Республиканская еженедельная общественно-
политическая газета «Ёлдаш» (Спутник)
Меню YOLDASH.news МаълуматларКъайгъырыш КъутлавларDAG.newsВ ДагестанеВ РоссииИнтервьюВ миреНа КавказеГлава РДНародное СобраниеПравительствоМинистерства и ведомства Муниципалитеты In memoriamНовости спортаГод культуры безопасности Выборы - 2018ЧЕ-2018 Kaspeuro2018"Времена"ИнфоблокПолитикаИсторияКультураЛюди и время НаукаНовые книгиАчыкъ сёзАналитикаЖамиятПолитика.ЭкономикаБаянлыкъДин ва яшавЖамият низамИлмуTürk dünyasi Савлукъ ЭкологияЮртлар ва юртлуларЯшёрюмлер МаълуматАнтитеррорБирев де унутулмагъан...СапарМаданиятАдабиятКультура ожакъларБилимИнчесаният Къумукъ тилКроссвордМасхараларТеатрЯнгы китапларЯшланы дюньясы Спорт ярышларЕдиноборства Развитие спортаСоревнованияФК «Анжи» МедиасфераО газетеО сайтеСМИФото дняНаши партнерыНаши спонсорыСотрудникиНаши авторыАфишаГалереяРекламаЮбилейный номер
Республиканская еженедельная общественно-
политическая газета «Ёлдаш» (Спутник)

Сююне ва къувана яшагъыр!

                      

        1980-нчи йыл Гюлнара яш сюрювчюлени ярышларында ортакъчылыкъ этип, школада, районда, гьатта республикада 1-нчи ерни алып, Воронежде оьтгерилеген производство бригадаланы членлерини слётунда ортакъчылыкъ эте. Онда яш сюрювчюлени ярышларында ортакъчылыкъ этип, ВЦСПС-ни савгъатына ес болуп къайта.

            Булай юрт хозяйство булан тыгъыс байлавлугъуна да къарамайлы, 1982-нчи йыл Гюлнара Хубиева Орджоникидзедеги мединститутну педиатрия бёлюгюне охума тюше. Бу, озокъда, эсде де, ойда да ёкъдан болгъан иш де тюгюл. Ону атасы Самавдин Хубиев савлай Мычы­гъыш Республикагъа да белгили, терен билимли, уллу иш ­енгил къоллу хирург эди.

            – Мединститутда 6 йыл охума тюшежеги нечакъы да узакъ гёрюне буса да, охуп башлагъан сонг, докторну сигьрулу илмусун герти кюйде билмек учун, 6 тюгюл, 16 да азлыкъ этежек. Эгерден бир минутунгну да бош йибермей, охувну артына тюшмесек деп, ашайгъан вакътиде де китапны къолдан тюшюрмей, юхуну да 3–4 сагьатгъа ерли къысгъартып, къаттыгюнлер де гёнгюллю кюйде азарханалагъа дежурналыкъгъа юрюп охума тюшдю, – дей Гюлнара Самавдиновна.

         1988-нчи йыл Гюлнара Самавдиновна мединститутну лап яхшы къыйматлагъа битдирип къайта. Гюйдюрмесни баш азарханасыны яшлар бёлюгюнде интернатурадан оьте.

           – Интернатурама районну баш педиатору, яхшы сынавлу доктор Абдулла Метеев ёлбашчылыкъ этгени мени учун уллу иш пайдалы болду, – дей Гюлнара Самавдиновна. Интернатурадан сонг ол районну яшланы багъагъан поликлиникасында участка врач этилинип белгилене. Шо ишде ол къасткъылып ишлей ва гёрмекли уьстюнлюклеге етмеге бажара.

        – Инсан яшавну къайсы тармагъында да кёп уллу уьстюнлюклеге етген, гьатта космосгъа ёл алгъан, амма оьзюн инсан гьали де кёп осал ахтаргъан. Айрокъда педиатрия тармакъ осал ахтарылгъан. Сёйлеп болмайгъан яшланы аврувун бакъмакъ учун, янгыз уллуланы доктору болмакъ азлыкъ эте, дагъы да артыкъ билмеге герек, – дей Гюлнара.

            Шо ойгъа рази болмай да бажарылмай. Гюлнара Самавдиновна – шолай терен билимли доктор. Шо саялы да огъар янгыз оьзюню участкасындагъы аврувлар тюгюл, сав шагьар ва районну юртларындан геле, оьзлени инг аявлу яшын инг яхшы доктор бакъгъанны сюе. ­Огъар гёре ону кабинетини алдында бир де адам кемимей, гьатта уьюне де баралар.

           – Сени бары да макътайлар, билеген доктор дейлер, – деген эдим.

           – Оланы «биле дейгенин» билип яшайбыз. Нечакъы къастлы ишлесем де, шеклик таймай, бираз бош вакъти тапсам, теориягъа къайтаман, яшайман, – дей Гюлнара Байгереева.

     2000-нчи йыл Г.С.Байгереева Дагъыстан медакадемияны билимлер камиллешдиреген бёлюгюнде билим-сынав топлавдан оьтюп, уьстюнлю кюйде экзамен де берип, педиатрны шагьатнамасын ала. Ону арты булан аттестациядан оьтюп, 1-нчи даражалы врачны шагьатнамасына да ес бола. 2003-нчю йыл районну, ону арты булан республиканы, гьатта Россияны савлукъ сакълав министерликлерини гьюрметлев грамоталары булан савгъатлана.

     2007-нчи йыл Гюлнара Самавдиновна, савлай ра­йондагъы ерли тиштайпаланы арасында биринчи болуп, «Мычыгъыш Республиканы ат къазангъан врачы» деген гьюрметли атгъа да ес бола. Шо йыл сентябр айда респуб­ликаны Савлукъ сакълав министерлигини аттестация комиссиясы огъар «Оьр категориялы врач-педиатр» деген даража да бере.

            Г. Байгереева бугюн – Гюйдюрмес районну баш педиатры.

         Ат туягъын тай басар, дей халкъыбыз. Гюлнара Самавдиновна, оьзюню оьр даражадагъы билимли атасы Самавдин Агьматханович йимик, касбусуну абурун-сыйын гётерип, оьр даражадагъы доктор болгъангъа ону дос-ювугъу чу нечик де, савлай юрту-эли сююне. Сююне ва къувана яшасын ол оьзю де деп айтмагъа ва Гюлнара Самавдиновнаны тиштайпаланы халкъара гюню булан къутламагъа сюебиз.



Автор: А. МАМАЕВ.

Мычыгъыш Республика, Борагъан.


Количество показов: 590
13.03.2015 16:03

Возврат к списку









AlfaSystems massmedia K3FN2SA
Рейтинг@Mail.ru Яндекс.Метрика Бесплатный анализ сайта