Саниятны насипли къысматы


Къаягент районну Башлыгент юртунда орта школа 1957-нчи йылда ачылгъан. Шондан берли бу охув ожакъда юзлер булан муаллимлер загьмат тёкген, минглер булан уланъяшлар ва къызъяшлар школаны охуп битдирген, яшав ёлун танглагъан. Школаны биринчи муаллимлери эр-къатын Муртузали ва Батув Халимбековланы, къызардашлар Сакинат ва Умуразият Гьажиеваланы, оланы яхшы ишлерин давам этген муаллимлер Кигьили Исаеваны, Рашия Агаеваны ва оьзгелерини атларын башлыгентлилер унутмайлар.


 Мен оьзюм де 1975-нчи йылда Башлыгентдеги орта школаны охуп битдиргенмен. Школаны гьалын, бай мердешлерин теренден билемен. Биз охуйгъан йылларда сынавлу ва гьаракатчы муаллимлер Дагъыстан АССР-ни ат къазангъан муаллими Кигьили Исаеваны, школаны директоруну тарбиялав ишлеге къарайгъан заместители Мустапагьажи Гьамитовну, физкультурадан дарс береген муаллим Багъатыр Багъатыровну сиптечилиги булан юртну тарихин уьйренеген школа музей ачылды. Охувчу яшлар район даражадагъы кёбюсю предмет олимпиадаланы, спорт ярышланы утмагъа бажардылар. Шо яхшы мердешлер бугюн де давам этиле.



Шо йылларда школаны директору болуп ишлейген Абдурашит Къадиев 2–3 йылны ичинде школаны янгы бинасы къурулажакъ деп айтагъаны эсимде. Тек о яхшы умутлар 30 йыллагъа созулду.



Арадан 35 йыл оьтюп, 2011-нчи йылда Башлыгентде 504 яшгъа школаны янгы бинасы къурулду. Школаны муаллимлери, яшлары учун яхшы ишлемеге, охумагъа бары шартлар яратылды: предмет класлар, айры кабинетлер, актовый ва спортзаллар, школа музей ачылды. Шо буса коллективде чалышагъанланы ишге ругьун дагъы да бек гётерди.



Яхшы ишлейгенлени гьакъында сёз арагъа чыкъгъанда, школаны директору Мадина Къадиева башлап Саният Ильясованы, Муслим Шапитовну атларын айтды. Узакъ ойламай, оьзюм де оланы бириси Саният Гьайбуллаевна булан ёлукъмагъа токъташдым.



Ноябрни 24-ю къышны белгилери булангъы салкъын гюн болуп чыкъды. Саниятланы абзарына гиргендокъ, уьйню есилери юзлер булангъы башлылы агьлюлеге ошайгъанына тез тюшюндюм. Бир къабатлы уьйде тазалыкъ, исив шоссагьат гьис этилди. Уьй есилери Камал ва Саният Ильясовлар бизин лап сыйлы къонакъланы йимик къаршыладылар. Эки-уьч сагьатны узагъында юрюлген лакъырлашывну вакътисинде гёз алдан хыйлы йыллар оьтдю.



Саният давдан сонггъу къыйынлы йылларда тувгъан, Бавтогъайдагъы школа-интернатда 8 йыл билим алгъан.



– Школа-интернатда охуйгъан йылларымны гьеч унутмайман, – дей Саният Гьайбуллаевна. – Тизив охув ожакъ, сынавлу муаллимлер, касбусун яхшы билеген адамлар бизин охутду, тарбия берди. Муалимликни ёлун танглагъаным да, балики, шону булан байлавлудур.



1970-нчи йылда Саният ата юртундагъы орта школаны оьр къыйматлар булан битдире ва Дагъыстан университетни филология факультетине охумагъа тюше. Тек бизде, Дагъыстанда, къатынгишилени яшав ёлуна таъсир этеген себеплер кёп. Шоланы бириси арагъа чыгъа. Оьр охув ожакъда охуйгъан яхшы билимли, сюйкюмлю, саламат къызъяш Башлыгентдеги «Кировский» совхозну бригадири болуп ишлейген Камал Ильясовну, ону дос-къардашларыны гёзюне тие. 1972-нчи йыл жагьиллер уьйленелер, янгы агьлю къурула. Янгы яшав, шартлар, намуслар Саниятны ишлей туруп охумагъа борчлу эте. Ол 1972-нчи йыл загьмат яшавун хоншу Жавангентдеги 8 йыллыкъ школаны орус тилден дарс беривчю муаллими гьисапда башлай. 46 йыллыкъ яшав ёлунда загьмат книжкасына дёрт языв этилген. Ол уьч тюрлю охув ожакъларда – Жавангент, Башлыгент, Дружба школаларда ишлеген.



1976-нчы йылда Саният Башлыгентдеги орта школагъа ишге гёчюрюле ва 10 йылны боюнда орус тилден дарс бере. 1987-нчи йылда сынавлу муаллимни хоншу Дружба юртдагъы орта школаны директоруну тарбиялав ишлеге къарайгъан заместители этип белгилей. Шо йылларда Саниятны уьягьлюсю Камал Ильясов да Дружбадагъы ерли «Кировский» совхозну баш агроному болуп чалыша.



