Ана тиллени муаллимлерини арасында – биринчи

      Билим беривню оьсювюню федерал институтуну (ФИРО) билим беривню ёлларыны милли культура центры ана тиллени (шоланы арасына  орус тил де къошула) муаллимлерини Бютюнроссия мастер-класы оьтгерилди.  Эсгерилген конкурсда Ленингентдеги 35 номерли гимназияда ана тил ва адабият дарсланы юрютеген оьр категориялы муаллим  Дагъыстанны  билим беривюню отличниги Зарема Абакарова Жанхуватова да ортакъчылыкъ этди ва ону бары да тиретлеринден оьтюп, савлай Россиядан гелген муаллимлени арасында  биринчи ерни алып къайтгъанлыгъы бизин бек сююндюрдю.


Зарема Жанхуватова бизге билдиргени йимик, муаллимлени Бютюнроссия конкурсуну  3 тирети болгъан. Биринчи тирети сентябр айны 15-нден октябр айны 15-не ерли юрюлген.


Биринчи тиретде ярышны талапларына гёре муаллимлер оьзлер оьтгерген дарсдан 10 минутлукъ видео гесек Интернетде ерлешдирме герек.  Биринчи тиретде  шо видео гесекге лап кёп адам тергев берилгенленики  мас­тер-класны гезикли абатларында ортакъчылыкъ этмеге имканлыкъ берген. Экинчи тирет октябр айны 15-нден ноябрь айны 1-не ерли мас­тер-класны жюриси бары да номинациялардан уьстюн гелгенлени аян этген.


Зарема Жанхуватова мастер-класны бары да тиретлеринден оьтюп, къумукъ тил дарсны савлай Россиягъа оьр даражада гёрсетмеге бажаргъан ва мастер-класда ортакъчылыкъ этген 41 муаллимни арасындан  биринчи ерни къазангъан. 


Ноябр айны 17-синде Москва шагьарда билим беривню оьсювюню федерал институтунда огъар диплом ва «Лап яхшы муаллим» деген кубок  тапшурулгъан. Булай мастер-класны оьтгере туруп, институт ана тил ва адабият дарслардан лап яхшы муаллимлени иш сынавун ва охувчуланы ана тилин оьсдюрмек учун янгы къайдаланы  къоллайгъан муаллимлени сынавун гёрсетмекни ва яймакъны гьайын эте.  Ана тиллени (шоланы арасына  орус тил де къошула) муаллимлерини Бютюнроссия мастер-клас дарсланы 2007-нчи йылдан берли оьтгериле ва Россияны халкъларыны тиллерин ва маданиятларын сакълавда чалышагъан орта охув ожакъланы муаллимлери учун бирлешдиреген федерал оьлчевдеги къарав болуп токътагъан.


Зарема Жанхуватованы бу уьстюнлюгю булан гьакъ юрекден къутлай туруп, дагъы да уллу уьстюнлюклер ёрайбыз.
 



Авторизация
*
*
Регистрация
*
*
*
Согласны с условиями сайта?
Генерация пароля