Илмутдин Мирзабеков:


– Илмутдин Магьамматрасулович, сиз район больницагъа ёлбашчылыкъ этегенигиз онча кёп болмай, амма бу тармакъда янгы адам да тюгюлсюз. Кёп йылланы узагъында хирург болуп ишлеп гелгенсиз. Шо йылланы узагъында ишигизде, больницаны яшавунда алмашынывлар ва янгылыкълар болгъандыр. Шо гьакъда хабарлагъаныгъызны сюер эдик.

– Гертиден де, мен савлукъ сакълав тармакъда чалышагъанлы 37 йыллар бола. Шо вакътини ичинде кёп сувлар эниш акъгъан, хыйлы ишлер алгъа гетген. Озокъда, больницаны гьалы да бар якъдан алышынгъан. Дагъысын айтмагъанда, районну савлукъ сакълав идарасында ишлейгенлени санаву 750 адамгъа етишген. Оланы арасында 110 врач ва 416 медсестра иш гёре. Врачларыбызны он алтаву – Дагъыстан Республиканы ат къазангъан врачы деген атгъа да ес болгъанлар. Ондан къайры, бизде савлукъ сакълавну кёп отличниклери де бар. Бизин больницагъа 105 аврувну къабул этип, ерлешдирме болабыз. Юрт ерлерде 3 участка больница, амбулаториялар, фельдшер-акушер пунктлар ишин кюте.

– Сизин тергевюгюзге ва сынавугъузгъа кюрчюленип айтгъанда, арт вакътилерде къайсы аврувлар кёп яйылгъан? Бу сизин ишигизде аврувланы алдын алыв ва профилактика ишлер нечик юрюле?

– Немислени алими Генрих Гейне: «Мен билеген биргине-бир гёзеллик бар, о да – савлукъ», – деген. Айтагъаным, бизин больницада адамланы савлугъун сакъламакъ ва беклешдирмек учун нече тюрлю къуллукълар да кютюле. Адамланы савлугъун тергеп чыгъып, тийишли болса, больницада да ятдырабыз. Олагъа уколлар этилине, дарманлар бериле. Сонг да, 55–60 чагъындагъылагъа къаркъарасына пайдалы, югъагъан ашланы да къошуп, гюнде беш керен беребиз.
Сиз эсгерген кюйде, йылны ичинде бизде нече аврув ята деп гьисап юрютювлерден баш къачыраман. Неге тюгюл, йылны узагъында бир-бир аврувлар гьакип гетегенге гёре, бир тайпа адамлар больницада бир нече керен ятмагъа борч­лу болалар. Шо себепден бир нече керен больницада ятгъан саялы гьисапгъа алып турмакъны маънасы ёкъ. Мен оьзюмню де, башгъаланы да алдына салагъан бир къатты талабым бар. Шо да – аврувну сав этмек. О заман бизин асил ишлерибиз де, ойларыбыз да онглу болур.
Сонг да, бизден кёмек излеп, къолайлыкъ къаравуллап идарабызгъа гелегенлени санаву кёп артгъан. Буса да, шону да аз гёрюп, уллуланы ва яшланы савлугъун тергемек учун заман-заман поликлиникагъа чакъыраман. Неге тюгюл, яш адамланы арасында авруйгъанлар кёп болуп тура. Бизге аслу гьалда савлугъун беклешдирмеге юреги къыйнайгъанлар, къаны ташыйгъанлар, шекер, нерва аврувлар къабунгъанлар, бюйреклери, оьпкелери авруйгъанлар геле. Янгурну артындан ямучу алып чапгъан булан пайда ёкъ. Айтагъаным, адамгъа аврув къатнагъанча, ону алдын алма хыйлы рагьат бола. Заманында баш чарасын гёрме тюше. Адамлар оьзлени савлугъуна гьайлы янашса, бизге де олагъа кёмек этме бажарыла. Шо саялы гьар йыл оьтгерилеген тергевлени натижасында адамны гьар тюрлю авруву да арагъа чыгъа. Эгер де олагъа бизде кёмек этме болмай буса, биз оланы башгъа медицина къурумлагъа бакъдырабыз.
Дагъы да эсгерсем, халкъны арасында англатыв ишлер юрютмекни кёп пайдасы тие. Сонг да, сиз де гёргенсиздир, адамлагъа заралы бек тиеген, югъагъан ва оьрчюгеген аврувлагъа байлавлу англатыв ва гёрсетив стендлер онгарылгъан. Шону булан бирче сынавлу касбучулар ерли телевидениеден ва район газетден гьар тюрлю аврувланы гьакъында генг кюйде маълуматлар берелер.


