Йылны боюнда гьар айда дегенлей тюрлю-тюрлю касбучуланы яда бир башгъа агьвалатны гюню белгилене. Календаргъа гёре ноябр айны 17-си буса – Студентлени халкъара гюню.
Мен студентлени халкъара гюню Дагъыстанда нечик оьтгерилегенни ахтармагъа токъташдым. Гертиси, бизин республикада охуйгъан студентлени кёплери Студентлени халкъара гюню ноябр айны 17-синде экенни билмейлер. Шогъар да къарамайлы, мен Студентлени халкъара гюнюню алдында студентлени бир нечелери булан ёлугъуп гиччирек лакъырлашыв этдим.
Марьям Салаватова Хасавюрт районну Муцалавул юртундан гелип Магьачкъала шагьарда Р. Аскерхановну атындагъы медицина коллежни 2-нчи курсунда охуй. Шагьарны бир азарханасына дарслагъа гелген бир гюп студентлени арасында газетге гиччирек баянлыкъ бермеге янгыз Марьям рази болду.
– Школадан тайып, коллежге охумагъа тюшгенде инг башлап мен оьзюмде жаваплыкъны ва яшавумда бирдагъы янгы канзиге абат алгъанымны англадым. Медицина тармакъда охуйгъанлар гележекде янгыз оьзюню яшавуна тюгюл, оьзгелени яшавуна да жаваплы экенни къабул этмеге герек. Биз студентлер гьисапда янгыз охуп турмайбыз, бирче жыйылып ял алмагъа, киногъа, музейлеге бармагъа, дарс беривчюбюз булан бирче лакъыр этмеге заман да табабыз. Коллежде гёнгюллю студентлени фонду да бар. Ону ишинде ортакъчылыкъ этебиз. Гьар тюрлю рагьмулу чаралар оьтгеребиз. Етишип болмайгъан агьлюлеге, гьар тюрлю аврувлары булангъы яшланы уьюне барып кёмек къол узатабыз. Масъалаланы гьакъында айтгъанда, озокъда, студентлени стипендиясы артгъанны сюер эдим. Оьзюмню студент ёлдашларыма буса яхшы охумакъны, оьзлер юрекге тутгъан мурадына етишмекни ёрайман. Билими ва жигерлиги къолайлагъа яшавда оьз ерин тапмагъа тынч болажакъ, – дей Марьям.
Мени соравларыма жавап берген студентлени арасында Дагъыстан пачалыкъ университетни социал факультетини 4-нчю курсунда охуйгъан Жамиля Аселдерова да бар. Ол Атланавулдан.
Жамиля кёбюсю гьалда мени булангъы лакъырында, оьзю охуйгъан оьр охув ожакъны, ДГУ-ну гьакъында айта туруп, булай деди:
–Адамны амалгъа геливюнде оьр охув ожакъ аслу ерни тута. Дагъыстан пачалыкъ университетде студентлер учун бары да имканлыкълар яратылгъан. Узакъ къалмай бизин республиканы инг де алдынлы оьр охув ожагъын тамамлап касбучу болажагъыма бек шатман. Мен мунда охуй туруп бажарывлу ва къужурлу адамлар булан къатнадым, терен билимлер алдым ва оланы оьзюмню касбумда къоллап болажагъыма шеклик этмеймен. Айрыча студентлени яшаву да мунда къужурлу. Студентлеге ял алмагъа имканлыкълар бар. Олар спорт, яратывчулукъ булан машгъул болалар. Студентлени комитети, илму бирлешивю, жамият къурумлары бек белсенип чалыша. Студентлер илму ишлери ва гьар тюрлю проектлери булан халкъара ва Бютюнроссия конкурсларда ва выставкаларда ортакъчылыкъ эте.
Асият Къазаватова ДГУ-ну филология факультетини орус-дагъыстан бёлюгюню 1-нчи курсунда охуй. Оьзю кёстекли.
Асият биринчи курсда охуй буса да, Студентлени халкъара гюню бар экенин билегенин эсгерди.
– Студентлени гюню гьар тюрлю чаралар оьтгерип, бизге пагьмубузну гёрсетмеге, айрокъда 1-нчи курсну студентлерине къатнамагъа, ювукъдан таныш болмагъа имканлыкъ бере. Биринчи курсда дарс беривчюлеге, студент ёлдашларынга уьйренип битгенче бираз заман оьте. Тек, айтмагъа сюегеним, биринчи курсдан тутуп студентлер бары гючюн салып, къаст этип охуса яхшы. Бизин яхшы дарс беривчюлерибиз бар. Мунда дарс береген алимлер, профессорлар студентлеге терен билим бермеге къаст эте. Студентлер эринмей, талмай охумагъа герек. Мурадына етишме умуту барлагъа бары да имканлыкълар бар.
Четим масъалаланы гьакъында айтгъанда, студентлени арасында охумагъа сюймейгенлери, оьзлер не учун мунда охуйгъанны англамайгъанлары да ёлугъа. Оланы кёбюсю ата-анасы айтып гелген буса ярай.
Гёресиз, календарда къызыл шакъы булан Студентлени халкъара гюню деп язылгъанны билеген студентлер бизин республикада да бар. Оланы шо гюн булан къутлай туруп, яхшы къаст этип терен билимлер алмакъны, ватанына, халкъына пайдалы адамлар болмакъны ва юрегиндеги муратларына етишмекни ёрайбыз.
