Арбагюн, февраль айны 13-нде, бизин республиканы бары да школаларында 9-нчу класда билим алагъан 35 мингден де артыкъ охувчу орус тилден юрюлген гьасил чыгъарыв сынавлардан оьтдю. Шо сынав олагъа охув йылны ахырында аслу пачалыкъ экзамен бермеге ёл ачагъанын айтмагъа тюше.
Оьтгерилген тергевлени вакътисинде инг алда охувчу яшлар оьзлеге берилген текстге байлавлу некъадар пикру алышдырмагъа, шону чебер кюйде охугъан сонг, къошум маълуматлар булан да пайдаланып, хабарлап айтмагъа бажарагъанына агьамият берилген. Ачыкълашдырып айтгъанда, охувчу яшлагъа шо гюн бизин уьлкеде белгили, гьар тюрлю тармакъларда чалышагъан вакътисинде оьзлени атларын данггъа чыгъаргъан язывчуланы, шаирлени, художниклени, алимлени, спортчуланы гьакъында язылгъан 50-ден де артыкъ текст таклиф этилген. Демек, бу охув йылда биринчилей болуп муаллимлер-экспертлер оланы гьариси булан айрыча лакъырлашыв юрютген.
Шондан къайры да, дагъыстанлы охувчу яшлар «Тарбиялавчуну касбусу», «Асил адам болуп тувамы яда боламы?», «Адамлар неге эрише?», «Лап тизив къурдаш», «Мен лап да кёп сюеген журнал» деген темаланы бирисин танглап, шолагъа байлавлу да оьз янашывун малим эте, муаллими булан да лакъырлашып, пикру алышдыра. Шолайлыкъда, оьзюне гёрсетилген 15 минутну ичинде гьар охувчу яш дёрт тюрлю тапшурувну кюте.
Охувчу яшланы тергевюне берилеген текстлени маънасы, олай да оьзлени айланасында пикру алышдырмагъа тюшеген темалар муаллимлеге оьтгерилеген тергевлер башлагъанчагъа бир сагьат алда белгили этилгенин айрыча эсгермеге тийишли. Шо гюн уьзюрюсю болуп оьтгерилген гьаракатда ортакъчылыкъ этмеге болмагъан, неде оьзлени билим даражасын толу кюйде ачыкъ этмеген охувчу яшлагъа эсгерилген сынавлардан оьтмеге бирдагъы да имканлыкъ берилежек. Рособрнадзор шолай гюнлер гьисапда 13-нчю мартны, олай да 6-нчы майны белгилеп токъташдыргъан.
Шону булан бирге, Дагъыстанны Гьукуматыны Председателини заместители, билим беривге ва илмугъа къарайгъан министри Умупазил Омарова шо гюн Каспийскидеги гимназияда болгъанын да эсгерме ярай. Ол шо охув ожакъда оьтгерилген лакъырлашывгъа тергев этген ва ону барышы булан рази къалгъан.
