КГБ-ни эл ва иш арада яхшы танывлу полковниги Аселдер Салавутдинович Аселдеров гечинди

КГБ-ни эл ва иш арада яхшы танывлу полковниги Аселдер Салавутдинович Аселдеров гечинди

      Ол Буйнакск районну Тёбен Къазаныш юртунда 1931-нчи йыл тувгъан. 1955-нчи йыл СССР-ни КГБ-сини Тбилиси шагьардагъы хас школасын охуп битген. 1965-нчи йылда буса КГБ-ни Москвадагъы Оьр школасында (гьали шогъар Академия деп айтыла) билим алгъан.

Ол оьзюню загьмат ёлун 1941-нчи йыл колхозда башлагъан. Сонггъа таба гьар тюрлю жаваплы къуллукъларда чалышгъан. 1988-нчи йылдан тутуп, КГБ Дагъыстандагъы бёлюклерини гьар тюрлюлерини башын тутуп ишлеген. Ону тувра ортакъчылыгъы булан ЦРУ-ну Обер ва Мендел деген разведчиклерини душманчылыкъ къайдада тюпден таба юрютеген ишлерини юзю ачылгъан. Давну йылларында Ватанына намарт чыкъгъанланы тутгъан.  Сонг дагъы да, ону тувра къасты булан болгарланы контрразведкасыны ортакъчылыгъы булан ЦРУ-ну СССР-ге къаршы яшыртгъын иш юрютеген къуллукъчулары аянгъа чыгъарылгъан.

Аселдер Салавутдинович яхшы къуллукълары саялы, хыйлы савгъатлагъа лайыкълы болгъан. Огъар «СССР-ни  аманлыгъыны Гьюрметли чалышывчусу» деген ат берилгени де кёп затны англата.

Пачалыкъны аманлыгъын болдурагъан къуллукъларда ишлеген вакътисинде ол 10 йыл бою КПСС-ни Буйнакск шагьар комитетини бюросуну члени болуп да сайланып тургъан. Шагьар советни депутаты, Буйнакск шагьар исполкомну члени де болгъан. Республикабызны  КГБ-сини разведкагъа къаршы иш гёреген бёлюгюню партия къурумуну башын тутуп бир нече йыллар чалышгъан.

Ол эли, халкъы учун ишге белсенип этген чакъы пайдалы ишлени санаву кёп уллу. 1930-нчу йылларда айыпсыз такъсырлангъанланы абурлу атын ва даражасын къайтармакъ учун ол кёп къыйын тёгюп чалышгъан адам эди.

Ватанны аманлыгъын сакъламакъ учунгъу ону гьаракатын пачалыкъ тийишли кюйде къыйматлагъан. Ол къазангъан «Айыпсыз къуллугъу саялы» деген медальны 3 де даражасы, парахат заманларда берилген «За боевые заслуги» деген медалланы эсгерип къойсакъ да таман болур. Дагъыстанны КГБ-си огъар гьар тюрлю къыйматы булангъы 20-дан да артыкъ савгъатлар берген.

Магьачкъалада чекистлени музейинде Аселдер Аселдеровгъа багъышлангъан онгача стенд де бар.

А.Аселдеров ватангъа гьалал къуллукъ этген эр улан эди. Ону иш кютген кюю оьзгелеге гьаман уьлгю болажакъ ва ону ярыкъ келпети халкъны эсинде даимге къалажакъ.

 

Россия Федерацияны ФСБ-сини Дагъыстандагъы бёлюгюню ветеранларыны совети.