Бугюнлерде Мариям (юртлулары огъар Мариям деп айта) Ставрополь крайдагъы Грачёвка деген район центрдагъы больницада баш терапевт болуп ишлей. Дагъыстандан, Ставрополь крайдан бир медицина къуллукъчу да бугюнлеге ерли шо оьр ва гьюрметли атгъа ес болмагъан. Бу Мариямны уьстюнлюгю булан юртлулары, районлулар, гьатта дагъыстанлылар да оьктем болмагъа бола.
Мариям 1965-нчи йылда Янгы Косада балыкъчы Салаватны ва муаллим Рукъуятны абурлу агьлюсюнде тувгъан. Ол ата юртундагъы 8 йыллыкъ школаны лап яхшы къыйматлагъа битдире. 1981-нчи йылда буса Магьачкъала шагьарда ерлешген къызъяшланы школа-интернатын алтын медаль булан тамамлай. Гиччиден башлап оьзюню алдына врач болмакъ деген борчну сала. Шо мурат булан Магьачкъала шагьардагъы медицина училищеге 1983-нчю йыл охума тюше. Бу орта охув ожакъны да лап яхшы къыйматлар булан тамамлай. Сонг охувун Дагъыстан медицина академияда давам эте. 1989-нчу йылда медицина академияны къызыл дипломгъа битдире.
Савлукъ сакълав тармакъдагъы биринчи абатларын Грозный шагьарда ала. Сонггъа таба йылларда Тотаюрт больницада, йыракъ Якъутия элде загьмат тёкген.
Муна он йылланы узагъында ол Ставрополь крайны Грачёвка деген район больницасында баш терапевт болуп да ишлей, район больницаны баш врачыны орунбасарыны борчларын да кюте.
Озокъда, шо йылланы узагъында иш ёлдашларыны арасында Мариям абур да, сый да къазангъан. Аврувланы арасында ону абуру да бар, огъар аврувлар инана, аркъа таяй десем, къопдурув болмас. Медицина къуллукъчуланы арасында оьтгерилген конкурсларда Мариям 2012-нчи йылдан башлап ортакъчылыкъ эте. Шо йылда ол бу конкурсда савгъатлы ерге ес болгъан. 2013-нчю йылда буса бу конкурсда ортакъчылыкъ этип, Ставрополь крайны лап да яхшы врачы деген номинацияда биринчи ерге ес бола. Бу йыл Мариям, Бютюнроссия конкурсда ортакъчылыкъ этип, «Россияны лап да яхшы юрт врачы» деген номинацияда биринчи болгъан.
Бу конкурс уьлкеде 2001-нчи йылдан башлап оьтгериле. Озокъда, Мариям учун бу уллу уьстюнлюк. Конкурсда ортакъчылыкъ этип, алдынлы ерлени алгъанланы Москвада, Кремлде, сентябр айда савгъатлажакъ.
Мариямны агьлюсюню гьакъында бир-эки сёз айтайыкъ. Ону оьмюр ёлдашы Мурат Даветов да Бабаюрт райондан чыкъгъан. Татывлу агьлюде эки улан оьсе. Уясында не гёрсе, учгъанда да шону этер дегенлей, уланлары да ата-анасын сююндюре. Айтагъаным, уллу уланы Рустам Грачёвкадагъы орта школаны алтын медальгъа битдирип, оьр охув ожакъны да къызыл дипломгъа битдирген. Гиччи уланы Тимур да, агъасы йимик, бу йыл алтын медаль булан школаны тамамлагъан.
Мариям Салаватовнаны уллу уьстюнлюгю булан гьакъ юрекден къутлап, огъар бу пайдалы ва агьамиятлы ишинде дагъы да уьстюнлюклеге ва оьрлюклеге етмекни ёрайбыз.
Бэлла ГЬАЖИГЕЛДИЕВА,
РФ-ни журналистлерини
союзуну члени.
