Белгили болгъан кююнде, гьалиги девюрде школаланы алдында токътагъан аслу борч – охувчу яшланы билимлерин толумлашдырыв ва камиллешдирив болуп токътайгъаны англашыла. Озокъда, педагогика коллективлени чалышыву билим берив ишлени юрютюв булан тамамланмагъа тюшмей. Оьсюп гелеген наслуну яшавгъа гьазирлевде ва тарбиялав ишлени таъсирин болдурувда да педагогланы уьлгюсю тергевсюз къалмагъа ярамай.
Ер юзюнде нече тюрлю касбу, саният бар?! Шоланы арасындан оьсюп гелеген наслуну вакиллерине оьзю ушатагъанын тангламагъа муаллимлер де оьз къошумун этмеге герек демеге сюемен. Шону учун класдан тышдагъы ишлени юрютювге де комплекс къайдада янашма тарыкъ бола. Агьлю, школа коллектив, муаллим арадагъы байлавлукълар беклешген сайын, янгы наслуланы тангаласы да ярыкъ болур.
Бизин Гьюсемегент юртубуз Къаягент къорукъда ерлешген оьзге юртлардан эсе айтардай олай уллу болмаса да, тек, шогъар да къарамайлы, гьалиги заманда школабызда 350 яш билим алывгъа къуршалгъан. Уьстде де эсгерилген кююнде, бугюн оланы школадан тышда оьтгерилеген чараланы айланасына къуршап, айлана якъны табии байлыкъларыбызны аманлыгъын, тазалыгъын къоруп сакълавда ерли гьакимият, жамият ва пачалыкъ къурумлар булан байлавлукъда да асувлу ишлер яшавгъа чыгъарыла.
Шолайлыкъда, айлана якъдагъы агъачлыкъларда орманчылар, агъачкъаравулчулар булан бирлешип табии байлыкъларыбызны толумлашдырывда охувчу яшланы да къошуму болдурула. Олар юртну ичинде ва школаны бавундагъы тереклеге къуллукъ этмеге уьйренегени гьакъда да айрыча эсгермеге герек. Яшлар ата-аналарыны яннавуруна тюшюп къыставуллу авлакъ ишлени вакътисинде емиш тереклени ва юзюм борлаланы оьсдюрювню сырларына тюшюнелер. Сынавлу муаллим Жалил Алхасович, ерли юрт хозяйство предприятиени башчысы Рамазан Къурбаналиев, юртну гьакимбашы Запир Къазбеков шо ишде сыйлы борчларына намуслу кюйде янаша десем, гьакъыкъатгъа къыйышмай къалмас.
Бизге школаны янында къурулгъан ата-аналаны комитетини ортакъчылары да билим берив ва тарбиялав ишлерде кёмекчи къолларын узатагъаны мердешге айлангъан. Шо 10 адамдан къурулгъан къурумгъа А. Латипова башчылыкъ этегени гьакъда да разилик булан эсгеремен.
Тюнегюнден бугюнге, бугюнден тангалагъа деген кююнде, школа –наслуланы бир-бирине байлайгъан билим берив ожакъ. Бугюнлерде савлай уьлкеде йимик ерли школаны педагогика коллективи ва охувчу яшлар Уллу Уьстюнлюкню 75 йыллыгъыны гьюрметине оьтгерилеген чараларда айрыча къошумун болдура Шолай чараларда пионер къурум ва яш асгерчилени гюплери де оьзгелерине уьлгю гёрсете.