1991-нчи йыл Саният Гьайбуллаевна Башлыгентге къайта ва 27 йыл ерли орта школаны директоруну заместители болуп ишлей. Кёбюсю ишлени бойнуна алып, уьстюнлю юрюте. Яш муаллимлеге сынаву булан кёмеклешип къалмай, яшав ёлу булан уьлгю де болуп токътай. Школадагъы бугюнгю тазалыкъ, уьстюнлюклер директорну заместители Саният Ильясованы гьар гюнлюк загьматы булан да байлавлу. Шо саялы огъар 2012-нчи йылда «Дагъыстанны ат къазангъан муаллими» деген ат берилген.



Загьмат книжканы къолума алагъанда, оьзге документлени, савгъат белгилени арасында гёзюме орден книжка да илинди. «О кимникидир?» – деп сорайман Саниятгъа.   – Уьягьлюмнюки, – деп жавап­лана ол.   «Загьмат белгиси» деген орден 1973-нчю йылны декабр айыны 20-сында Башлыгентдеги «Кировский» совхозну 24 йыллыкъ бригадири Камал Ильясовгъа юзюмчюлюк тармакъда етишген уллу загьмат натижалары учун берилген.



– Бизин юзюмчюлюк бригадабыз шо йылларда татли емиш береген юзюм бавланы гьар гектарындан орта гьисапда 100-120 центнер тюшюм къайтара эди, – деп эсге ала Камал. – Бир йыл буса Социалист Загьматны Игити Первомайскоедеги «Каспий» совхозну бригадири Солтан Багьамаевни бригадасын ярышгъа чакъырып, гектардан 130 центнер юзюм алдыкъ, – дей ол. Етишген уьстюнлюгю саялы совхозну шо йыллардагъы директору Рабадан Шарипов яш бригадирге алтын сагьат савгъат этген.



Шулай агьлюню гьакъындагъы язывларыбыз бу агьлюде оьсген яшланы гьакъында да язмасакъ толу болмас деп эсиме геле.



Совет элинде кёп яшлар табып, оланы тюз тарбиялагъан аналагъа «Аналыкъны» 3 даража медаллары бериле эди. Саният Гьайбуллаева – шоланы барысыны да есиси. Ол 6 яшны анасы, уьягьлюсю Камал булан оланы гьарисин ватаныбызгъа пайдалы адамлар этип оьсдюрген, тизив билим-тарбия берген.



Яшланы экевю – Рапият ва Мадина оьр ва орта охув ожакъланы да охуп битдирип, уьлкебизни тахшагьары Моск­вада яшайлар ва загьмат тёгелер.


Уланы Ахав, гиччи къызы Алиса Дагъыстан пачалыкъ университетни юристлер гьазирлейген ва тарих факультетлерин охуп битдирген ва йыракъ Сургут шагьарда яшав ёлун тапгъан.



Элвира врач касбугъа ес болгъан, Магьачкъалада Ленин районуну бир поликлиникасыны заведующийи. Камалны ва Саниятны бирдагъы къызы Мая Ильясова да Магьачкъалада яшай, белгили адвокат.



Йыллар гете. Наслулар алышына. Биз школада охуйгъан йылларда юртлулагъа билим берген муаллимлени атларын адамлар уллу гьюрмет этип айта эдилер. Бугюн оланы санавуна Саният Гьайбуллаевнаны да къошабыз. Ону аты 46 йылны боюнда яратгъан умпагьатлы ишлери, яш наслугъа билим беривде этген къошуму сый-гьюрметге лайыкълы. Яхшыда да, яманда да Камал ва Саният – юртлулар булан.



Башлыгент орта школаны директору Мадина Абдуллаевнаны да савлай загьмат яшаву школа булан байлавлу. Артдагъы 7 йыл ол муаллимлени коллективини ёлбашчысы. Аты макътавгъа лайыкълы муаллимлени гьакъында сёз арагъа чыкъгъанда, ол Саният Гьайбуллаевнаны атын негьакъ айтмагъан.



Бу гезик юртлуну ожагъына от тюшген деген яман хабар яйылды. Мадина ва Саният школаны муаллимлерин тезлик булан жыйып, гьалны англата. Чалтлыкъ булан акъча маялар да жыйып, муаллимлер хатаргъа тарыгъан ожакъгъа етише, есилерине кёмек къолун узата. Шо мисал да бу эки адам – ёлбашчы ва муаллим нечик бири-бирин англайгъанын бирдагъы исбатлады. Шулай арив иш гёрюв, татывлукъ муаллимлени сыкълашдыра, янгы уьстюнлюклеге гелтире.



Оьмюр тез гете. Йыллар ишин эте. Савлукъ да артгъа гетмей болмай. Шолар себеп болуп Саният Гьайбуллаевна да жаваплы ёлбашчы ишин къоюп, муаллимни ишине къайтды. Бажарылагъан кюйде борчларын кюте, яш муаллимлеге болагъан кёмегин эте, сынавун бере.



Агьлю пачалыкъны биринчи канзиси гьисаплана. О нечакъы мугькам болса, пачалыкъ да шонча гючлю, бек болур деп негьакъ айтылмагъан.



Уллу ва татывлу агьлю де къуруп, Башлыгентни жамият, загьмат яшавунда, яш наслуланы тарбиялавда аслам пайы бар Камал ва Саният Ильясовлагъа биз де гележекде яшларындан ва яшларыны яшларындан къуванып, насипли яшамагъа Тенгирибизден савлукъ тилейбиз.



Авторизация
*
*
Регистрация
*
*
*
Согласны с условиями сайта?
Генерация пароля