёкген, белгили болгъан.





Базар экономикагъа гёчеген авур йылланы вакътисинде предприятиени ёлбашчылары, загьмат коллектив оьзю-оьзюн сакъламагъа бажаргъан. Бугюн мунда 270 адам ишлей. Предприятиеге артдагъы 20 йыл Къурбан Омарович Гьабибов башчылыкъ эте.



Предприятиеге гьар гелювюбюз юрек­лерибизде къуванчлы гьислер тувдура. Бу йыл да шолай болду. Гюзлюклени орув кампанияны барышы булан мен хозяйствода таныш болдум. Гюзлюклер мунда
800 гектар ерни тутгъан.



Гьар заманда йимик, бу гезик де биз башлап ГУП-ну директору Къурбан Гьабибов булан ёлукъдукъ.



− Тюшюм къайтарывну барышына разибиз, − дей ГУП-ну директору. Муратларыбызны яхшы билсе де, Къурбан Омарович башлап бизге 2018-2019-нчу йыллагъа гюзлюклени чачывгъа байлавлу юрюлеген гьаракат гьакъда хабарлама башлады. Гертиден де, ишлер макътардай. Чачывгъа 800 гектарны
680 гектары гюзлюк урлукъланы къабул этмеге бугюн гьазир. Сатып алынажакъ 120 тон къыйматлы урлукъланы 40 тоннасыны акъчасы да берилген.



2017-2018-нчи йылны тюшюмюн къайтарыв ишлер гьакъда сёз арагъа чыкъгъанда, Къурбан Омарович къолун узатып, кабинетде олтургъан предприятиени баш инженери Къурбан Алхилаевни гёрсетди ва йыракъдагъы «Урги деркъа» деген участкагъа баргъаныбызны арив гёрегенин билдирди.
150 гектар ердеги будайлар орулгъан. «Гьюсемегент» деген пачалыкъ унитар предприятиени ва «Алхожагент» деген юрт хозяйство кооперативни дазуларында ерлешген.




 

«Урги деркъада»


 


Къайтарыв юрюлеген ерге ёл чыкъгъанда, сагьат 12-ден айлангъан эди. Терен къолну ичиндеги ёлланы энишин-оьрюн оьлчей туруп, 18 чакъырымны биз УАЗ машинибиз булан ярым сагьатны йибердик. Будайлагъа етишгенде 6 комбайн орув булан машгъул болуп табулду.



− Тюнегюн мунда 40 гектардагъы будайланы оруп алдыкъ, – дей авлакъчыланы бригадири Нугь Къурбанов. – Гьар гектардан орта гьисапда 35 центнер ашлыкъ къайтарылды. Бугюнгю ишибиз де шолай болур деп эсиме геле. Сугъарылмайгъан топуракъда булай тюшюм −яхшы натижа.



Сагьатына къарап, бригадир авлакъчыланы баш инженер алып гелген исси ашланы татывуна къарамагъа чакъырды. Аш хабып, бираз ял алып, олар янгыдан ишге гиришдилер.



Шофёрлар етишмейгенге гёре баш инженерибиз заманлыкъгъа УАЗ машинге олтургъан. Ремонт ишлени юрютегенинден къайры, гюзлюклени орув булан машгъул болгъан авлакъчылагъа тюш ва ахшам ашны да етишдире.



Бу йыл гюзлюклени орувгъа сынавлу комбайнёрлар Увайс Гьабибов, Абубакар Багьамаев, Мурат Алиев, Ражап Булкъадаров къуршалгъан. Ашлыкъ ташыйгъан 2 КамАЗ ва 2 ГАЗ-53 машинлени шофёрлары Солтанбек Магьамматов, Магьамматэмин Абдусаламов, Омар Омаров, Магьаммат Магьамматов да тер тёгюп ишлейлер.



− Йыракъ ёл, оьр-эниш, исси гьава техниканы ишлевюне, айрокъда ашлыкъ ташыйгъан машинлеге гюч эте, − деп талчыгъа баш инженер. Ону пашманлыгъын гьис этген Нугь Къурбанов Къурбан Алхилаевге разилигин билдирди. Орувну юрютеген техника эсгиленген. Тек ремонтчулар сав йылны узагъында оланы ярашдырыв ишлерин токътатмагъан. Натижада ишибиз алгъа юрюй, техника бузулуп, ишлер бир де токътамагъан.



