Ким гюнагьлы экен?

Биз нечакъы артгъа умутлу къарасакъ да, оьтген девюрню маънасы даимге тарихге гетген десек дурус болур деп гьисап этемен. Пачалыгъыбыз 20 йыллар алдын базар аралыкълагъа айланып, простой халкъны кисесин «аздырды», талчыкъгъа-ойгъа салды.

Бу ерде сатывчуну иманы ёкъ, алывчуну амалы ёкъ деген айтыв гьалиги замангъа къыйыша. Байлыкъ, мал-матагь жыйывдан, къала тургъузувдан къайры зат жинаятчылыкъгъа, пасатлыкъгъа айланып, юрекни ярасына туз тёксе тюгюл, шат хабарны эшитмейбиз.


Топуракъдан гьали «ийис» гелеген болгъан, ниъматы гёзню къувандырмай. Бел бувуп, этек чалып загьмат тёгюв бизнесге айлангъан. Бирев-биревню не гьилла къуруп да, ант эте туруп, гёзюню ичине къарап ялгъан айтып да, оьз башын хашый, гьарам малны аркъа таяву бола геле. Яшёрюмлер уьй-эшик къурма айынаман деп, иш излеп тувгъан элинден къайтмас сибир чёллеге чакъырылмагъан къонакъ болуп гетип, уьйде къалгъан ата-анасын, дос-къардашын талчыкъгъа, ойгъа сала, оланы йыллар булан бозарта, юреклерини чыдамлыгъын битдирип, эмсиз аврувгъа тарыта.


Бу ерде ким гюнагьлы деген сорав арагъа чыгъа. Озокъда, пачалыкъны башын тутгъан ёлбашчылар оьзлер де биледир. Оланы янгылыш ишлери халкъны бурнундан чыгъа.



Алышынывланы башлагъанлар заводланы, фабриклени къапуларына къара кирит уруп, халкъны орамда къойдулар. Юрт хозяйство тармакъны бай ниъмат береген топуракъларын гёрсе, адам къоркъардай барлакъ елеген, дув майдангъа айлангъан. Бел бувуп, этек чалып айланагъан сабанчы ёкъ. Демократия девюр гелгенде, топуракъ къысылып, сув къуруп, загьматчы халкъ сакъатгъа айлангъанны гёресен.



Халкъ тыш пачалыкъланы ашамлыкъ, гийим малына харлы къалгъан бола. Совет гьукумат къонакъны тойдургъан, Ватанына душман чапгъын этгенде, халкъы къолуна савут алып, гюллеге тёш берип, элин, юртун, ожа­гъын сакълагъан. Пачалыкъгъа къы­йын къопса, намусун халкъ кюте гелген.



Депутат – халкъны къыйын-тынчын якълама сайлангъан вакил. Гьа­къыкъатда буса оьз башыны гьайында: байлыкъ жыйыв, къалалар къурув, пачалыкъны акъча маясындан пай алыв чалышывда яшав сюре. Къаймагъы магъа, нагьы сагъа деп, тыш пачалыкъларда бизнес булан доланып, мени гёрмегенни гёзю чыкъсын деп юрюй. Халкъ кимни артына тюшюп, къайсы ёлдан юрюйгенни билмей, аркъатаяву ёкъ.



Булай башалман мердеш гележек наслугъа унутулмас къапас болуп, дюньягъа гёзюн ачма, яшавлукъ этме, уьй-эшикли болма умутлуланы юрек­леринде инамсызлыкъ тувдуражакъ.


Базар багьа, кисеге

Акъчалы ямав салгъан.


Чебер сёз, ругь хазнабыз


Оьтесиз азып къалгъан.



Автор: Зайналабит Басханов.
Хасавюрт район, Ботаюрт.

Авторизация
*
*
Регистрация
*
*
*
Согласны с условиями сайта?
Генерация пароля