Россияны Президентини абуру гётериле

«Инсанны насиби толу даражада топлансын учун, ону гёрмекли Ватаны болма герек», – деген гьакъыллы сёзлени ким айтгъаны эсимде къалмагъан.


Тек шо сёзлени гертилиги мени оюмдан мир мюгьлетге де таймагъан. Советлер Союзу деген уллу, бай ва гючлю пачалыкъ тозулгъаны о йылларда кёбюсю халкъгъа йимик, магъа да яман тийди. Сонггъу йылларда да Россияны пачалыкъ къурулушу алышынып, капиталист ёлда алагъан биринчи абатлары да онча тюзевлю болмады.


Горбачёвну политикасы да, Ельцинни реформалары да социалист системаны англайгъанлагъа, шо ёлгъа аминлиги барлагъа уьлкени гележеги учун умпагьатлы гёрюнмей эди.



Олардан сонг болгъан Президент Путин де, бир башлап магъа шолай гёрюндю. Ону хасияты мени учун 2014-нчю йылда Сочидеги 22- нчи къышлыкъ Олимпиаданы вакътисинде айрыча ачыкъ болду.



Гертиден де, Олимпиада алдагъыларындан арив болгъан деген багьаны алмагъа бажарды. Ортакъчылыкъ этген уьлкелени къонакълай гелген ёлбашчылары да алдагъы эки де Олимпиададан хыйлы артыкъ эди.



Тек бу къышлыкъ Олимпиаданы Россияны халкъы учунгъу инг агьамиятлы ери – Ватанны абурун гётергени, ону байлыгъын да, гьалиги замангъа гёре къудратлыгъын да сав дюньягъа аян этгени. Тюзюн айтса, Олимпиадагъа кёп акъча харжлана, ону простой халкъ учун не пайдасы бар деп ойлашагъанлар да, айтагъанлар да бар эди. Шоланы арасына мен де гире эдим. Эки жуманы ичинде шо Олимпиадагъа къарагъанда, мени оюм- пикрум алышынды. Гертиден де, бек гёзел ерлени къуршап гьазирлик гёргенден къайры да, янгыз спортсменлеге де, онда къарама баргъанлагъа да, дюньяны халкъы учун да арив байрам болуп токътады.



Олимпиада къаравчулагъа эки тюрлю кюйде таъсир эте. Бириси – спорт ярышлар, экинчиси – ону ачылагъан ва ябылагъан кюю. Эки де таъсирли янлары оьр даражада оьтдю. Россияны командасы биринчи ерни алгъаны – уллу уьстюнлюк. Олимпиаданы ачылагъан, ябылагъан гёрюнюшлерини терен маъналыгъы буса бизин пачалыкъны оьр этип гёрсетди. Озокъда, Президент Путинни абуру да шолай оьрге гётерилди.


Олимпиада тамамланып да битгенче, хоншудагъы Украинада майдан къалмагъаллар башланып, президент Янукович къачып гетип, ону ерине гелгенлер Россиягъа юмурукъ гёрсетгенде, Путинни бети бирдагъы янындан ачылды. Ол политик гьисапда оьзю ёлбашчылыкъ этеген пачалыкъны гючю де, оьктемлиги де барны гёрсетди.



Гюнбатыш Европаны политиклери бирлешип, США-ны башчылыгъы булан Россияны айып­лайгъаны тюз тюгюл. Олар кёп болса да, Путин оьз къаравуна таянып иш гёрежегин англата. Шогъар шагьатлыкъ этеген далил, Россияны гьазир эс табып къабул этген къарарыны натижасында Къырым автономияны якълажагъы мекенли экенни аян эте. Олай ишлер Президент Путинни тангаланы ойлашып юрютеген инче политикасыны гиччи буса да бир гесегин гёрсете.


Украинадагъы гьал бизин пачалыкъны ватандашлары учун агьамиятсыз тюгюл. Оланы къыйыны-тынчы бизге де тие. Россияны оьр гьакимияты бир заманда да Украинада къалмагъал этмежек, этегенлени де къоймас. Шо инаныв бир заманда да таймасын.



Авторизация
*
*
Регистрация
*
*
*
Согласны с условиями сайта?
Генерация пароля