Яшланы сююндюрдю

   

Пятница, 06.04.2018г. — «ЁЛДАШ».


Торайып гелеген яш наслугъа аталардан къалгъан адатланы, шону булан бирге гьар тюрлю миллетлени маданият мердешлери гьакъда билдирмек бугюнлерде агьамиятлы. Нечик де, гьалиги яш наслуну вакиллери кёбюсю гьалда оьз халкъыны адат-къылыкъ мердешлерин билмейгенден къайры да, оьзге миллетлени яшав-туруш гьалына бирдокъда тергев бермей десек де, бир де къопдурув болмай.


 


Савлугъу осал ва етим яшлар сакъланагъан Къарабудагъгентдеги хас кёмекчи школа-интернатда бизин респуб­ликаны гьар тюрлю районларындан гелген яшлар тарбияланагъанын, олай да билим алагъанын гьисапгъа алып, тувулунгъан шо гьалны гёзден салмай иш юрюте. Артдагъы гюнлерде де эсгерилген шо идараны къуллукъчусу Женнетхан Ягьияева алдында тарбиялана­гъан яшланы къуршап, дагъыстан халкъларыны маданият варислигине ва адатларына багъышлап оьтгерген чара да шону герти кюйде исбатлады.



Шону барышында Ж. Ягьияева бизин республикада кёп миллетлени вакиллери асруланы боюнда дослукъда ва татывлукъда яшайгъаны гьакъда айтды. Дюнья оьлчевюнде алгъанда да, Дагъыстанда йимик кёп миллетлер гьеч бир дагъы ерде ёкъ экени гьакъда эсгерди. Оланы адатларыны, уьстюне гиеген опуракъларыны, гьар тюрлю ашларыны оьзтёречелиги гьакъда айта туруп, оьрде оьзю айтгъан пикруланы гертиледи. Къарабудагъгентдеги хас кёмекчи школа-интернатны оьзге къуллукъчулары да, гелген сыйлы къонакълардан Россияны халкъларыны мердешли маданиятыны район центрыны ёлбашчысы Арсланали Бахиев де, олай да халкъны социал якъдан къуллукъларын кютеген район центрыны начальниги Рустам Алиев де юрюлеген ла­къыргъа лайыкълы къошум этди.



Оьз гезигинде охувчу яшлар улангъа къыз гелешив адатны сагьналашдырып гёрсетип, оьзлени пагьмусун да, бажарывлугъун да, чинкдеси, оьзлеге берилеген тапшурувлагъа гьариси некъадар жаваплы янашагъанын малим этди. Къарабудагъгентден чыкъгъан белгили йыравлар Альбина ва Жаминат Къазакъмурзаевалар, Россияны халкъларыны мердешли маданиятыны район центрыны къуллукъчулары Аскендер Исрапилов ва Патимат Гьюсейнова жы­йылгъанланы таза къурчун къандырып оьзлени йырларын айтды. Аргъанчы Фатима Элмурзаева да бир нече халкъ макъамны савгъат этди. Къарабудагъгентдеги «Бекенез» деген яшлар бавуну къуллукъчусу Барият Сонгурбекова буса авар тилде йыр айтып жыйылгъанланы тамашагъа къалдырды.



Оьтгерилген чараны ахырын эте туруп, Р. Алиев Къарабудагъгентдеги хас кёмекчи школа-интернатгъа савгъатгъа ноутбук берип, яшлар булан бирче оланы тарбиялавчуларын да сююндюрдю.



Авторизация
*
*
Регистрация
*
*
*
Согласны с условиями сайта?
Генерация пароля