– Илмутдин Магьамматрасулович, «Савлукъ сакълав» деген милли проектге гёре сиз ёлбашчылыкъ этеген больница не йимик янгы медицина къураллар булан таъмин этилинген?


–Миллетни савлугъу пачалыкъны барлыгъы ва байлыгъы болуп токътай. Шо проектден биз де пайдаланабыз. Айтма сюегеним, шогъар гёре бизин больница янгы шартлагъа жавап береген медицина къураллар, алатлар булан таъмин этиле. Энниден сонг да тарыкъ-герекни болдурма умутубуз бар. Оьзюм ёлбашчылыкъ этеген вакътини ичинде де юрекни ва ашкъазанны тергемек учун янгы УЗИ къураллар, янгы автотранспорт, холодильниклер алынды. Оьзге якълардан да материал-техника кюрчюбюз беклешди. Ондан къайры да, терапия, яшлар табагъан бёлюклерде, бир нече оьзге ерлерде мекенли кюйде ремонтлар этилинди. Алхожагент юртда янгы фельдшер-акушер пункт ачылды. Янгывикъри юртда буса амбулатория янгы бинагъа гёчюрюлдю. Инг де аслусу, ремонт этилинген бёлюклер ерлешдирилген бинаны уьч де къабатыны гьар палатасында, сав гюнню узагъында таза сувдан аврувлар пайдаланма болагъаны да хыйлы онгайлыкълар тувдура.

– «Скорая помощну» къуллугъуну айланасында тезден берли гьар тюрлю хабарлар юрюлегени биревге де яшыртгъын сыр тюгюл. Бугюнлерде шо къуллукъну иши не даражададыр?


– Адамланы, аврувланы рагьатсызланагъанын тюз англап, къошум гьисапда ич ва тыш имканлыкъланы ахтарма тюшдю. Шону учун «Скорая помощь» къуллугъунда сав гюнню узагъына эки бригада оьзлени борчун кюте. Бу – бир яны. Экинчилей, аврувланы уьюне барып да, бизге гелтирип де биринчи кёмекни болдурагъанлыкъ, больницада уколлар ва дарманлар булан таъмин этилегенлик кемчиликлени хыйлы ёрукълашдыргъанны, къолайлашдыргъанны эсгерме тюше.

–Илмутдин Магьамматрасулович, гьар коллективни, идараны оьзеги деп гьисапланагъанлары бола. Олайлар сизин коллективде де бардыр?

– Бугюн магъа гележеги булангъы уллу коллективге ёлбашчылыкъ этме тюшген. Озокъда, коллективни гьар къуллукъчусуну алдында уллу борчлар, намуслар да токътагъан. Амма бир затны яхшы билемен, гьариси ишине бирев де сёз табып болмайгъан кюйде намуслу янашмагъа, билимлерин камиллешдирмеге, оьзлени касбусун аямагъа тарыкъ. Шо саялы, коллективни ичинден биревлени айырып, оланы уьлгю гьисапда эсгермекни яны тюгюлмен. Оланы гьариси оьзтёрече яхшы да дюр, сынавлары да бар.

– Яннавуругъузда ишлейгенлеге не ёрама сюесиз дагъы?

– Сыйлы касбуну юрютеген, савлай яшавун халкъны савлугъун беклешдиривге багъышлагъан бары да медицина къуллукъчулагъа яхшы савлукъ, узакъ оьмюр, шат, насипли ва парахат яшав ёрайман. «Акъча тас этдинг – бир зат да тас этмединг. Заманны тас этдинг – кёпню тас этдинг. Савлукъну тас этдинг – бары да затны тас этдинг»,–деп айта французларда. Барыбызгъа да савлукъ да, саламатлыкъ да ва бир-биревню англап яшамагъа насип де болсун.

Суратда: И. Мирзабеков.

Авторизация
*
*
Регистрация
*
*
*
Согласны с условиями сайта?
Генерация пароля