«Урги деркъадан» къайтывубузда биз инныргъа да гирдик. Ишлер мунда да къыс­тав. Ашлыкълар тазалана, беженге онгарыла. Иннырны заведующийи Магьаммат Рамазановну айтывуна гёре, тюшюмню сан яны яхшы. Орулгъан 440 гектардан мунда 1200 тон ашлыкъ гелтирилген.


 

Директор рази буса да…


 


Директорну сабурлугъуну башы – гюзлюк­лени къайтарыв кампанияны арив ва къурумлу барышында десек, янгылыш болмасбыз деп эсиме геле.



− Ишлерибиз, гёз алгъа тутулгъан чаралар къурумлу юрюле, − дей Къурбан Омарович. − Арт айланы иссилиги къайсыбызны да гьалеклендирмей болмады. Тек бугюнге ишлерибиз яман тюгюл. Орулгъан 440 гектарны гьарисинден орта гьисапда 25-27 центнер тюшюм къайтарылгъан. Сугъарылмайгъан топуракъларыбызны гьисапгъа алгъанда, ишлерибиз яхшы. Къалгъан топуракълардагъы гюзлюклени де тас этивсюз къайтарсакъ, алдагъы йылны натижаларына чыгъарбыз деп эсиме геле.



Сугъарылмайгъан топуракъланы гьар гектарындан 30 центнер тюшюм къайтарыв – лап оьр къыйматлагъа тийишли уьстюнлюк. Нугь Къурбановну бригадасыны авлакъчылары 4 йылны боюнда етишген уьстюнлюклерине хозяйствону ёлбашчылары да тийишли тергев берер деп умут этебиз.



Гюзлюклени тюшюмюн къайтарывну барышына рази болса да, директор къарсалатагъан кемчиликлени гьакъында да айтмай болмады. Шоланы бириси − ягъарлыкъ малланы, машин майланы, техника къуралланы багьаларыны токътавсуз гётериливю. Орта гьисапда алгъанда, гюзлюклени къайтарыв кампанияны вакътисинде бир комбайн 16 минг литр ягъарлыкъ харжлай. Акъчагъа айландыргъанда, дагъысын айтмагъанда, шо 550 минг манат болуп токътай.



Сатылагъан ашлыкъларыбызгъа ти­йишли документ – декларация тарыкъ. Бугюн Дагъыстанда олай документ береген къурумлар да ишлемей. Натижада хоншу республикалагъа бармагъа тюше, – дей ол.



– Биз гьар йыл сан янлы будай оьс­дюребиз. Къайтарылагъан ашлыкълар 1-нчи даражалы деп санала. Тек оланы тазалайгъан техникабыз ёкъ.



Директорну бугюн бирдагъы бир масъала талчыкъдыра. Арт вакътилерде биревлер далапчылыкъны макътап, пачалыкъ унитар предприятиелер пайдасыз, бугюнгю талаплагъа жавап бермей ва шону учун оланы тайдырмакъны якълай. Къурбан Омарович шогъар къаршы. Ол айтагъан кюйде, далапчылар пачалыкъгъа налоглар аз бере, ГУП-ланы буса налог берив политика бек аздыра. Иш олай салынма да герек тюгюлдюр.



Къурбан Омарович булан таныш болгъаныбыз 45 йылдан айлангъан. Шо йылланы ичинде ол комсомол, партия, совет къуллукъларда ишлеген, артдагъы 20 йыл хозяйство ёлбашчы гьисапда чалыша. Къайсы ишин алсакъ да, ол оьзюню актив къуллукъчу, жаваплы касбучу, ёлбашчы гьисапда гёрсетмеге бажаргъан. Уьстюнлюклени башы да ондан ёл ала деп эсиме геле. Халкъыбызны, уьлкебизни байлыгъын, берекетин артдырывгъа байлавлу чалышывунда биз огъар яхшы савлукъ, янгы уьстюнлюклер де ёрайбыз.




Авторизация
*
*
Регистрация
*
*
*
Согласны с условиями сайта?
Генерация пароля